მსახიობი ლევან ყოჩიაშვილი დედოფლისწყაროში დაიბადა და გაიზარდა

EXCLUSIVE - თავდაცვის სამინისტროს მიერ შექმნილი ტელეკომპანია „საქართველო“, რომელიც ძირითადად სამხედრო შინაარსის გადაცემებს ამზადებს ამიერიდან ტელეკომპანია „რუსთავი 2“–ის შემადგენლობაში გადავიდა. ამის შესახებ ამ ტელეკომპანიების ცნობილი ხმა, მსახიობი ლევან ყოჩიაშვილი გაზეთ „შირაქისთვის“ მიცემულ ექსკლუზიურ ინტერვიუში საუბრობს.
„ჩემი ძირითადი სამსახური ახლა ტელეკომპანია „საქართველოშია“, რომელიც ადრე თავდაცვის სამინისტროს არხი იყო, ახლა კი ეს ტელევიზია „რუსთავი2“-ს ექვემდებარება. ასევე ვთანამშრომლობ სარეკლამო სააგენტოებთანაც. საკმაოდ დატვირთული დღის რეჟიმი მაქვს. სულ ვმოძრაობ. ასეა, ახლა ქართველ ხელოვანთა დიდი ნაწილი მოკრძალებულად ცხოვრობს,“ – აღნიშნავს ყოჩიაშვილი.

ის ტელეკომპანია „რუსთავი2“–ის პოპულარულ სერიალში „ჩემი ცოლის დაქალები“ ერთ–ერთ მთავარ როლს ასრულებს.

დათო, მისი ცოლი და ცოლის დაქალები

უკვე რა ხანია, სერიალების მოყვარული ტელემაყურებელი მოუთმენლად ელის "რუსთავი 2"_ზე შაბათს, საღამოს 10 საათზე, ქართული სერიალის " ცოლის დაქალების" დაწყებას, რომელმაც პირველი სერიებიდანვე გაამართლა ხანგრძლივი ანონსებით გამოწვეული ინტერესი. ქართული ხასიათი, ტრადიციები, ზნე_ჩვეულებები და რეალური ცხოვრებიდან აღებული სიუჟეტები მაყურებლის გემოვნებაში ჯდება და აღძრავს ინტერესს, მოუთმენლად დაელოდოს მომდევნო სერიას. დროც ნორმალური აქვს შერჩეული _ მთელი დღის და საღამოს განმავლობაში ათასი ჯურის ტელესერიალებით თავმობეზრებული და გაღიზიანებული ამ სერიალის ყურებით გუნებას გამოიკეთებ. დამშვიდდები და ნასიამოვნები დაიძინებ იმ იმედით, რომ ჯერ კიდევ შეგვრჩა ქართული ზნეობა, მეობა, ნორმა, ფორმა და წონა_ზომა.

ახალი ქართული სერიალი "ჩემი ცოლოს დაქალებია”. ეს სერიალი არც ერთი საზღვარგარეთული პროექტის ანალოგი არ გახლავთ. იგი ქეთი დევდარიანის და მიშა მშვილდაძის სცენარითაა, რეჟისორი კი გიორგი ლიფონავა. ოთხი მთავარი გმირის: დათოს, მისი ცოლის ნინას და ცოლის ორი დაქალის კატოს და თინას გარშემო ტრიალებს ამბავი. დათოს როლს ლევან ყოჩიაშვილი ასრულებს. ზოგიერთმა თქვენთაგანმა ალბათ იცის, ვინ არის ლევან ყოჩიაშვილი. უმრავლესობა კი გუმანით ხვდება, რომ ის ჩვენებურია. დღეს თქვენს ცნობისმოყვარეობას დავაკმაყოფილებთ და ძირფესვიანად გაგაცნობთ ამ ახალგაზრდა კაცს, მის წარმომავლობას, განვლილ დედულეთში _ ქ. წყალტუბოში. იმის გამო, რომ დედამისი, ექიმი მარინა ქორიძე, მაშინ რაიონის მთავარი ექიმის მოადგილე გახლდათ სამკურნალო დარგში და ძალიან დაკავებული იყო სამსახურებრივად, ამასთან, უფროსი ვაჟი პავლეც სულ რაღაც 2-3 წლის იყო, ლევანი წყალტუბოში პაპა–ბებიასთან მერი კუპრაძესთან და პავლე ქორიძესთან იზრდებოდა. მერი ბებია ბიო–ქიმიკოსი იყო, ხოლო პავლე ბაბუა წყალტუბოს რაიონის მთავარი ექიმი, რაც იმის გარანტიას აძლევდა ახალგაზრდა მშობლებს, რომ შვილი საიმედო ხელში ჰყავდათ დატოვებული. ორიოდ წელში ლევანმაც ყოჩიაშვილების ფუძეზე გადმოინაცვლა და მაყვალა ბებიას და გიორგი პაპას მეურვეობას "დაექვემდებარა".
_ ჩემი მშობლების ორივე ოჯახს დიდი წვლილი მიუძღვით ჩემი და ჩემი ძმების (ლევანი უცროსი ძმა ირაკლიც ჰყავს) აღზრდაში და ჩამოყალიბებაში, რადგან ჩემი მშობლები სულ მუდამ დაკავებული იყვნენ სამსახურებრივად. მეშვიდე კლასამდე სოფელ წითელწყაროს რუსულ სკოლაში ვსწავლობდი, შემდეგ ქ. წითელწყაროს #1 საშუალო სკოლაში გადმოვედი და ეს სკოლა დავამთავრე. ვსწავლობდი საშუალოდ, არც თითით საჩვენებელი ვყოფილვარ და არც ჩამორჩენილი. ძალიან მიყვარდა მხატვრული ლიტერატურის კითხვა, რაც პავლე პაპას დამსახურებაა, ის არა მარტო ცნობილი ექიმი, არამედ ძალიან განათლებული პიროვნება იყო. გვიყვარდა ფილმების ყურება, სამი ძმა ვიყავით და ვიკლებდით სახლ_კარს _ გვიყვება ლევანი თავის ბავშვობას.
_ მსახიობების სურვლი საიდან გაგიჩნდა?
_ როგორც ჩანს, ხელოვანის სული ჩემში მამის გენს უფრო უკავშირდება. ბიძაჩემი, ვალერი ყოჩიაშვილი, რომელიც ვორონეჟში ცხოვრობს, ოპერის თეატრის მთავარი მხატვარია, ხატვა მამაჩემსაც ეხერხება, მისი რამდენიმე საინტერესო ტილო გვაქვს ზეთის საღებავით შესრულებული. რაც შეეხება მსახიობობას, ეს უფრო მაყვალა ბებიას "დამსახურებაა". ის ძალიან არტისტული, პრანჭია ქალი იყო, თუმცა, გიორგი პაპაც არ ჩამოუვარდებოდა. სიმართლე გითხრათ, თავიდან მსახიობობაზე არც მიფიქრია, კინორეჟისორობაზე ვოცნებობდი. კინოსარეჟისორო ფაკულტეტზე ოთხ წელიწადში ერთხელ იყო აბიტურიენტების მიღება. მოხდა ისე, რომ, როცა დავამთავრე, მიღება არ იყო, მაგრამ იმდენად მინდოდა, რომ სხვაგან არც მიცდია ბედი. ერთი წელი მოვემზადე და სამსახიობოზე ჩავაბარე იმ იმედით, რომ შემდგომში გადავიტანდი სარეჟისოროზე, მაგრამ არ მომიხერხდა. მოვხვდი ანზორ ქუთათელაძის ჯგუფში და მერე, ხომ გაგიგონიათ სცენის მტვერის ამბავი… თითქოს ბანალურია, მაგრამ ნამდვილად ასეა. მიუხედავად იმისა, ძალიან რთული წლები იყო, არც დენი, არც გაზი, არც ტრანსპორტი... მაინც საინტერესო იყო ჩვენი ცხოვრება. III კურსიდან წაგვიყვანეს მეტეხის თეატრში და კარგა ხანს დავრჩით. სადიპლომო სპექტაკლიც იქ მქონდა. ეს იყო ენრიკო გარსია ლორკას "სისხლიანი ქორწილი", სადაც მამის როლს ვთამაშობდი. თეატრის სამხატვრო ხელმძღვანელი სანდრო მრევლიშვილი იყო. ან მარსაც პარნეს "მატყუარა" და მე "წეროსანი" ვითამაშე.

