понедельник, 7 июня 2010 г.
რატომ განხორციელდა სოფელ გამარჯვებაში სისხლის აღება და როგორ ამოწყდა ოჩიაურების ოჯახი?!...
2003 წლის 18 აგვისტოს გვიან ღამით, მარიამობის დღესასწაულზე დედოფლისწყაროს რაიონის სოფელ გამარჯვების მცხოვრებნი ხანძრის ხმამ გამოაღვიძა. როგორც მოგვიანებით გაირკვა, გამარჯვებაში შემზარავი ტრაგედია დატრიალდა. 36 წლის მერაბ ოჩიაურმა, საკუთარი დედა 71 წლის ნინო ოჩიაური თავში ნაჯახის ჩარტყმით უმოწყალოდ მოკლა. შემდეგ კი დედის დაჩეხილ ცხედარს ბენზინი მიასხა და საკუთარ სახლთან ერთად გადაწვა... საქმეში დედოფლისწყაროს პოლიცია მალევე ჩაერთო, გამოძიება დავით დუღაშვილს დაევალა.
რა მოხდა დედა-შვილის ურთიერთობაში? რატომ გაიმეტა შვილმა მშობელი დედა სასიკვდილოდ? დეტალების გასარკვევად გაზეთი ქიზიყი გარდაცვლილ ნინო ოჩიაურის დას მარიამ გოგოჭურს ესაუბრა.
მარიამ გოგოჭური (გარდაცვლილის და): ,,მერაბი ძალიან ნიჭიერი, განათლებული ახალგაზრდა იყო. მხატვრობისა და ხეზე კვეთის განსაკუთრებული ნიჭი ჰქონდა. მისი ნამუშევრები ნათესავების სახლების კედლებს დღემდე ამშვენებს... მშობლებმა ჩემი დის შვილი სკოლის დამთავრებისთანავე სწავლის გასაგრძელებლად რუსეთში, ჩელიაბინსკში გააგზავნეს. ამის შემდეგ მოვლენები უცნაურად განვითარდა. მერაბმა მშობლებთან, ძმასთან და ახლობლებთან, რატომღაც, ყოველგვარი კავშირი გაწყვიტა. 10 წელი ისე გავიდა, არავინ იცოდა სად ცხოვრობდა სამშობლოდან გადახვეწილი მერაბი!. ამასობაში მის ოჯახში დიდი ტრაგედია დატრიალდა. მერაბის მამას ახალგაზრდობაში ხევსური კაცი შემოაკვდა. ხევსურებმა კი მოგეხსენებათ, შურისძიება სისხლის აღებით იციან. მოკლულის შვილი გაიზარდა და გადაწყვიტა ოჩიაურებზე შური ეძია. 1993 წელს მან ვერაგულად მოკლა მერაბის მამა, ქაქუცა ოჩიაური.
თავს დამტყდარი უბედურებიდან 40 დღეც არ იყო გასული, რომ მერაბის უფროსმა ძმამ, ნოდარმა მამის სიკვდილით მიყენებულ ტრაგედიას ვეღარ გაუძლო და საკუთარ ეზოში, ხეზე თავი ჩამოიხრჩო. რადგან მერაბს ოჯახთან კავშირი გაწყვეტილი ჰქონდა, ცხადია არ გაუგია ძმისა და მამის გარდაცვალების ამბავი. - იხსენებს მოკლული ქალბატონის და.
დაქვრივებული, შვილმკვდარი და შვილგადაკარგული მოხუცი ნინო ოჩიაური ტრაგედიის შემდეგ სამი წელი მარტოდმარტო გაჭირვებაში ცხოვრობდა და არაფერი იცოდა ერთადერთი ოჯახისწევრის შესახებ. უნუგეშოდ დარჩენილ დედას, მეორე შვილიც გარდაცვლილი ეგონა და ამით ხსნიდა მის ათწლიან გაუჩინარებას.
ყველასგან მოულოდნელად მერაბი სოფელში მეათე წელს დაბრუნდა. როგორც მისი ახლობლები გაზეთ ქიზიყთან საუბრისას იხსენებენ, მერაბი ძალიან განიცდიდა ძმისა და მამის გარდაცვალებას. ნათესავებმა მერაბს უცნაური ცვლილებებიც შეამჩნიეს.
ძალდატანების მიუხედავად მერაბი არავის ეუბნებოდა სად და როგორ გაატარა ეს წლები, ან რატომ გაწყვიტა კავშირი სამშობლოსთან.
