დედოფლისწყაროს სამ სოფელს სახელი შეეცვალა

1 სექტემბრიდან დედოფლისწყაროს მუნიციპალიტეტის სამ სოფელს სახელი გადაერქვა.
აღნიშნულთან დაკავშირებით საქართველოს პრეზიდენტმა მიხეილ სააკაშვილმა  "ზოგიერთი გეოგრაფიული ობიექტისთვის სახელწოდების გადარქმევის შესახებ" ბრძანებას ხელი უკვე მოაწერა. ამის შესახებ ინტერნეტ–გაზეთ „ქიზიყს“ პრეზიდენტის ადმინისტრაციის პრესსამსახურიდან აცნობეს.

ბრძანების თანახმად, ამიერიდან დედოფლისწყაროს მუნიციპალიტეტის სოფელ წითელწყაროს - "ხორნაბუჯი", სოფელ ჯაფარიძეს - "სამრეკლო", სოფელ ლენინოვკას კი - "ჭოეთი" ეწოდა. 
 
როგორც დედოფლისწყაროს მუნიციპალიტეტის საკრებულოს თავმჯდომარე ლევან ბაღაშვილმა ინტერნეტ–გაზეთ „ქიზიყს“ განუცხადა, ამ ეტაპზე პრეზიდენტის მიერ ბრძანების ხელმოწერის თაობაზე ოფიციალური შეტყობინება მუნიციპალიტეტს ჯერ არ მიუღია. ბაღაშვილის განმარტებით, ამის თაობაზე ინფორმაციას ის მხოლოდ მედიასაშუალებებიდან ფლობს.
„ჩვენ ჯერ ოფიციალური შეტყობინება არ მიგვიღია და როცა წერილობით მივიღებთ, მხოლოდ მას შემდეგ გამოვიყენებთ ახალ სახელწოდებებს. ალბათ, უახლოეს დღეებში შეტყობინებას ფოსტით მივიღებთ,“ – აცხადებს ბაღაშვილი.

შეგახსენებთ, აზრთა სხვადასხვაობა იყო სოფელ ჯაფარიძის ახალ სახელწოდებასთან დაკავშირებით, თუმცა საბოლოო ჯამში ისეთი სახელწოდებების დამტკიცება ხდება, რისი რეკომენდაცია ხელისუფლებას ხორნაბუჯისა და ჰერეთის ეპარქიამ რამდენიმე თვის წინ წერილობით მისცა. /ქიზიყი/ ილია მარტყოლიშვილი
 * * *
შინაურ ცხოველთა იძულებითი ვაქცინაცია დაიწყო

მას შემდეგ რაც დედოფლისწყაროში მკვდარ კატას ცოფი ლაბორატორიულად დაუდგინდა, სურსათის უვნებლობის, ვეტერინარიისა და მცენარეთა დაცვის დედოფლისწყაროს რაიონული სამმართველო შესაბამის ღონისძიებებს ატარებს. როგორც ინტერნეტ–გაზეთ „ქიზიყს“ სამმართველოდან აცნობეს, მათ დედოფლისწყაროში გამოვლენილი ცოფის კერაში აცრები განახორციელეს.
ვეტერინარიის სამსახურის სპეციალისტი ეთერ იაკობიშვილი აცხადებს, რომ ამჯერად 210 სულ ცხოველს იძულებითი ვაქცინაცია ჩაუტარდა:
„ქალაქ დედოფლისწყაროში, ჰერეთის ქუჩაზე, სადაც ცოფის კერა გამოვლინდა, 1 კილომეტრის რადიუსში არსებულ შინაურ ცხოველთა იძულებითი ვაქცინაცია განხორციელდა. სულ 210 სული ავცერით. დანარჩენს სახელმწიფო არ აფინანსებს და უფასო აცრას მხოლოდ კერის გამოვლენის შემთხვევაში ვატარებთ–ხოლმე. დანარჩენ შემთხვევებში, თუკი მოსახლეობას სურს საკუთარი ცხოველები აცრან, ამისათვის უნდა მიბრძანდნენ და ვაქცინაცია კერძო ვეტერინარებთან ჩაუტარონ,“ – განმარტავს იაკობიშვილი.
დედოფლისწყაროში ცოფის გავრცელების თაობაზე პანიკა მას შემდეგ ატყდა, რაც სოფელ არბოშიკსა და ქალაქ დედოფლისწყაროში კატებმა მცირეწლოვანი ბავშვები ერთდროულად დაკაწრეს. ერთ–ერთი კატა კი მეორე დღეს მკვდარი იპოვეს, მას ცოფი ლაბორატორიულად დაუდგინდა. ამ შემთხვევის გამო დედოფლისწყაროს საზოგადოებრივი ჯანდაცვის ცენტრში ამბულატორიულ მკურნალობას 34 ადამიანი ამ დრომდე გადის, რომელთა უმრავლესობა მცირეწლოვანი ბავშვია. /ქიზიყი/