ასე დაიწყო ლევან ყოჩიაშვილის თეატრალური ცხოვრება. მერე იყო თეატრი. "გლობუსი" ისევ სანდრო მრევლიშვილის ხელმძღვანელობით. დიდად გამიმართლა თემურ ჩხეიძეს სახელოსნოში რომ მოვხვდიო, ამბობს ლევანი. ოთხი სეზონი "სამეფო უბნის" თეატრში გაატარა. დიდი ქალბატონის მედეა ჩახავას გვერდით უწევდა თამაში, მაგრამ როცა ბატონმა თემურ ჩხეიძემ საქართველოდან წასვლა გადაწყვიტა, ქალბატონმა მედეამაც შეწყვიტა კავშირი ამ თეტრთან, ამან ხიბლი დაუკარგა თეატრს. ალტერნატიული გზის ძებნა იყო საჭირო, ისეთის მატერიალურ მდგომარეობასაც რომ გააუმჯობესებდა. ამიტომ შეაღო ტელევიზიის კარი და დაიწყო გახმოვანების უჩინარი, მაგრამ საინტერესო საქმიანობა, რომელსაც გემო თეატრში მუშობისას I არხზე გაუსინჯა. ეს არის შემოქმედებითი პროცესი, რომელსაც მრავალმხრივი ყურადღება და მობილიზება სჭირდება. შორიდან შეიძლება ადვილი ჩანს, მაგრამ ეს საკმაოდ რთული პროცესია. თუმცა, თუ ერთი ალღო აუღე, ძნელად შეელევი. პირველად დოკუმენტური ფრანგული ფოლმებით დაიწო, მერე მულტფილმები, მერე ლათინური და არგენტილური სერიალები..
_ ლევან, როგორ ეგუები იმ უხამს დიალოგებს, რომლებიც ამ დაბალი დონის სერიალებში არცთუ იშვიათად გვხვდება?
_ ჩემი ცხოვრების წესით და გაზრდილობითაც უფრო აზიატი ვარ, ქართული ტრადიციები და ზნე_ჩვეულებები ჩემთვის სისხლისმიერი ფასეულობებია. ამიტომ, სულაც არ ვეთანხმები და არც მე მომწონს ის, რაც უმრავლესობას არ მოსწონს, მაგრამ ეს სამუშაოა... ისე, ხშირად ყოფილა შემთხვევა, რაიმე ფრაზა ან სიტყვა რომ შემიცვლია, რადგან შინაგან დისკომფორტს და უხერხულობას ვგრძნობ მათი წამოთქმისას.
_ რა აზრის ხარ მხატვრულ ფილმებზე სუბტიტრების შემოღებასთან დაკავშირებით?
_ მიმაჩნია, რომ ფილმის გახმოვანება ასგზის უკეთესია მაყურებლისათვის. ხალხი წვალობს - ტიტრი წაიკითხოს თუ ფილმის მსვლელობას ადევნოს თვალი?! არ მგონია, ამ მეთოდით ვინმემ ინგლისური ენა ისწავლოს. ზოგადად, ამ მეთოდმა ამ კუთხით სამუშაო შეამცირა. დღეს ყველაზე მომებიანი ვიდეორგოლების, რეკლამების გახმოვანებაა.
_კინოში როგორ მოხვედი?
_ კინოში ცოტა გვიან, 2006 წელს გადამიღო რეჟისორმა ლევან თუთბერიძემ. აკა მორჩილაძის პიესის მიხედვით გადაღებულ ფილმში "ქაღალდის ტყვია" უშიშროების ოფიცრის როლს ვთამაშობდი. შემდეგ გიორგი ლოფონავას სერიალში "კლინიკა" გამომცემლობის მთავარი რედაქტორის როლი მერგო, ვითამაშე "ნაფიცი მსაჯულების" სამსერიან ფილმში, მას გახმაურებული კომედია "ჭამა და სექსი" მოჰყვა, რომელმაც გამოსვლისთანავე დიდი აჟიოტაჟი გამოიწვია. საერთოდ, კინოში თამაში უფრო რთულია, რეჟისორმა შეიძლება პირველ რიგში ფილმის დასასრული გადაიღოს. აქ სიუჟეტს არ მიჰყვები, თეატრი კი შემოქმედებითად ერთი მთლიანობაა. ემოციური განწყობა უფრო ადვილია. გულდასაწყვეტია, რომ ტელევიზიამ ჩაყლაპა თეატრი. მართალია, თეატრალური კაფიებიც გაკეთდა, მაინც ის კომფორტული და ამაღლებული შეგრძნება, რაც თეატრს აქვს, შეუცვლელია. ხალხი ნაკლებად დადის თეატრში, არადა, თეატრში წასვლა ერთი ლამაზი რიტუალი იყო ადამიანის ცხვრებში.
_ ახლა "ჩემი ცოლის დაქალებზე" ვისაუბროთ.
_ ო, ეს სერიალი ძალიან მომწონს. ხალისით ვმუშაობ მასზე. ძალიან კარგი პარტნიორები მყავს. ზაფხულში დაიწყო მსახიობთა შერჩევა. მე კასტინგი არ გამივლია, პირდაპირ ამიყვანეს. მუშაობა ჯერჯერობით პარალელურ რეჟიმში მიდის, გვინდა, რამდენიმე სერიით გავუსწროთ. ახლა ყველა არხი დატვირთულია სერიალებით და გასართობი შოუებით. კონკურენციის მომენტი ნამდვილად არის. ჩვენი უპირატესობა ის არის, რომ ეს სერიალი კინოს პრინციპით გადაიღება, აქ არ არის დარბაზი და მისი ემოციები, სადაც თეატრალური მომენტებბი მეტია. ზოგ სტუდიას 300-500 კაციანი დარბაზი აქვს. ტაშითა თუ სიცილით გამოხატული დარბაზის შეფასებები ტელემაყურებელს ხელს უშლის საკუთარი განწყობა შეიქმნას. ჩვენს სერიალში კი მინი კინოს ასოციაციაა, რიტაც მაყურებელი კმაყოფილია. მოვლენები სტუდიის გარეთაც ვითარდება, რაც უფრო სახალისოს ხდის სიუჟეტს. დროც კარგადაა შერჩეული: - შაბათს, საღამოს 10 საათზე.
_ ეს შენი "შვილები" ჯეკო და ტასო სინამდვილეში ვისი შვილები არიან?
_ ისინი სერიოზული კონკურსის პირობებში, ქასთინგის შედეგად შეარჩიეს. ნიჭიერი ბავშვები არიან. მათთან მუშაობა საინტერესოა, ძალიან საყვარლები არიან. ისინი რომელიმე მსახიობის შვილები ან შვილიშვილები არ არიან.
_ ახლა ცოტა შენი პირადი ცხოვრების შესახებაც გვიამბე...
_ ჩემი მეუღლე მარინა ყაჭაშვილიც დედოფლისწყაროელია. ვალიკო ყაჭაშვილისა და რუსუდან ტუხაშვილის უფროსი ქალიშვილია. მის გაზრდაში მისმა ბებიამ, ცნობილმა პედაგოგმა ლილი თაბაგარმა დიდი როლი ითამაშა. ის ინგლისური ენის სპეციალისტია, მაგრამ არ მუშაობს. შვილების აღზრდითაა დაკავებული.

ჩემი ქალიშვილი კესო უკვე 13 წლისაა. პაპის მოსახელე ვასილი ჯერ მხოლოდ 4 წლისაა. ჩვენი მშობლები ძალიან გვიდგანან მხარში, გვეხმარებიან, რისთვისაც მათი მადლობელი ვართ. ჩემი ძირითადი სამსახური ახლა ტელეკომპანია "საქართველოშია", რომელიც ადრე თავდაცვის სამინისტროს არხი იყო, ახლა კი "რუსთავი2"-ს ექვემდებარება. ვთანამშრომლობ სარეკლამო სააგენტოებთანაც. საკმაოდ დატვირთული დღის რეჟიმი მაქვს. სულ ვმოძრაობ. ასეა, ახლა ქართველ ხელოვანთა დიდი ნაწილი მოკრძალებულად ცხოვრობს.