მარიამ გოგოჭურის ნაამბობით: ,,რუსეთიდან დაბრუნებულ მერაბს უცნაური ქცევები ახასიათებდა. ყველას გვიკრძალავდა იქ გატარებულ იდუმალ წლებზე საუბარს. მოულოდნელად ფსიქოლოგიური გადახრებიც გამოამჟღავნა. ამბობდა, რომ უცხოპლანეტელებთან ამყარებდა კონტაქტს და საქართველოს გადასარჩენად კოსმოსში გაფრენას აპირებდა... ამ დროს საკუთარ თავში ჩაიკეტა, აღარავისთან ურთიერთობდა. ჩემი და, ნინო ძალიან დარდობდა. ვცდილობდით, ერთად გაგვერკვია რა მოხდა რუსეთში, რამაც ახალგაზრდა კაცის ფსიქიკაზე ასე რადიკალურად იმოქმედა. მერაბი ხშირად ატარებდა რაღაც უცნაურ ცდებს, რითიც უცხოპლანეტელების ჩამოყვანას გეგმავდა. ერთხელ, მორიგი ცდის დროს რაღაც აუფეთქდა, რითიც მისი ფსიქიკური გადახრები უფრო გაუარესდა. ამ აფეთქებით ხელი ძლიერად დაიზიანა.
აღსანიშნავია, რომ მიუხედავად მერაბის ძლიერი ფსიქიკური აშლილობისა, მეზობლები მას დადებითად ახასიათებდნენ და აცხადებენ, რომ ხალხის მიმართ აგრესიული არ იყო: ,,მისი ჩხუბი და ყვირილი არავის გაუგონია. პირიქით, მუდმივად მარხვას ინახავდა და ლოცულობდა. ბოლო პერიოდში ხორციან საკვებს საერთოდ არ ეტანებოდა. - აცხადებენ ოჩიაურების მეზობლები.
მერაბის ნათესავებისგან ერთი პარადოქსული ფაქტიც შევიტყვეთ.
დალი გოგოჭური (მერაბის დეიდაშვილი): ,,მერაბს ქათამიც არასოდეს დაუკლავს, რომ გვეთხოვა მუდმივად უარს მივიღებდით. ამბობდა - ამ ცოდვას ვერ დავიდებო...
კიდევ ერთი პარადოქსი. სამშობლოში დაბრუნებული მერაბი, ექვსი წლის მანძილზე მშობლის მიმართ განსაკუთრებულ სითბოსა და სიყვარულს ამჟღავნებდა. ავადმყოფ დედას თავად უვლიდა, ნემსებსაც თვითონვე უკეთებდა.
საინტერესოა, რა მოხდა 2003 წლის აგვისტოში ისეთი, რამაც დადა-შვილის ურთიერთობის ტრაგიკულად დასრულება გამოიწვია?!.
2003 წლის 28 აგვისტოს ღამის 2 საათზე ოჩიაურების მეზობლები ცეცხლის ძლიერმა გვრგვინვამ და კვამლის სუნმა გამოაღვიძა. პირველი შეტყობინება დედოფლისწყაროს სახანძრო სამსახურში შევიდა. მაშველებმა ხანძრის ლიკვიდაცია მალევე მოახერხეს. ისინი განადგურებულ სახლში შევიდნენ და....
როგორც დედოფლისწყაროს ხანძარსაწინააღმდეგო სამსახურის იმჟამინდელი უფროსი ვაჟა მარტყოფლიშვილი გაზეთ ქიზიყთან საუბარში იხსენებს, გადამწვარ შენობაში ნინო ოჩიაურის დამწვარი გვამი თავდაპირველად სწორედ მეხანძრეებს აღმოუჩენიათ.
გვამის შენობაში აღმოჩენამდე ხანძრის გამომწვევ მიზეზად საყოფაცხოვრებო ფაქტორი სახელდებოდა. მაგრამ, მოგვიანებით მეზობლებსაც გაახსენდათ, რომ იმ დღისით მერაბმა 5 ლიტრი ბენზინი სპეციალურად შეიძინა და თან გაურკვეველი მისამართით იმუქრებოდა.
მოგვიანებით გაირკვა, რომ დედა-შვილი მთელი დღის მანძილზე კამათობდა. თურმე ის მოხუცს ფულს სთხოვდა. ქალის შემოსავალი კი პენსიის სახით მხოლოდ 14 ლარს შეადგენდა, შესაბამისად მერაბის მოთხოვნა ვერ შეასრულა და...
დედოფლისწყაროს პოლიციამ საქმის შესწავლა ადგილზე დაიწყო. აღმოჩნდა, რომ დამნაშავე ეზოში ხეზე ასულიყო და მშვიდად ადევნებდა თვალყურს, თუ როგორ იწვოდა მშობელი დედა ალმოდებულ სახლში.
