вторник, 8 июня 2010 г.
როგორ მოახერხა ჯამალაშვილმა არბოშიკში ოთახში გვამის წლობით დამალვა, როგორ აღმოაჩინეს ის ბავშვებმა და რა გზით გადაურჩა დამნაშავე გისოსებს
2004 წლის შემოდგომაზე, დედოფლისწყაროს რაიონის სოფელ არბოშიკში, ნანა ჯამალაშვილის საცხოვრებელ ბინაში, თანასოფლელმა ბავშვებმა, აყრილი იატაკის ქვეშ, დიდი ხნის წინ გარდაცვლილი ადამიანის გვამი იპოვეს. მცირეწლოვანი ბავშვები ოთახში მას შემდეგ აღმოჩნდნენ, რაც თამაშის დროს ბურთმა ფანჯარა შეამტვრია და იმ ოთახში დაეცა, სადაც დანაშაულის დაფარვის მიზნით ადამიანი იატაკის ქვეშ დამარხეს. ჟურნალისტ ილია მარტყოფლიშვილის ხელმძღვანელობით გაზეთ ქიზიყის საგამოძიებო ჯგუფმა ამ სკანდალური საქმის დეტალების შესწავლა ჯერ კიდევ ოთხი წლის წინ დაიწყო.
თვითმხილველებმა დაუყოვნებლივ დედოფლისწყაროს პოლიციას აცნობეს. ვინაიდან ხსენებული ბინა დიდი ხნის მიტოვებული იყო და მისი მეპატრონე ქალბატონიც მოულოდნელად სოფლიდან გაიხიზნა, პოლიციამ ეჭვი იმთავითვე ნანა ჯამალაშვილზე მიიტანა და მისი ძებნა დაიწყო. სისხლის სამართლის საქმეს დედოფლისწყაროს პროკურატურა და გამომძიებელი დავით დუღაშვილი იძიებდა. გაირკვა, რომ გვამი რამდენიმე წლის წინ გაუჩინარებულ ქალბატონს, ლაგოდეხში მცხოვრებ ირინა მჭედლიძეს ეკუთვნოდა.
როგორც ცნობილია, საქართველოში სამოქალაქო ომის შემდეგ მოსახლეობა საყოველთაო სიდუხჭირემ მოიცვა, რის გამოც ქვეყანაში უმართავი პროცესები წავიდა. 90-იან წლებში ძალიან გამწვავდა კრიმინოგენური ვითარება. ძარცვა, გლეჯა და ახლობლების დაყაჩაღებაც კი ჩვეულ მოვლენად აღიქმებოდა. ყველაფერთან ერთად ქვეყანაში საკვების დეფიციტიც შეიქმნა. ხელისუფლება მოსახლეობას პურითაც ვერ აკმაყოფილებდა, რის გამოც დაცარიელებულ მაღაზიებთან დილიდანვე უშველებელი რიგები იდგა. ამ წლებში, მოსახლეობის დიდმა ნაწილმა, თავის გადარჩენა ვაჭრობით მოახერხა. განათლებული ადამიანებიც აღარ თაკილობდნენ დახლთან დგომას თუ საოჯახო საქონელის გასაყიდად ქუჩა-ქუჩა სიარულს.
ლაგოდეხის რაიონის სოფელ ვარდისუბანში მცხოვრები ირინა მჭედლიძეც გართულებულმა ცხოვრებამ აიძულა ქუჩაში გასულიყო და ოჯახი ვაჭრობით ერჩინა. გამოძიების მასალების მიხედვით, სხვადასხვა საქონლითა თუ ტანსაცმლით სავსე ჩანთებით ხელში ირინა მჭედლიძე პერიოდულად კახეთის სხვადასხვა რაიონებს სტუმრობდა.
ერთ მშვენიერ დღეს მჭედლიძე სახლიდან ჩვეულებისამებრ სავაჭროდ გავიდა და უკან აღარ დაბრუნებულა. როგორც მჭედლიძის ახლობლები აცხადებენ, იგი არც დროსტარებას იკლებდა, რის გამოც მისი გაქრობა არავის გაჰკვირვებია და წლობით გაუჩინარებული ქალბატონი არც საკუთარ ოჯახს მოუკითხია.