პ.ს. სულ მალე ლევან ყოჩიაშვილს დაბადების 34 წელი უსრულდება, ვულოცავთ და წარმატებებს ვუსურვებთ.

ნაირა გორაშვილი
გაზეთი „შირაქი“

ოპოზიცია მიიჩნევს, რომ გამგეობის სოფლის მეურნეობის სამსახური ნაცნობ–მეგობრობის პრინციპით დაკომპლექტდა

მოძრაობა "თავისუფალი საქართველოს" დედოფლისწყაროს ორგანიზაციის ხელმძღვანელის მტკიცებით , "დედოფლისწყაროს მუნიციპალიტეტში კუდ-ის თანამშრომლების ნეპოტიზმი გრძელდება". გურაშვილის ინფორმაციით, "დედოფლისწყაროს რაიონში ყველა სფეროს კონსტიტუციური უსაფრთხოების დეპარტამენტის ადგილობრივი თანამშრომლები მართავენ". პოლიტიკურ მოძრაობას არგუმენტად გამგეობის ახალი სამსახურის პირადი ინტერესებით დაკომპლექტება მოჰყავს. ისინი ირწმუნებიან, რომ დედოფლისწყაროს გამგეობაში სოფლის მეურნეობის განვითარების სამსახური შეიქმნა, რომელიც აქამდე რაიონში არ არსებობდა.

,,23 იანვრიდან ამ სამსახურის უფროსად კუდ-ის კონსულტაციების შემდეგ ილია ნატროშვილის სიძე ილია კვანჭილაშვილი დაინიშნა, რომლის მამა რაიონში ერთ-ერთი მსხვილი ფერმერია და მიწის საკმაოდ სოლიდურ ნაწილს ფლობს. ამავე სამსახურის მთავარ სპეციალისტად კი ილია ნატროშვილის ნათესავი რევაზ ნატროშვილი დაინიშნა.

აღსანიშნავია ის ფაქტი, რომ ილია კვანჭილაშვილი 2003-2006 წლებში გარემოს დაცვისა და ბუნებრივი რესურსების კახეთის რეგიონულ სამმართველოში მუშაობდა. ზუსტად ამ პერიოდში მუნიციპალიტეტში ათასობით ჰექტარი ტყის მასივი უმოწყალოდ აიჩეხა და გაიყიდა. ამის შედეგად კი დედოფლისწყარო გაუდაბნოების პირას მივიდა. უნდა ითქვას, რომ ამ ადამიანმა ჩვენი რაიონის გაუდაბნოების პროცესს ხელი შეუწყო და დარწმუნებული ვართ, რომ იგი მთავრობის კურსს - "ააყვავონ" სოფლის მეურნეობა წარმატებულად გააგრძელებს... გარდა იმისა, რომ ადგილობრივი ხელისუფლების წარმომადგენლები თავიანთ ახლობლებს ასაქმებენ, წინასაარჩევნოდაც ზრუნავენ, რომ მათმა კადრებმა ამომრჩევლებზე აქტიურად იმუშაონ. ამ მუშაობაში, რა თქმა უნდა, მათთვის ჩვეული დაშინება, მუქარა და თუ საჭირო გახდა, ცემა-ტყეპა იგულისხმება, რითაც დედოფლისწყაროში კუდ-ის ორივე ადგილობრივი თანამშრომელი გამოირჩევა", - განაცხადა თამილა გურაშვილმა და "კუდ-ის თანამშრომლების ნეპოტიზმი პარტიის სახელით კიდევ ერთხელ გააპროტესტა". /ქიზიყი/

გოგა ხაჩიძე კარიერების უპრეცედენტო პროექტების ფარგლებში შეხვედრებს განაგრძობს

გარემოს დაცვის მინისტრი გოგა ხაჩიძე კასპის რაიონის სოფელ კავთისხევს ეწვია, სადაც ადგილობრივ მოსახლეობასა და ბიომრავალფეროვნების პროექტში მონაწილეობის მსურველებს შეხვდა.

"ქიზიყი" უკვე იუწყებოდა, რომ საერთაშორისო საგანმანათლებლო გარემოსდაცვითი კონკურსი „ბიომრავალფეროვნების ხელშეწყობა კარიერებზე” (Quarry Life Award) „ჰაიდელბერგცემენტის” მიერ გარემოს დაცვის სამინისტროს მხარდაჭერით ხორციელდება. პროექტში მონაწილეობას იღებს 3 კარიერი: კავთისხევის კირქვის, გარდაბნის თიხის და დედოფლისწყაროს კირქვის კარიერი. დაინტერესებულ პირებს შესაძლებლობა აქვთ საპროექტო წინდადადებები წარმოადგინონ 17 თებერვლამდე.

შეხვედრის მონაწილეებს მინისტრმა გააცნო კონკურსის შესახებ ინფორმაცია და პროექტის პრიორიტეტები.
„მოხარული ვარ, რომ ამდენი ახალგაზრდა ღებულობს მონაწილეობას კონკურსში. დიდი სიამოვნებით ვუერთდები ამ ინიციატივას, ეს არის ახალი სტანდარტი, თუ რა უნდა გააკეთოს თანამედროვე დიდმა წარმოებამ იმისთვის, რომ გარემოზე მიყენებული ზიანის რეგენერაცია მოხდეს”-განაცხადა გოგა ხაჩიძემ.

2012 წლის დეკემბერში კომპეტენტური ჟიურის მიერ ეროვნულ და გლობალურ დონეზე გამარჯვებულები გამოვლინდებიან და დაჯილდოვდებიან 1500-დან 30 000 ევრომდე საპრიზო თანხით.
ღონისძიებაში მონაწილეობას მიიღებენ გარემოს დაცვის სფეროში მომუშავე არასამთავრობო ორგანიზაციები და სამეცნიერო წრის წარმომდაგენლები. /ქიზიყი/

„შირაქის“ მოცეკვავეებმა „ნიჭიერის“ შემდეგი ეტაპიც წარმატებით გადალახეს

EXCLUSIVE - დედოფლისწყაროს ქორეოგრაფიულ ანსამბლ „შირაქის“ მოცეკვავეებმა პროექტ „ნიჭიერის“ მორიგი ტური კვლავაც წარმატებით გადალახეს. გადაღებები 5 თებერვალს შოთა რუსთაველის სახელობის სახელმწიფო აკადემიური თეატრის დარბაზში გაიმართა. მოცეკვავეები ფართო აუდოტორიის წინაშე დედოფლისწყაროს სახელით გამოვიდნენ.

მათ ჟიურის წინაშე 2,5 წუთი ხანგრძლივობის ნომერი შეასრულეს. სცენაზე გატანილი იყო ცეკვა „მთიულური“, რომელიც 25-მა ბავშვმა შეასრულა.

ანსამბლს ტრანსპორტირებაში დედოფლისწყაროს მუნიციპალიტეტის ხელმძღვანელობა დაეხმარა. ჟიურის რეაქციებსა და შეფასებებზე „ქიზიყი“ ანსამბლის წევრებს ესაუბრა:

„დილის ათი საათიდან სხვადასხვა სახის სარეკლამო გადაღებებზე ვიყავით, ყველა მონაწილეს ცალკ-ცალკე იგებდნენ. ეს ტური წარმატებით დავძლიეთ და საბოლოო ჯამში ჯიურის სამივე წევრის „კი“ მივიღეთ. გეგას და სოფოს დადებითი კომენტარის შემდეგ ბოლო და გადამწყვეტი სიტყვა ვანო ჯავახიშვილმა თქვა და დაამატა – „ამ ჟანრში ძალიან ბევრი მოღვაწეობს, მაგრამ თქვენ შეძელით, განსაკუთრებულები ყოფილიყავით. ოთხი კი გაქვთ დარბაზის ჩათვლით, რადგან მთელი დარბაზი ფეხზე დგასო“. სოფო ნიჟარაძემ აღნიშნა – „ძალიან მოკლე დროში შეძელით შესაძლებლობების საუკეთესოდ წარმოჩენაო“... იყო სიხარულის ყიჟინაც და ინტერვიუები. როგორც გვითხრეს, ეს პროექტი ეთერში მარტში გავა,“ – აღნიშნავს ანსამბლ „შირაქის“ ხელმძღვანელი ალექსი გაბრიელაშვილი.