მერაბ ოჩიაური მაშინვე დააკავეს. მან ჩადენილი დანაშაული აღიარა. თუმცა, როცა გამოძიებამ მისი ფსიქიკური მდგომარეობა შეისწავლა, მკვლელი თბილისში, ფსიქიატრიულ საავადმყოფოში იქნა გადაყვანილი. როგორც ქიზიყმა გაარკვია, ბოროტმოქმედმა ფსიქიატრიულიდან გაქცევაც მალე მოახერხა...
ილია მარტყოფლიშვილი
"ქიზიყის" მკითხველი ახალი ამბების გასაცნობად სხვა მისამართს უნდა ეწვიოს
ამიერიდან ეს გვერდი მუშაობას წყვეტს. ახალი ამბები შეგიძლიათ იხილოთ განახლებულ და გამარტივებულ ვებ-გვერდზე www.qiziyi.ge ამ გვერდზე, სადაც ახლა იმყოფებით, მხოლოდ აუდიო-რეპორტჟები და პროექტ „კვირის ბოლოს“ რადიოგადაცემების ჩანაწერები დაიდება. ტექსტური ამბების გასაცნობად კი ეწვიეთ ამ მისამართს. http://qiziyi.ge/
როგორც „ქიზიყის“ რედაქტორი ილია მარტყოფლიშვილი ამბობს, ახალ მისამართზე გაცილებით მეტი ინფორმაცია განთავსდება, ვიდრე აქამდე ხდებოდა. ინფორმაციების განახლების ინტენსივობა და ოპერატიულობაც გაუმჯობესდება. ძველ ვერსიაზე ამბები მხოლოდ იმ შემთხვევაში განახლდება, თუ ვებ-გვერდის ახალ ვერსიაზე ტექნიკური ხარვეზი შეიქმნება.
ასე რომ, აკრიფეთ ახალი მისამართი და გაიგეთ უფრო მეტი: http://qiziyi.ge/
ივანიშვილის პარტია დედოფლისწყაროელებს 2 ივნისს შეხვდება
ქართველი მეცენატის, ბიძინა ივანიშვილის კოალიცია „ქართული ოცნების“ მიერ 24 მაისს დედოფლისწყაროს მუნიციპალიტეტის მოსახლეობასთან დაგეგმილი შეხვდრა გადაიდო. პარტიის ლიდერების შეხვედრა დედოფლისწყაროს კულტურის სახლის შენობაში ხუთშაბათს იგეგმებოდა.
როგორც კოალიცია „ქართული ოცნების“ დედოფლისწყაროს შტაბის ხელმძღვანელმა ალექსანდრე თამაზაშვილმა „ქიზიყს“ განუცხადა, შეხვედრა კულტურის სახლის დარბაზში 2 ივნისს გაიმართება. მისი თქმით, შეხვედრის გადადება თბილისში 27 მაისს დაგეგმილმა აქციამ განაპირობა.
ლექსო თამაზაშვილის განცხადებით, თავდაპირველად დედოფლისწყაროში დარბაზის დაქირავებაზე დაბრკოლება შეექმნათ, თუმცა საბოლოო ჯამში მუნიციპალიტეტის კულტურისა და სპორტის ცენტრმა ხელშეკრულების გაფორმებაზე თანხმობა განაცხადა:
„უარის შემთხვევაში სხვა ალტერნატიული ვარიანტებიც გვქონდა, თუმცა საბოლოო ჯამში დაგვთანხმდნენ. არ ვიცი რატომ, მაგრამ ფაქტია, რომ დარბაზი დაგვითმეს,“ - აცხადებს თამაზაშვილი.
დედოფლისწყაროს კულტურისა და სპორტის ცენტრის უფროსი ვანო შანშიაშვილი „ქიზიყთან“ საუბარში ადასტურებს, რომ 24 მაისისთვის კოალიციასთან ხელშეკრულება უკვე დადებულია. ის ამბობს, რომ დარბაზის დაქირავებნაზე ივანიშვილის პოლიტიკურ ჯგუფს მათი მხრიდან პრობლემა არ შექმნია.