როგორც მოგვიანებით გაირკვა, უკანასკნელად ის დედოფლისწყაროს ეწვია. ირინა მჭედლიძე ბოლოს სოფელ არბოშიკში ნანა ჯამალაშვილის ბინასთან შენიშნეს. როგორც არბოშიკის მაცხოვრებლები ამბობენ, მჭედლიძეს მათ სოფელში შემოაღამდა და ჯამალაშვილს, რომელიც სახლში მარტო ცხოვრობდა, ღამის გათევა სთხოვა. ამის შემდეგ ირინა აღარავის უნახავს. ჯამალაშვილის მეზობლები გაზეთ ქიზიყთან საუბრისას იხსენებენ, რომ იმ დღეს მჭედლიძეს ნავაჭრ ფულთან ერთად, მოსახლეობიდან მოგროვებული ე.წ. ნისიების თანხაც ჰქონდა, რაც ჯამში საკმაოდ სოლიდურ თანხას შეადგენდა. ახლობლები ვარაუდობენ, რომ შესაძლოა მკვლელობა და გვამის გაუჩინარება სწორედ ძარცვის მიზნით მომხდარიყო.
გაზეთი ქიზიყის კორესპონდენტი ბესიკ გულაშვილი დედოფლისწყაროს რაიონული პოლიციის იმჟამინდელ უფროსს ლევან შანშიაშვილს შეხვდა და ამ საკითხზე ესაუბრა. მას არ დაუმალავს, რომ რაიონში გამეფებული მძიმე კრიმინოგენური ვითარება, არაერთხელ გატარებულმა ოპერატიულმა ღონისძიებებმაც ვერ გამოასწორა: ,,ამ დროს დედოფლისწყაროს მთელ რიგ სოფლებში საკმაოდ მძიმე კრიმინოგენური ვითარება იყო. სამწუხაროდ, ვითარების გამოსწორება ვერ შევძელით. პოლიციის არაერთი მაღალჩინოსანი არაეფექტური მუშაობის გამო სავარძელს გამოეთხოვა. როგორც ჩემთვის ცნობილია, ლაგოდეხელი ირინა მჭედლიძე ვაჭრობდა და მუდმივად ფულთან ჰქონდა საქმე. ამიტომაც, ერთ-ერთ ვერსიად, იმთავითვე, ძარცვის მიზნით ჩადენილი მკვლელობა მუშავდებოდა. მით უფრო იმ ფონზე, რომ გარდაცვლილი თავაშვებულ ცხოვრებას ეწეოდა. საყურადღებოა, რომ მკვლელობის მეორე დღესვე ბინის მეპატრონე ქალბატონი ნანა ჯამალაშვილი სოფლიდან რუსთავში გადაბარგდა. - აღნიშნავს პოლიციის ყოფილი უფროსი.
როგორც სიღნაღი-დედოფლისწყაროს პროკურატურის გამომძიებელი დავით დუღაშვილი გაზეთ ქიზიყთან საუბარში აცხადებს ძიებამ დაადგინა, რომ ღამის გასათევად შესული სტუმარი მასპინძელმა ჯამალაშვილმა სასმელებით გამოათრო. ალკოჰოლური ზემოქმედების ქვეშ მყოფებს კი შეკამათება მოუხდათ. ამის შემდეგ ჯამალაშვილმა სტუმარი გაურკვეველ ვითარებაში მოკლა.
დავით დუღაშვილი: ,,მოგვიანებით მან, დანაშაულის დაფარვის მიზნით, საკუთარი საცხოვრებელი ბინის ერთ-ერთ ოთახში იატაკი აყარა, ქვეშ სამარე გათხარა და მოკლული მჭედლიძე ოთახში დამარხა... იატაკი ჩვეულებისამებრ დააჭედა და მეორე დღიდან ბარგის ჩალაგება დაიწყო. სოფელი დაუყოვნებლივ დატოვა და საცხოვრებლად რუსთავში გადავიდა. მას შემდეგ გარდაცვლილი არავის მოუკითხავს. მჭედლიძის ოჯახს მისი დაკარგვის შესახებ არც პოლიციისთვის უცნობებია. როგორც გავარკვიეთ იგი მეძავობასაც ეწეოდა და ოჯახიდან სხვადასხვა რეგიონებში ხშირად დადიოდა. ამის გამო მისი გაუჩინარება ჩვეულებრივ მოვლენად აღიქვეს და ძებნა არავის დაუწყია. როგორც სჩანს, მოგვიანებით ჯამალაშვილი სინდისის ქენჯნამ შეაწუხა, იფიქრა ოდესმე ყველაფერი გაირკვევაო და გვამის სახლიდან გატანა გადაწყვიტა. მან საფლავი ხელახლა ამოთხარა და ძვლების მოგროვება დაიწყო. თუმცა, პირადი საქმეების გამო უმალ რუსთავში გამგზავრება მოუხდა და გვამის ოთახიდან გატანა ვეღარ მოასწრო. აყრილი იატაკის ფიცრები ისევ უბრალოდ დააფარა და ქალაქში წავიდა. მეორე დღეს, მეზობლის ბავშვები ქუჩაში ბურთს თამაშობდნენ. ამ დროს ბურთმა ფანჯარა შეამტვრია და სწორედ იმ ოთახში შევარდა. ბავშვების უსაზღვრო ინტერესი ყველაფრის მიმართ კარგად მოგეხსენებათ და მიყრილი იატაკის ფიცრების ქვეშ მათ ადამიანის თავის ქალა და ძვლები უმალ შენიშნეს... მოსახლეობამ დაუყოვნებლივ დედოფლისწყაროს პოლიციეს აცნობა და ძიება დაიწყო. რომ არა ბავშვები, ხსენებული მკვლელობის შესახებ ვერავინ ვერაფერს გაიგებდა. - აცხადებს დუღაშვილი.