„ქიზიყის“ ინფორმაციით, პატარა მოცეკვავეები მომავალ ტურში ახალ ნომერს წარმოადგენენ და შემდეგ კი იმ ტურიდან ჟიური ფინალისტებს შეარჩევს. ანსამბლის ხელმძღვანელს მომდევნო ნომერი ამ ეტაპზე შერჩეული არ აქვს. ანსამბლში ვარაუდობენ, რომ სამომავლოდ ფარიკაობას მოამზადებენ, ოღონდ განსხვავებულად დადგმულს.

ანსამბლ „შირაქის“ „ნიჭიერში“ წარმატებულად მონაწილეობის შესახებ ინფორმაცია თავდაპირველად ინტერნეტგაზეთმა „ქიზიყმა“ ექსკლუზიურად გაავრცელა. ქართულ ტელესივრცეში „ნიჭიერი“ ერთერთ ყველაზე პოპულარულ და სახალხო პროექტად რჩება. /ქიზიყი/ ილია მარტყოფლიშვილი

ფიროსმანის სახლ–მუზეუმების მმართველის ვაკანსიაზე გამოცხადებული კონკურსის შედეგები ცნობილია

EXCLUSIVE - თბილისსა და დედოფლისწყაროში, ფიროსმანის სახლ–მუზეუმების მმართველის ვაკანსიაზე გამოცხადებული კონკურსის შედეგები უკვე ცნობილია. კულტურული მემკვიდრეობის დაცვის ეროვნული სააგენტოს დირექტორის ნიკოლოზ ვაჩეიშვილის ბრძანების მიხედვით, მიმდინარე წლის 1 თებერვლიდან ნიკო ფიროსმანის სახლ–მუზეუმების მმართველად თბილისსა და მირზაანში ნელი გობეჯიშვილი დაინიშნა.

ის დედოფლისწყაროს გამგეობის კულტურის, განათლების, სპორტის, ძეგლთა დაცვისა და ახალგაზრდულ საქმეთა სამსახურის სპეციალისტი გახლდათ. გობეჯიშვილი ათეულობით წელია დედოფლისწყაროში კულტურის სფეროში წამყვან თანამდებობებს იკავებდა. მისი თქმით, ფიროსმანის მუზეუმი შველას ითხოვს, კონკურსში საკუთარი ძალების მოსინჯვა ამიტომაც გადაწყვიტა.

„2011 წლის განმავლობაში მუზეუმში მხოლოდ 80 ვიზიტორის ბილეთი გაიყიდა, ეს კი კატასტროფულად დაბალი მაჩვენებელია. ჩემთვის ეს მუზეუმი მშობლიურია. მისი გახსნის დღიდან ყველაფერში აქტიურად ვიყავი ჩართული. მხოლოდ ბოლო ორ ღონისძიებაზე მივედი სტუმრის სტატუსში, დანარჩენ შემთხვევებში მთლიანად ვიყავი ჩართული. ფიროსმანობის დღესასწაულის სახელწოდებაც ჩემი შერჩეულია. დედოფლისწყაროში, რამდენიმე წლის წინ ფიროსმანის სახელობის სამხატვრო სკოლაც ჩემივე ძალისხმევით გაიხსნა. ვფიქრობ, კონკრეტული შედეგები მალე გამოჩნდება. მუზეუმი ცოცხალი ორგანიზმი უნდა იყოს და სოფელში გამოირჩეოდეს. ფიროსმანის მუზეუმმა მთლიანად სოფელი უნდა გამოაცოცხლოს. სამწუხაროდ ამჟამად ასე არ არის. დარწმუნებული ვარ, რომ მისი გამოცოცხლება სოფელში მიგრაციასაც მნიშვნელოვნად შეაჩერებს, რაც ჩემთვის ყველაზე მტკივნეული საკითხია. გარკვეული პროექტები უკვე არსებობს და ამინდის გაუმჯობესებისთანავე მუშაობა აქტიურად დაიწყება,“ – აცხადებს ნელი გობეჯიშვილი.

მმართველის ვაკანსიაზე გამოცხადებულ კონკურსში მონაწილეობას იღებდა ასევე მუზეუმის ყოფილი ხელმძღვანელი, ფიროსმანის მკვლევარი ანზორ მაძღარაშვილი. „ქიზიყის“ ინფორმაციით, საკონკურსო კომისიის გადაწყვეტილებით, ანზორ მაძღარაშვილი მუზეუმის შემადგენლობაში აღარ ირიცხება, თუმცა ის მუშობას კულტურული მემკვიდრეობის დაცვის ეროვნული სააგენტოში ფიროსმანის შემოქმედების მკვლევარის პოზიციაზე გააგრძელებს.

„შედეგით კმაყოფილი რანაირად უნდა ვიყო, ეს ყველაფერი ჩემზე არ იყო დამოკიდებული, როგორც გადაწყვიტეს ისე მოხდა. ჯერჯერობით სააგენტოში ვრჩები. თუმცა, სამსახურს ვეძებ და თუ რაიმე სამსახური ვიშოვე, ალბათ, სააგენტოდან წავალ...,“ – აცხადებს მაძღარაშვილი.

ერთ–ერთი ვერსიით, ანზორ მაძღარაშვილის ფიგურა ხელისუფლებისათვის კრიტიკული კომენტარების გამო მიუღებელი გახდა და მოვლენების ამგვარი განვითარება სწორედ მის კრიტიკულ განცხადებებს უკავშირდება. /ქიზიყი/ ილია მარტყოფლიშვილი

გამოხმაურება: გაზეთი ახალი თაობა ; რადიო ჰერეთი ; ჯეონიუსი ; მედიანიუსი ; ნიუსლაინი ; ICK.ge ;

დედოფლისწყაროში 2011 წლის ნომინანტები გამოვლინდა

საქართველოს საქველმოქმედო ფონდი „ამაგდარი“–სა და გაზეთ „საქართველოს ლირიკის“ სარედაქციო საბჭოს ინიციატივით ახლახან დედოფლისწყაროს მოსახლეობა გამოიკითხა, რის შედეგადაც სხვადასხვა ნომინაციებში დედოფლისწყაროს მუნიციპალიტეტის ცნობილი ადამიანები გამოვლინდნენ.

მსგავსი შინაარსის გამოკითხვა დედოფლისწყაროში უკვე მერამდენე წელია ტარდება და სხვადასხვა ნომინაციებში მუნიციპალიტეტის ინტელიგენციის წარმომადგენლები ჯილდოვდებიან. ნომინაციები ყოველწლიურად სხვადასხვა სფეროში მოღვაწე ადამიანებზე ნაწილდება. გამოკითხვაში გამარჯვებულებს სპეციალური სიგელები უკვე გადაეცათ, რომელსაც ხელს აწერს საქველმოქმედო ფონდ "ამაგდარის" თავმჯდომარე ვახტანგ ქიზიყურაშვილი.

გამარჯვებული დედოფლისწყაროელი ნომინანტების სია თბილისში გამომავალ გაზეთ „საქართველოს რესპუბლიკის“ 31 ოქტომბრის ნომერში დაიბეჭდა. როგორც ორგანიზატორებმა "ქიზიყს" აცნობეს, გამარჯვებულთა შორის ასევე დასახელდა დედოფლისწყაროში გამომავალ ინტერნეტ–გაზეთ "ქიზიყის" მთავარი რედაქტორი ილია მარტყოფლიშვილი ნომინაციაში "წლის აღმოჩენა", ხოლო გაზეთი "შირაქი" და მისი ახლადდანიშნული დირექტორი ინგა შიოლაშვილი წლის წარმატებულ შპს–დ დასახელდა.