„ქართული ოცნების“ წარმომადგენლები დედოფლისწყაროელებს შეხვედრაზე დასწრებისკენ მოუწოდებენ. /ქიზიყი/
გამოხმაურება მედიაში
ლევან ბაღაშვილმა ია სეხნიაშვილის დასაქმებასთან დაკავშირებით განმარტება გააკეთა
სასამართლომ დაკავებულ სამ არასრულწლოვანს განაჩენი გამოუტანა
დედოფლისწყაროს ცენტრში შადრევანისთვის 17 000 ლარი გამოიყო
"ლეიბორისტების" მტკიცებით, კირქვის საამქრო დედოფლისწყაროს მოსახლეობას სერიოზულ ზიანს აყენებს
თეთრაული ჟურნალისტ ილია მარტყოფლიშვილისგან მორალური ზიანის ანაზღაურების მიზნით 10 000 ლარს ითხოვს
პარ
კომპანია, რომელმაც დედოფლისწყაროს მრავალბინიანი კორპუსები გადახურა 110 719 ლარით დაჯარიმდა
გიული ალასანია ზემო მაჩხაანში ექსმინისტრ ჭიპაშვილის ოჯახში იმყოფებოდა
რისთვის ჩამოვიდა პრეზიდენტის დედა დედოფლისწყაროში და რატომ მიიყვანეს ნიკალას მუზეუმში შემოვლითი გზებით?!
სოფელი საქართველოში, სადაც 21-ე საუკუნე ჯერ არ დამდგარა და სადაც პრეზიდენტის დედამ ეს ვერ იგრძნო
სოფელი ზემო მაჩხაანი - არ გეგონოთ, რომ პატარა, უმნიშვნელო დასახლება იყოს. ძალიან დიდი სოფელია, სიღნაღიდან, სიყვარულისა და თანამედროვე სტანდარტების ქალაქიდან, სულ რამდენიმე კილომეტრში, სიმაღლით – მის დონეზე, მის მოპირდაპირე მთაზე შეფენილი, ნიკო ფიროსმანის დედის სოფელი (თავად ფიროსმანის მირზაანიც ამ სოფლის ფაქტობრივი გაგრძელებაა), მიხეილ ჯავახიშვილის დევნილობაში მყოფი ოჯახის თავშესაფარი, ნიკო ყიასაშვილის დაბადების ადგილი. თუმცა ამას რა მნიშვნელობა აქვს. სოფელში ხალხი ცხოვრობს, თანაც, ასობით, და ელექტროენერგიას ისინიც იმავე მიზნით მოიხმარენ, როგორც ჩვენ. დიახ, ცხადია, სოფელს ჰყავს გამგებელი, დეპუტატი – რაიონულ საკრებულოში, მაგრამ, როგორც ამ სოფლის მკვიდრები ამბობენ, ისინი ადგილობრივების პრობლემებით მხოლოდ წინასაარჩევნო პერიოდებში ინტერესდებიან. ჩვენ პირობა მივეცით ამ სოფლის მოსახლეობას, რომ დავიწყებთ ვრცელ ჟურნალისტურ მოკვლევას პრობლემების შესასწავლად. იქამდე კი შევასრულეთ მათი თხოვნა დ იმ მიზეზების გარკვევა ვცადეთ, რომელთა გამო ადამიანები 21-ე საუკუნეში უშუქოდ ატარებენ დღეებს. www.7days.ge
გაზეთი "ახალი 7 დღე" - იხილეთ სტატია ვრცლად>>
სტიქიით დაზარალებულთათვის გამგეობამ მხოლოდ 150 ათასი ლარი გაითვალისწინა
დედოფლისწყაროში სტიქიით მიყენებული ზარალის შემსწავლელი კომისიის თავმჯდომარე ალექსანდრე ალუღიშვილი ამბობს, რომ ბიუჯეტიდან 150 ათასი ლარი გამოიყოფა.
როგორც ინტერნეტ-გაზეთ ქიზიყს დედოფლისწყაროს გამგეობიდან აცნობეს, სპეციალურ კომისიაში მუნიციპალიტეტის ზედამხედველობისა და ინფრასტრუქტურის სამსახურის თანამშრომლები, ასევე სოციალური სამსახურის უფროსი დავით ხიხაძე და მუნიციპალიტეტის გამგებელი ნუკრი შანშიაშვილი შედიან.
ქიზიყმა კომისიის თავმჯდომარისა და წევრების ვინაობა ორკვირიანი მცდელობის შემდეგ გაარკვია, მანამდე კომისიაზე საუბარს რატომღაც ყველა თავს არიდებდა.
დედოფლისწყაროს გამგეობის აპარატის უფროსი ნინო ჩოხელი ქიზიყთან საუბრისას აცხადებს, რომ კომისიის შექმნის თაობაზე ოფიციალური ბრძანება ჯერ არ დაწერილა, თუმცა კომისია სტიქიის დღიდანვე მუშაობს.
Комментариев нет:
Отправить комментарий