რიგები ქარხანასთან და დაღვრილი საფერავი

შაბათს, 10 სექტემბერს, 00:05 საათზე, კახეთის საინფორმაციო ცენტრს დედოფლისწყაროს რაიონის სოფელ სამთაწყაროდან დაუკავშირდნენ. მევენახეებმა აღნიშნეს, რომ წნორში, ღვინის ქარხანასთან, საფერავით დატვირთული 18 სატვირთო მანქანა საღამოს 8 საათიდან იდგა, თუმცა ყურძენს არ იღებდნენ. ძარებიდან წვენი იღვრებოდა. ბოლო ინფორმაციით, წნორის ღვინის ქარხანასთან 2 დღეა 15-მდე მანქანაა გაჩერებული და ყურძენს ისევ არ იბარებენ.
„საღამოს 8 საათიდან იქ არიან და ყურძენს არ იბარებენ. რთველის საკოორდინაციო შტაბის წარმომადგენელმა ყურძენი დაიწუნა და უთხრა, რომ 20 თეთრად თუ უნდოდათ, ჩაიბარებდნენ, ოღონდ ვერც ვაუჩერს გასცემდნენ. ხალხმა აღარ იცის რა ქნას. აქ რომ მოვკრიფეთ მუშებს ფული გადავუხადეთ, მანქანას ყურძენი რომ წაეღო სამთაწყაროდან წნორში, 200 ლარი მივეცით, ამხელა გზაზე ჩავიტანეთ და ახლა არ იბარებენ“, - გვაცნობა სამთწყაროს მცხოვრებმა.
მის მიერ მოცემულ ნომერზე წნორის ღვინის ქარხანასთან მყოფ მევენახეებს დავუკავშირდით.
იხილეთ ვრცლად>>


„შტაბის წარმომადგენელი ამირან ოქროშიძე ძარაზე ავიდა, 2-3 მტევანი ყურძენი მიწაზე გადმოყარა და თქვა, ამ ყურძენს არ მივიღებთ, შერეულიაო. სამთაწყაროში საფერავს „კაბერნეც“ ურევია, მაგრამ „კაბერნე“ წინასწარ გამოვკრიფეთ, რომ შერეული არ ყოფილიყო. მიუხედავად ამისა, მაინც ამბობენ, შერეულია, თუ გინდათ 20 თეთრად ჩავიბარებთ და ვაუჩერს ვერ მოგცემთო. დაგვცინიან. ოთხი საათია ლუდს სვამენ. ამდენი ხალხი კიდევ გარეთ ვართ და ველოდებით. არ ვიცით, რა ვქნათ. სად წავიდეთ, ვის მივმართოთ“, - განაცხადა სამთაწყაროელმა მევენახემ, გიორგი ბერიძემ.
„ყურძნის კრეფას დილის 5 საათზე ვიწყებთ, გარიჟრაჟზე. ერთ სატვირთო მანქანას 4-5 გლეხი ვქირაობთ. ერთი გლეხის ყურძენს რომ შევაყრით, მანქანა ვენახიდან სოფელში მიდის, სასწორზე რომ აიწონოს, მერე მეორე გლეხის ვენახში გადადის, მერე ისევ სასწორზე და ა.შ. ამ პროცესს მთელი დღეს სჭირდება. საღამოს სოფლიდან გამოვდივართ და გზა, რომელიც სოფელ ხირსაზე გადის, იმდენად უვარგისია, რომ ყურძენი იჭყლიტება და წვენი გასდის. ძარებს კი ვამაგრებთ შეძლებისდაგვარად, მაგრამ წვენი მაინც იღვრება. კიდევ აქ რომ გვაჩერებენ 4 – 5 საათი, უფრო მეტად ვზარალდებით“, - გვითხრა თამაზ საკანელიშვილმა.
00:45 საათზე კახეთის საინფორმაციო ცენტრის კორესპონდენტები წნორში ჩავედით. როგორც კი გადაღება დავიწყეთ, ღვინის ქარხანამ ყურძნის მიღება დაიწყო.
რთველის საკოორდინაციო შტაბის წარმომადგენელს, სოფლის მეურნეობის სამინისტროს გენერალური ინსპექციის თანამშრომელს, ამირან ოქროშიძეს გამოველაპარაკეთ.
- ბატონო ამირან, ყურძენს რატომ არ იღებდით?
- ვინ გითხრათ? აბა ეს რა არის?
- ახლა დაიწყეთ მიღება, მანამდე გლეხები ოთხი საათის განამვლობაში ილოდებოდნენ, თქვენ კი, როგორც მათ აღნიშნეს, უთხარით, რომ ყურძენს 20 თეთრად ჩაიბარებდით.
- ტყუილია, ყურძენს უპრობლემოდ ვიბარებთ. ცარიელი ღეროა. წყალი არ ჰქონდათ, ვერ მორწყეს და უხარისხო ყურძენია. ნახეთ, რამდენი ჭაჭა აქვს. მიუხედავად ამისა, მაინც უპრობლემოდ ვიბარებთ.
- უპრობლემოდ თუ იბარებთ, საღამოს 8 საათიდან ამდენი მანქანა რიგში რატომ დგას?