2011 წლის ნომინაციები დედოფლისწყაროში ასე გადანაწილდა.

ნომინაცია „ხალხის სიმპათია“

მარინა ხარაშვილი – პედიატრი;
ლელა ყოჩიაშვილი – ფიზიკოსი;
ნანა ტოკლიკიშვილი – ბანკირი;
ბეჟან გონაშვილი – ფერმერი;
ივერი ჭუჭულაშვილი – ფერმერი;
ზაურ წიკლაური – არენდატორი;
შალვა ყველაიძე – არენდატორი;

ნომინაცია „წლის აღმოჩენა“

ილია ტალიაშვილი – შპს „სერვისი 2007“–ის დირექტორი;
ილია მარტყოფლიშვილი – ჟურნალისტი;
ნიკოლოზ (ბაჩო) კობაიძე – მეანგინეკოლოგი;
თამარ მამუკელაშვილი – საერთაშორისო სამართლის სპეციალისტი;
თამუნა ფიროსმანაშვილი – პირველი არხის ჟურნალისტი;

ყველაზე პრესტიჟულ ნომინაციაში „მეტრი“ დასახელდნენ

ნიკოლოზ შანშიაშვილი – ფინანსისტი;
აბრამ ხარაშვილი – იურისტი;
სპარტაკ ლაპიაშვილი – მძღოლი;
ვახუშტი ქიზიყურაშვილი – მეღვინე–ტექნოლოგი;
ჯუმბერ უთრუთაშვილი – პოეტი;

წლის წარმატებული ინდმეწარმე და შპს

ინგა შიოლაშვილი – შპს გაზეთი „შირაქი“ დირექტორი;
ილია ტალიაშვილი – შპს „სერვისი 2007“ დირექტორი;
ციცო ლათიბაშვილი – შპს „სალბუნი–ფარმა“–ს დირექტორი;
გია ნატროშვილი – შპს „გვანცას“ დირექტორი.

როგორც "ქიზიყს" გამოკითხვის ორგანიზატორებმა აცნობეს, გამარჯვებულ ნომინანტთა საპატივსაცემოდ თბილისის კონსერვატორიის მცირე დარბაზში სპეციალური საკონცერტო საღამო მოეწყო, სადაც ნომინანტები იყვნენ მიწვეულნი. ორგანიზატორების განცხადებით, სულ მალე ნომინანტებისადმი მიძღვნილი შეხვედრა დედოფლისწყაროშიც გაიმართება.

ინტერნეტ–გაზეთი "ქიზიყი" დედოფლისწყაროს მუნიციპალიტეტში ერთადერთი დამოუკიდებელი გამოცემაა, რომელიც 2009 წლის 10 მაისიდან მოქმედებს და ინფორმაციას ყოველდღიურ რეჟიმში ოპერატიულად ავრცელებს. "ქიზიყის" რეიტინგი და დამთვალიერებელთა რიცხვი დაარსების დღიდან სტაბილურად იზრდება, თუმცა, ბოლო 3 თვის მანძილზე "ქიზიყის" პორტალის ვიზიტორთა ოდენობამ მოსალოდნელზე მეტად იმატა.

ამ ხნის მანძილზე "ქიზიყის" სახელს არაერთი ექსკლუზიური და სკანდალური სტატიის გავრცელება უკავშირდება. მათ შორის, ჩვენი პორტალი ცენტრალური ტელეკომპანიების, რადიომაუწყებლებისა თუ თბილისში გამომავალი გაზეთებისთვის დედოფლისწყაროს რაიონში მიმდინარე მოვლენების თაობაზე ინფორმაციის მიღების საუკეთესო საშუალებად იქცა. "ქიზიყზე" დაყრდნობით მომზადებული მასალები წამყვანი ქართული მედიასაშუალებების ეთერით ინტენსიურად გადაიცემა და მსხვილ ქართულ გაზეთებსა თუ საინფორმაციო სააგენტოებში თითქმის ყოველდღიურად იბეჭდება.

უკვე მეექვსე თვეა დედოფლისწყაროში გამომავალი ბეჭდვური გაზეთი "შირაქი" განსხვავებული ფორმატით გამოიცემა. გაზრდილია გვერდების ოდენობა, ხარისხი და პერიოდულობა. რეორგანიზაციის შემდეგ გაზეთ "შირაქის" დირექტორად ინგა შიოლაშვილი დაინიშნა. მოსახლეობის დიდი ნაწილი მიიჩნევს, რომ ბოლო დროს გაზეთი გაცილებით საინტერესო და მრავალფეროვანი გახდა. /ქიზიყი/

სოფელ არბოშიკში ძლიერი ყინვების შედეგად 72 წლის მარტოხელა მამაკაცი გარდაიცვალა

EXCLUSIVE - უამინდობას მსხვერპლი მოჰყვა დედოფლისწყაროში. სოფელ არბოშიკში მცხოვრები მარტოხელა ცეზარ პოპიაშვილი ძლიერი ყინვების შედეგად გარდაიცვალა. როგორც სოფელში აცხადებენ, 72 წლის მამაკაცი მეზობლებმა გარდაცვლილი 2 თებერვალს საკუთარ სახლში ნახეს.

,,შეშა არ ჰქონდა, თუმცა დამოუკიდებლად ვერც ღუმელის დანთებას ახერხებდა. როცა აღარსად გამოჩნდა, მოვიკითხეთ და საწოლის ქვეშ გარდაცვლილი ეგდო. სასიკვდილო არაფერი სჭირდა, ვფიქრობთ, სიცივით უნდა გარდაცვლილიყო... რადგან გარდაცვლილი უპატრონოა, მისი დაკრძალვის ხარჯებთან დაკავშირებით დახმარების სათხოვნელად სოფელ არბოშიკის რწმუნებულთან დაკავშირებას არაერთხელ ვეცადეთ, თუმცა, რობიზონ დათუკიშვილს ტელეფონი არა აქვს და ამ დრომდე ვერ ვუკავშირდებით. ამბობენ, რომ სოფელ გამარჯვებასთან რწმუნებული ჩხუბში მოხვდა და შეხლა-შემოხლის დროს მობილური იქ დაუკარგავს," - აცხადებენ გარდაცვლილის მეზობლები.

"ქიზიყის" ექსკლუზიური ინფორმაციით, დედოფლისწყაროს მუნიციპალიტეტის გამგეობამ, ადგილობრივ ბიუჯეტში გათვალისწინებული "უპატრონო მიცვალებულების დაკრძალვის ხარჯებიდან" ცეზარ პოპიაშვილის დასაკრძალად 200 ლარი უკვე გამოყო. /ქიზიყი/

დედოფლისწყაროში სოციალურად დაუცველებს კომპიუტერსა და ინგლისურს უფასოდ შეასწავლიან

დედოფლისწყაროში მცხოვრებ სიღატაკის ზღვარს ქვემოთ მყოფი ოჯახების წევრებს საშუალება ექნებათ კომპიუტერისა და ინგლისური ენის შემსწავლელ კურსებზე უსასყიდლოდ იარონ.
დედოფლისწყაროს მოსწავლე–ახალგაზრდობის შენობის ოფისში 1 თებერვალს არასამთავრობო ორგანიზაცია ”ახალი თაობა – ახალი იდეა”-ს წარმომადგენლებმა მოსახლეობას პროექტის არსი და მიზნები დაწვრილებით განუმარტეს.

როგორც ორგანიზაცია „ახალი თაობა – ახალი იდეა“-ს ხელმძღვანელმა გიორგი პოპიაშვილმა „ქიზიყს“ განუცხადა, პროექტი სოციალურად დაუცველი მოქალაქეებისთვის არის განკუთვნილი და ის 5 000 ლარით დაფინანსდა.