მოგვიანებით პროკურატურამ ქალაქ რუსთავში ნანა ჯამალაშვილის საცხოვრებელი ადგილი დაადგინა და მისი პიროვნების შესწავლა დაიწყო. ის დააკავეს კიდეც, თუმცა საქმე ხანდაზმულობის გამო შეჩერდა, დამნაშავე კი მომხდარის მიუხედავად ჩიტივით თავისუფალი აღმოჩნდა.
ილია მარტყოფლიშვილი
ბესიკ გულაშვილი
"ქიზიყის" მკითხველი ახალი ამბების გასაცნობად სხვა მისამართს უნდა ეწვიოს
ამიერიდან ეს გვერდი მუშაობას წყვეტს. ახალი ამბები შეგიძლიათ იხილოთ განახლებულ და გამარტივებულ ვებ-გვერდზე www.qiziyi.ge ამ გვერდზე, სადაც ახლა იმყოფებით, მხოლოდ აუდიო-რეპორტჟები და პროექტ „კვირის ბოლოს“ რადიოგადაცემების ჩანაწერები დაიდება. ტექსტური ამბების გასაცნობად კი ეწვიეთ ამ მისამართს. http://qiziyi.ge/
როგორც „ქიზიყის“ რედაქტორი ილია მარტყოფლიშვილი ამბობს, ახალ მისამართზე გაცილებით მეტი ინფორმაცია განთავსდება, ვიდრე აქამდე ხდებოდა. ინფორმაციების განახლების ინტენსივობა და ოპერატიულობაც გაუმჯობესდება. ძველ ვერსიაზე ამბები მხოლოდ იმ შემთხვევაში განახლდება, თუ ვებ-გვერდის ახალ ვერსიაზე ტექნიკური ხარვეზი შეიქმნება.
ასე რომ, აკრიფეთ ახალი მისამართი და გაიგეთ უფრო მეტი: http://qiziyi.ge/
ივანიშვილის პარტია დედოფლისწყაროელებს 2 ივნისს შეხვდება
ქართველი მეცენატის, ბიძინა ივანიშვილის კოალიცია „ქართული ოცნების“ მიერ 24 მაისს დედოფლისწყაროს მუნიციპალიტეტის მოსახლეობასთან დაგეგმილი შეხვდრა გადაიდო. პარტიის ლიდერების შეხვედრა დედოფლისწყაროს კულტურის სახლის შენობაში ხუთშაბათს იგეგმებოდა.
როგორც კოალიცია „ქართული ოცნების“ დედოფლისწყაროს შტაბის ხელმძღვანელმა ალექსანდრე თამაზაშვილმა „ქიზიყს“ განუცხადა, შეხვედრა კულტურის სახლის დარბაზში 2 ივნისს გაიმართება. მისი თქმით, შეხვედრის გადადება თბილისში 27 მაისს დაგეგმილმა აქციამ განაპირობა.
ლექსო თამაზაშვილის განცხადებით, თავდაპირველად დედოფლისწყაროში დარბაზის დაქირავებაზე დაბრკოლება შეექმნათ, თუმცა საბოლოო ჯამში მუნიციპალიტეტის კულტურისა და სპორტის ცენტრმა ხელშეკრულების გაფორმებაზე თანხმობა განაცხადა:
„უარის შემთხვევაში სხვა ალტერნატიული ვარიანტებიც გვქონდა, თუმცა საბოლოო ჯამში დაგვთანხმდნენ. არ ვიცი რატომ, მაგრამ ფაქტია, რომ დარბაზი დაგვითმეს,“ - აცხადებს თამაზაშვილი.
დედოფლისწყაროს კულტურისა და სპორტის ცენტრის უფროსი ვანო შანშიაშვილი „ქიზიყთან“ საუბარში ადასტურებს, რომ 24 მაისისთვის კოალიციასთან ხელშეკრულება უკვე დადებულია. ის ამბობს, რომ დარბაზის დაქირავებნაზე ივანიშვილის პოლიტიკურ ჯგუფს მათი მხრიდან პრობლემა არ შექმნია.