ამირან ოქროშიძე დაგვშორდა. დაახლოებით 25 წუთში, ღვინის ქარხანაში რთველის საკოორდინაციო შტაბის უფროსი ტარიელ გაბუნია მოვიდა.
- ბატონო ტარიელ, მევენახეებს რატომ სთავაზობთ რომ ყურძენი 20 თეთრად ჩააბარონ?
- ჩვენ არაფერს ვთავაზობთ. ყურძენი თუ შერეულია, ანუ მხოლოდ საფერავი არ არის, საწარმო თვითონ ადგენს ფასს, ჩვენ ასეთ ყურძენზე ვაუჩერს ვერ გავცემთ.
- ამ ღვინის ქარხანაზე ყურძენს რომელი საწარმო იბარებს?
- კომპანია „გრუზვინპრომი“.
- ეს სახელმწიფო კომპანიაა ხომ?
- დიახ.
18 მანქანა ყურძნის ჩაბარების პროცესი დილის 5 საათამდე გაგრძელდა. ღვინის ქარხნის და შტაბის წარმომადგენლებმა მხოლოდ ერთ მანქანაზე აღმოაჩინეს შერეული ყურძენი და 30 თეთრად ჩაიბარეს, ვაუჩერის გარეშე. ყურძენი სიღნაღის რაიონის სოფელ ჯუგაანის მკვიდრს ეკუთვნოდა. „იციან, რომ სამთაწყაროელებს საფერავი მოაქვთ და ამ დროს, ცდილობენ, შემოგვაპარონ“, - განმარტა ოქროშიძემ.
დღეს, დილით, სამთაწყაროელმა მევენახეებმა ისევ დაგვირეკეს. გლეხები მთელი ღამის განმავლობაში წნორის ღვინის ქარხანასთან იდგნენ.
„2 დღეა წნორის ღვინის ქარხანაში 15-მდე მანქანაა გაჩერებული. ყურძენს წვენი გასდის. ჩვენი სოფლის ყურძენს იწუნებენ. თუ სხვა სოფლებიდან მოტანილ ყურძენს 6 მანქანას ჩაიბარებენ, ჩვენსას ერთს ძლივს იღებენ. გაურკვეველ მდგომარეობაში ვართ. რა გავაკეთოთ არ ვიცით. აქ დგომაში ვენახები დასაკრეფი გვრჩება და ყურძენი ვაზზე ჭკნება“, - განუცხადა კახეთის საინფორმაციო ცენტრს სამთაწყაროელმა მევენახემ, რეზო ანანიძემ.
„რა სისულელეა, საიდან მოიტანეს? წნორის ღვინის ქარხანა სამთაწყაროდან დღეში 120 ტონა ყურძენს იბარებს. ქარხანა 24 საათიან რეჟიმში მუშაობს. მე ახლაც აქ ვარ და ყველაფერი ნორმალურადაა“, - აღნიშნა რთველის საკოორდინაციო შტაბის უფროსმა ტარიელ გაბუნიამ.
კახეთის საინფორმაციო ცენტრი დღეიდან რთველის მონიტორინგს იწყებს.

ნატალია სარქისაშვილი | კახეთის საინფორმაციო ცენტრი