პროექტის ხელმძღვანელმა თამარ ბაღაშვილმა „ქიზიყს“ განუმარტა, რომ პროექტი, რომელსაც „ბავშვთა და ახალგაზრდობის განვითარების ფონდი“ და დედოფლისწყაროს მუნიციპალიტეტის სკოლამდელი და სკოლისგარეშე სააღმზრდელო ცენტრი ერთობლივად ახორციელებს, სოციალურად დაუცველი ოჯახის 17– იდან 35 წლამდე წევრებს აძლევს საშუალებას, უფასოდ შეისწავლონ საოფისე პროგრამები, ინტერნეტი და ინგლისური ენა. მისი თქმით, პროექტი იმ ოჯახებისთვისაა განკუთვნილი, რომლებიც სოციალური მომსახურების სააგენტოს ბაზაში არიან რეგისტრირებულნი და მათი სარეიტინგო ქულა 150 000-სს არ აღემატება.
„ახალგაზრდების დაინტერესება საკმაოდ დიდია. სკოლამდელი და სკოლისგარეშე სააღმზრდელო ცენტრის მოსწავლე-ახალგაზრდობის სახლი, სადაც განხორციელდება აღნიშნული პროექტი, ახალი თანამედროვე ტექნიკით აღიჭურვა. უკვე დაკომპლექტებულია პედაგოგიური კადრებიც, რაც დაინტერესებულ ახალგაზრდებს საშუალებას მისცემს დაეუფლონ მათთვის სასურველ ცოდნას. მეცადინეობა 10:00–დან 18:00 საათამდე გაგრძელდება. ამ დროისთვის 47 განაცხადია შემოსული და პროცესი კიდევ გრძელდება. იმდენად ბევრი მსურველი აღმოჩნდა, რომ საჭიროდ ჩავთვალეთ დამატებითი შეხვედრა მოგვეწყო. ყველა მათგანს შევხვდით, ჯგუფები მათთვის სასურველი დროის მიხედვით დაკომპლექტდა. ანალოგიური პროექტი ჩვენ 10 წლის წინაც განვახორციელეთ, თუმცა იმის გამო რომ ტექნიკა მოძველებული იყო, განახლების საჭიროება იდგა და სასიხარულოა, რომ ამ პროექტის ფარგლებში ეს მოხერხდა,“ – განუცხადა „ქიზიყს“ პროექტის ხელმძღვანელმა თამარ ბაღაშვილმა.

პრეზენტაციას ესწრებოდნენ დედოფლისწყაროს მუნიციპალიტეტის საკრებულოს თავმჯდომარე ლევან ბაღაშვილი, მისი მოადგილე ზაზა ფიროსმანაშვილი, მუნიციპალიტეტის გამგებლის მოადგილე და სხვადასხვა სამსახურების უფროსები. მათ პროექტის ხელმძღვანელობას და სასწავლო ჯგუფების პირველ ნაკადს მიულოცეს სასწავლო პროცესის დაწყება და თანადგომას და ურთიერთთანამშრომლობას დაჰპირდნენ.

როგორც იდეის ავტორები აცხადებენ, პროექტი მიმდინარე წლის ნოემბერში უნდა დასრულდეს. ის ათი თვის მანძილზე გაგრძელდება და სოციალურად დაუცველებით დაკომპლექტებული თითეული ჯგუფი სამთვიან კურსს გაივლის. /ქიზიყი/ ილია მარტყოფლიშვილი

გურჯაანში მკვლელობის მცდელობისთვის ჟურნალისტის დაკავება ივანიშვილის მოძრაობას უკავშირდება?!

კახეთის საოლქო პროკურატურამ განზრახ მკვლელობის მცდელობის ბრალდებით ჟურნალისტი სოფო ნიკოლაშვილი დააკავა. პროკურატურა სოფო ნიკოლაშვილს პოლიციის თანამშრომლის, 21 წლის გიორგი სიბაშვილის მკვლელობის მცდელობაში ადანაშაულებს.

კახეთის საოლქო პროკურორის გიორგი ჩივიაშვილის განცხადებით, საქმე აღძრულია სისხლის სამართლის კოდექსის 19/108 მუხლით. სოფო ნიკოლაშვილი თელავის წინასწარი დაკავების იზოლატორშია მოთავსებული.
ინციდენტი ქალაქ გურჯაანში 31 იანვარს, საღამოს მოხდა.

სამართალდამცავების ცნობით, სოფო ნიკოლაშვილი შეეცადა გიორგი სიბაშვილისთვის მამამისის კუთვნილი ცეცხლსასროლი იარაღიდან ესროლა, თუმცა სიბაშვილმა მას იარაღი წაართვა. პოლიციაში აცხადებენ, რომ სოფო ნიკოლაშვილს გიორგი სიბაშვილი უყვარდა.
სიბაშვილი ამჟამად შს კახეთის სამხარეო მთავარი სამმართველოს თანამშრომელია. მამამისი გოჩა სიბაშვილი გურჯაანის პოლიციის უფროსის მოადგილეა.

კახეთის საინფორმაციო ცენტრი სოფო ნიკოლაშვილის მამას დავით ნიკოლაშვილსაც დაუკავშირდა. მისი თქმით, მომხდარის დეტალები მისთვის ჯერ უცნობია. დათო ნიკოლაშვილი საზოგადოებრივი მოძრაობა „ქართული ოცნების“ საინიციატივო ჯგუფის ხელმძღვანელია გურჯაანში.
ნიკოლაშვილი ბოლოს, 2011 წლის აგვისტომდე კახეთის რეგიონულ გაზეთ "კახეთის ხმაში" მუშაობდა. "კახეთის ხმის" ხელმძღვანელს მაია მამულაშვილის განცხადებით, მომხდარის გამო რედაქცია შოკირებულია:
„სოფიკომ თავის სოციალურ გვერდზე მიმდინარე წლის 10 იანვარს წელს დაწერა: ეს ყველაფერი - happy and- ით არ დასრულდება. 2008 წლიდან 2011 წლის აგვისტომდე ჩვენთან მუშაობდა. რის შემდეგაც სასწავლებლად თბილისში გადავიდა. რედაქციის თანამშრომლები მას ძალზე დადებითად ახასიათებენ. მუშაობდა. ყოველთვის გამოირჩეოდა კარგი ჟურნალისტური უნარებით სოფოს გამო შოკირებული ვართ,“ – აცხადებს მაია მამულაშვილი.
დანაშაულის დამტკიცების შემთხვევაში სოფო ნიკოლაშვილს 7-დან 15 წლამდე პატიმრობა ემუქრება. დაკავებული ჟურნალისტი ადვოკატის გარეშე დაკითხეს. /ქიზიყი/

დედოფლისწყაროს მთავარ ვეტერინარად მიხეილ ქევხიშვილი დანიშნეს

სურსათის უვნებლობის, ვეტერინარიისა და მცენარეთა დაცვის ეროვნული სააგენტოს დედოფლისწყაროს სამმართველოს უფროსის ვაკანტურ ადგილზე მიხეილ ქევხიშვილი დაინიშნა. „ქიზიყის“ ინფორმაციით, ქევხიშვილი მანამდე სოფელ ზემო მაჩხაანის ტერიტორიული ორგანოს სპეციალისტად მუშაობდა.

დედოფლისწყაროს მთავარი ვეტერინარი დავით ვეშაგურიძე სამსახურიდან რამდენიმე თვის წინ სკანდალურად გაათავისუფლეს. გავრცელებული ინფორმაციის თანახმად, ვეშაგურიძის სამსახურიდან გაშვების მიზეზი რაიონში სხვადასხვა დაავადებების მასობრივად გავრცელება გახდა. მან გათავისუფლების თაობაზე ინფორმაცია „ქიზიყს“ დაუდასტურა: „ჭორი რატომ იქნება, უკვე სამსახურში აღარ დავდივარ," - განაცხადა ვეშგურიძემ.

ბოლო პერიოდში დედოფლისწყაროს სოფლებში საქონელი დაიხოცა. ინფექციურ საავადმყოფოში ჯილეხით დაავადებული რამდენიმე ადამიანი მოათავსეს, 42 წლის ქალი კი ბრუცელოზით გარდაიცვალა.