„ქართული ოცნების“ წარმომადგენლები დედოფლისწყაროელებს შეხვედრაზე დასწრებისკენ მოუწოდებენ. /ქიზიყი/
გამოხმაურება მედიაში
ლევან ბაღაშვილმა ია სეხნიაშვილის დასაქმებასთან დაკავშირებით განმარტება გააკეთა
სასამართლომ დაკავებულ სამ არასრულწლოვანს განაჩენი გამოუტანა
დედოფლისწყაროს ცენტრში შადრევანისთვის 17 000 ლარი გამოიყო
"ლეიბორისტების" მტკიცებით, კირქვის საამქრო დედოფლისწყაროს მოსახლეობას სერიოზულ ზიანს აყენებს
თეთრაული ჟურნალისტ ილია მარტყოფლიშვილისგან მორალური ზიანის ანაზღაურების მიზნით 10 000 ლარს ითხოვს
პარ
კომპანია, რომელმაც დედოფლისწყაროს მრავალბინიანი კორპუსები გადახურა 110 719 ლარით დაჯარიმდა
გიული ალასანია ზემო მაჩხაანში ექსმინისტრ ჭიპაშვილის ოჯახში იმყოფებოდა
რისთვის ჩამოვიდა პრეზიდენტის დედა დედოფლისწყაროში და რატომ მიიყვანეს ნიკალას მუზეუმში შემოვლითი გზებით?!
სოფელი საქართველოში, სადაც 21-ე საუკუნე ჯერ არ დამდგარა და სადაც პრეზიდენტის დედამ ეს ვერ იგრძნო
სოფელი ზემო მაჩხაანი - არ გეგონოთ, რომ პატარა, უმნიშვნელო დასახლება იყოს. ძალიან დიდი სოფელია, სიღნაღიდან, სიყვარულისა და თანამედროვე სტანდარტების ქალაქიდან, სულ რამდენიმე კილომეტრში, სიმაღლით – მის დონეზე, მის მოპირდაპირე მთაზე შეფენილი, ნიკო ფიროსმანის დედის სოფელი (თავად ფიროსმანის მირზაანიც ამ სოფლის ფაქტობრივი გაგრძელებაა), მიხეილ ჯავახიშვილის დევნილობაში მყოფი ოჯახის თავშესაფარი, ნიკო ყიასაშვილის დაბადების ადგილი. თუმცა ამას რა მნიშვნელობა აქვს. სოფელში ხალხი ცხოვრობს, თანაც, ასობით, და ელექტროენერგიას ისინიც იმავე მიზნით მოიხმარენ, როგორც ჩვენ. დიახ, ცხადია, სოფელს ჰყავს გამგებელი, დეპუტატი – რაიონულ საკრებულოში, მაგრამ, როგორც ამ სოფლის მკვიდრები ამბობენ, ისინი ადგილობრივების პრობლემებით მხოლოდ წინასაარჩევნო პერიოდებში ინტერესდებიან. ჩვენ პირობა მივეცით ამ სოფლის მოსახლეობას, რომ დავიწყებთ ვრცელ ჟურნალისტურ მოკვლევას პრობლემების შესასწავლად. იქამდე კი შევასრულეთ მათი თხოვნა დ იმ მიზეზების გარკვევა ვცადეთ, რომელთა გამო ადამიანები 21-ე საუკუნეში უშუქოდ ატარებენ დღეებს. www.7days.ge
გაზეთი "ახალი 7 დღე" - იხილეთ სტატია ვრცლად>>
სტიქიით დაზარალებულთათვის გამგეობამ მხოლოდ 150 ათასი ლარი გაითვალისწინა
დედოფლისწყაროში სტიქიით მიყენებული ზარალის შემსწავლელი კომისიის თავმჯდომარე ალექსანდრე ალუღიშვილი ამბობს, რომ ბიუჯეტიდან 150 ათასი ლარი გამოიყოფა.
როგორც ინტერნეტ-გაზეთ ქიზიყს დედოფლისწყაროს გამგეობიდან აცნობეს, სპეციალურ კომისიაში მუნიციპალიტეტის ზედამხედველობისა და ინფრასტრუქტურის სამსახურის თანამშრომლები, ასევე სოციალური სამსახურის უფროსი დავით ხიხაძე და მუნიციპალიტეტის გამგებელი ნუკრი შანშიაშვილი შედიან.
ქიზიყმა კომისიის თავმჯდომარისა და წევრების ვინაობა ორკვირიანი მცდელობის შემდეგ გაარკვია, მანამდე კომისიაზე საუბარს რატომღაც ყველა თავს არიდებდა.
დედოფლისწყაროს გამგეობის აპარატის უფროსი ნინო ჩოხელი ქიზიყთან საუბრისას აცხადებს, რომ კომისიის შექმნის თაობაზე ოფიციალური ბრძანება ჯერ არ დაწერილა, თუმცა კომისია სტიქიის დღიდანვე მუშაობს.
Комментариев нет:
Отправить комментарий