როგორც სურსათის ეროვნული სააგენტოს საზოგადოებასთან ურთიერთობის სამსახურის უფროსმა ვერიკო გულუამ განაცხადა, ვეშაგურიძეს შრომითი ხელშეკრულების ვადა გაუვიდა.
„იანვრიდან ჩვენი სამსახური საჯარო სამართლის იურიდიულ პირად გადაკეთდა. ამიტომ თანამშრომლებთან მოკლევადიან ხელშეკრულებებს ვაფორმებთ. დავით ვეშაგურიძესაც ხელშეკრულების ვადა ამოეწურა“, - აღნიშნა გულუამ.

შეგახსენებთ, ვეშაგურიძე საპარლამენტო უმრავლესობის ლიდერის პეტრე ცისკარიშვილის კადრი იყო. სწორედ მისი რეკომენდაციით ის სამუშაოდ ახმეტიდან დედოფლისწყაროში გადავიდა. ის დედოფლისწყაროს სამმართველოს სამი წლის მანძილზე ხელმძღვანელობდა. /ქიზიყი/

დედოფლისწყაროში 113 ინსულინდამოკიდებული პაციენტია რეგისტრირებული

დედოფლისწყაროს მუნიციპალიტეტის ტერიტორიაზე დიაბეტით დაავადებულ მოქალაქეთაგან ოფიციალურად 113 ინსულინდამოკიდებული პაციენტია რეგისტრირებული. ამის შესახებ „ქიზიყს“ დედოფლისწყაროს ცენტრალურ აფთიაქში განუცხადეს.

ინსულინდამოკიდებული პაციენტები კვარტალში ერთხელ „მოსახლეობის სპეციფიკური მედიკამენტებით უზრუნველყოფის“ სახელმწიფო პროგრამის ფარგლებში საჭირო ოდენობის ინსულინს უსასყიდლოდ ღებულობენ. თუმცა, როგორც პაციენტებმა „ქიზიყს“ განუცხადეს, გამკაცრებული კონტროლის გამო უამრავი ბარიერია შექმნილი რაც მათი ინსულინით დროულად მომარაგებას აფერხებს.

დიაბეტით დაავადებული პაციენტები აღნიშნავენ, რომ მედიკამენტების მისაღებად სპეციფიკური მედიკამენტის ვაუჩერის აღების აუცილებლობა დგას, ის კი მხოლოდ თელავში გაიცემა. მოქალაქეთა აღშფოთებას ის ფაქტიც იწვევს, რომ ვაუჩერის და სხვადასხვა დოკუმენტების განახლება ხშირად უწევთ, ეს კი წამდაუწუმ თელავში სიარულის აუცილებლობას წარმოშობს.

„ამდენი ბარიერი როგორ შეიძლება. დროის გარდა თელავში სიარული ფინანსურ ხარჯებთანაც არის დაკავშირებული. ბევრი ვიცი, რომ წასვლას ვერ ახერხებს და ინსულინის სასესხებლად დადიან–ხოლმე. ხან წასვლას ვერ ვახერხებთ, ხან სახელმწიფოს მიერ გამოწერილი დოზა არ გვყოფნის და ნაცნობებში დავდივართ, რომ ინსულინი ვიშოვოთ. მისასალმებელია ის ფაქტი, რომ საკითხი მკაცრად კონტროლირდება, მაგრამ ეს პაციენტების ხარჯზე არ უნდა ხდებოდეს და ეს ბარიერები დაბრკოლების საბაბი არ უნდა ხდებოდეს,“ – აცხადებს დედოფლისწყაროში მცხოვრები პაციენტი, ელზა ჩერქეზიშვილი.

როგორც ექიმი ენდოკრინოლოგები განმარტავენ, წლების განმავლობაში, ვინაიდან დიაბეტი პროგრესირებადი დაავადებაა, მიზნის მისაღწევად, ანუ გლიკოჰემოგლობინის 7%-ზე ქვემოთ შესანარჩუ¬ნებ¬ლად, საჭირო ხდება მკურნალობის სტრატეგიის შეცვლა.

ინსულინდამოკიდებულთა, ანუ ე.წ. II–ე ტიპის დიაბეტის ყველაზე მასშტაბური კვლევა — UKPDS — ჩატარდა ინგლისში. მასში მონაწილეობდა დაახლოებით 3 900 ახლად-დიაგნოსტირებული პაციენტი. მათი კვლევაში ჩართვა ხდებოდა 1977-1991 წლებში და დაკვირვება გაგრძელდა საშუალოდ 10 წელი. კვლევის შედეგები გამოქვეყნდა 1998 წელს (UKPDS ). ამ კვლევამ ნათლად აჩვენა, რომ გლიკოჰემოგლობინის თითოეული პროცენტით შემცირებას თან ახლდა დიაბეტის ნებისმიერი გართულების 21%-ით შემცირება, დიაბეტით გამოწვეული სიკვდილიანობის 21%-ით შემცირება, მიოკარდიუმის ინფარქტის 14%-ით შემცირება და მიკროვასკულური (რეტინოპათია, ნეფროპათია) რისკის 37%-ით შემცირება. დიაბეტოლოგიაში ჩატარებულმა სხვა კლინიკურმა კვლევებმაც მსგავსი შედეგები აჩვენა, მეტნაკლები ვარიაბელობით. /ქიზიყი/

ანსამბლი „შირაქი“ პროექტ „ნიჭიერის“ მეორე ტურში გადავიდა

EXCLUSIVE - დედოფლისწყაროში მოქმედი წარმატებული ქორეოგრაფიული ანსამბლი "შირაქი" სამაუწყებლო კომპანია "რუსთავი 2"-ის პოპულარულ ტელე-შოუ ნიჭიერის მეორე ტურში გადავიდა. ამის შესახებ ნეტგაზეთ "ქიზიყს" ანსამბლის ხელმძღვანელმა ალექსანდრე გაბრიელაშვილმა აცნობა. მისი თქმით, დედოფლისწყაროელი მოცეკვავეები ჟიურის წინაშე წარსადგენად უკვე ემზადებიან.

ცნობილია, ისიც რომ პოპულარულ პროექტში მონაწილეობას ანსამბლ „შირაქის“ მხოლოდ პატარა წევრები მიიღებენ.

„რამდენიმე თვის წინ "ნიჭიერის" შესარჩევი ტური დედოფლისწყაროში ჩატარდა, სადაც ჩვენც მივიღეთ მონაწილეობა. სულ ახლახან დაგვირეკეს და გვაცნობეს, რომ გადასულები ვართ მეორე ტურში. მზადებას უკვე შევუდექით. როგორც პროექტის პროდიუსერებმა გვაცნობეს, გადაღებები თებერვლის პირველ რიცხვებში იქნება. საკუთარი შესაძლებლობების წარმოსაჩენად მხოლოდ 2,5 წუთი მოგვცეს და მაქსიმალურად ვცდილობთ, კარგი რეპერტუარი შევარჩიოთ და იმედები გავამართლოთ. ცეკვა მთიულურს ვამზადებთ, რომელსაც ჩვენი ანსამბლის პატარა ასაკის წევრები შეასრულებენ,“ - განუცხადა „ქიზიყს“ ალექსი გაბრიელაშვილმა.

"ნიჭიერში" მონაწილეობის მისაღებად დედოფლისწყაროდან 8 ან 10 ბიჭის და ამდენივე გოგონას წაყვანა იგეგმება. სცენაზე მხოლოდ პატარა, 7–12 წლამდე მოცეკვავები გამოვლენ. /ქიზიყი/ ილია მარტყოფლიშვილი

გამგებლის საქორწინო მოგზაურობასთან დაკავშირებით ჟურნალისტ გელა მთივლიშვილს უჩივიან

„საქართველოს ჟურნალისტური ეთიკის ქარტიაში“ 29 იანვარს ორი საჩივარი შევიდა. რომან ქევხიშვილი „კახეთის საინფორმაციო ცენტრის“ (ick.ge გურჯაანი) ხელმძღვანელს, გელა მთივლიშვილს უჩივის, ნატო გოგელია კი - ჟურნალისტ მაია მეცხვარიშვილს ("ნეტგაზეთი"), "სამოქალაქო განვითარების ინსტიტუტის ხელმძღვანელ" ია ანთაძესა და მედიამკვლევარ ნინო დანელიას.

რომან ქევხიშვილის მოსაზრებით, გელა მთივლიშვილმა მასალაში „დედოფლისწყაროს გამგებელი თაფლობის თვის გასატარებლად დუბაიში იმყოფება“, ეთიკის ქარტიის მე-10 პრინციპი დაარღვია, რაც ადამიანის პირადი ცხოვრების ხელშეუხებლობას ითვალისწინებს.

ქევხიშვილი მიიჩნევს, რომ გამგებლის საქორწინო მოგზაურობა მაშინ იქნებოდა განსაკუთრებული ინტერესის საგანი, თუ სახელმწიფო ბიუჯეტიდან დაფინანსდებოდა.
„სხვა შემთხვევაში გამგებელიც ადამიანია და მასაც აქვს პირადი ცხოვრების უფლება. ჩემთვისაც, როგორც ჟურნალისტისთვის, საინტერესოა, რა გადაწყვეტილებას მიიღებს საბჭო ამ საკითხთან დაკავშირებით“, -აღნიშნავს რომან ქევხიშვილი.
მისი თქმით, ick.ge-ს მიერ გამოქვეყნებულ მასალაში თავდაპირველად საუბარი გამგებლის გერებზეც იყო. „მას შემდეგ რაც საჩივარი გავგზავნე, მასალა შეცვალეს და შვილების საკითხი საერთოდ ამოიღეს“, - განაცხადა რომან ქევხიშვილმა.
ქარტიის საბჭოს აღნიშნული საჩივრების დასაშვებობის განხილვისთვის ბოლო ვადა 3 თებერვლამდე აქვს. კონკრეტული გადაწყვეტილების მიღებამდე, ორივე საჩივართან დაკავშირებით, მოპასუხე მხარეები კომენტარს არ აკეთებენ. /media.ge/

მანდატურები I და მე-II საჯარო სკოლებში მარტიდან გამოჩნდებიან

1 მარტიდან, მანდატურები დედოფლისწყაროს, თელავისა და გურჯაანის საჯარო სკოლებშიც დაინიშნებიან. როგორც „ქიზიყს“ თავად კანდიდატებმა აცნობეს, ისინი თბილისში, შესაბამისი კურსის გასავლელად უკვე გაემგზავრნენ. მომავალი მანდატურები ამ დროისთვის სწავლებას პოლიციის აკადემიაში გადიან.

როგორც რესურს-ცენტრში განაცხადეს, მანდატურების შესვლა პირველ ეტაპზე ქალაქის საჯარო სკოლებშია დაგეგმილი. თითო სკოლაში სავარაუდოდ 3 მანდატური დაინიშნება.

თელავის რაიონში მანდატურები ქალაქის 9 სკოლაში დაინიშნებიან, გურჯაანის რაიონში ქალაქის ოთხივე სკოლაში, ხოლო დედოფლისწყაროს რაიონში კი ქალაქის ორივე სკოლაში.
მანდატურები 2011 წელს უკვე შევიდნენ ქალაქ ყვარლის I და მე-II საჯარო სკოლებში. ახმეტის, ლაგოდეხის და სიღნაღის საჯარო სკოლებში კი მანდატურების დანიშვნა ამ ეტაპზე დაგეგმილი არ არის.

ცნობისთვის, მანდატურის ადგილის დასაკავებლად დედოფლისწყაროში სულ 12 განაცხადი შევიდა. /ქიზიყი/

საბერძნეთში გადახვეწილი 15 წლის გოგონას სკანდალური მიმართვა დედოფლისწყაროელებს

ამასწინათ, დედოფლისწყაროს ერთ-ერთ სკოლაში მობილურით გადაღებული სტრიპტიზის ცეკვა მას ძვირად დაუჯდა, იძულებული გახდა საბერძნეთში გადახვეწილიყო. წუხს, რომ მისი ცხოვრება მთლიანად შეიცვალა. ნინიმ ინტერნეტ-გაზეთ ,,ქიზიყს` ვრცელი წერილი გამოუგზავნა სადაც მომხდარს დეტალურად იხსენებს და თანარაიონელებს ღიად მიმართავს.

ნინი (15 წლის): ,,საქართველოდან მაგ ამბის გამო წამოვედი, მანდ ძალიან ბევრი დამცირების ატანა მიწევდა საზოგადოებიდან. არ ვამბობ, რომ მე არ ვარ დამნაშავე, უბრლაოდ ეს სამეგობროს შორის მოხდა. ანუ, სანამ მე ცეკვას დავიწყებდი კლასში საქმეს ვაკეთებდი, რომ მოვრჩი გოგონებმა დარჩენა მთხოვეს. შემდეგ მათ ამ ცეკვაში მეც ავყევი, შემდეგ ნონა წიკ.....მა გადაღებული ვიდეო ჩემ თვალწინ წაშალა, მაგრამ სანამ წაშლიდა სხვა ფაილზე გადაინახა. მეც დავუჯერე რადგან მისი მჯეროდა, არ ველოდი რომ ამას გამიკეთებდნენ, მიტუმეტეს, რომ ყველამ იცეკვა. მე ღმერთის წინაშე ცოდვას არ ჩავიდენ და იმას არ ვიტყვი რაც არ ყოფილა. ზევითა საცვალი ერთერთმა იქ მყოფმა მათხოვა, მაგრამ ჩემ გარდა გახდილს არავის უცეკვია. ეს ჩემ ცხოვრებაში ყველაზე დიდი შეცდომა და დანაშაული იყო. ამას ჩემ თავს დღემდე ვერ ვპატიობ და დღეს ისევ ვიმყოფები ნერვულ სტესში. მაგ ამბის მერე დავკარგე სულიერი სიძლიერე და სიმშვიდე, ჯამრთელობაც აღარ მივარგა იმისთვის რომ ამ ტკივილს ვებრძოლო, მარტო ისღა დარჩა რომ უფალს ვთხოვო სულიერი სიძლიერე და ჯამრთელობა დამიბრუნოს იმისთვის, რომ შევძლო ბედნიერად ცხოვრება. მინდა ყველამ იცოდეთ, რომ ამ შეცდომის გამო ჩემი ცხოვრება ყველანაირად შეიცვალა და აღარ მინდა დედოფლისწყაროში დაბრუნება, რადგან მეც ჩემი ადამიანობა გამაჩნია.
დიდი მადლობა ყველას, ვინც მხარში დამიდგა და გჯერათ ჩემი. ეხლა კი დავრწმუნდი, რამდენად შურდათ მაგ ხალხს ჩემი, რადგან მასწავლებლებისთვის თვალსაჩინო მოსწავლე ვიყავი, მე არმინდა რომ მასწავლებლებმა ჩვენი უსაქციელობის გამო, რამეში პასუხი აგონ, ყველას მინდა უფალი გფარავდეთ. დიდი მადლობა ყველას მთელი გულით.
უკმაყოფილო ძალიან ბევრ ადამიანზე ვარ. მაგათ გამო 2 თვე მძიმედ ვიყავი, სიკვდილს ვებრძოდი, არავინ მყავდა ვინც დამეხმარებოდა და ასეთი რამ გამიკეთეს. უბრალოდ მე მაგათ სიცოცხლე გამიმწარეს და არავის ვაპატიებ... მე მანდ კარგად ვსწავლობდი და არც მიფიქრია საბერძნეთში წამოსვლა, მაგრამ ასეთი რამის მერე დედოფლისწყაროში წამით აღარ გავჩერდებოდი.
___ მე ვაპირებდი სასამართლოში საჩივარი შემეტანა რა თქმა უნდა არც მე ვარ უდანაშაულო, მაგრამ მასწავებლების გამო შევიკავე საჩივრის დაწერისგან თავი, რადგან მე მათ ვუყვარდი და ყველა გვერდში მედგა...

პირადი ისტორია - პირველი სექსი კახეთში, დეიდაშვილთან

ბავშვობაში თამაშ-თამაშით გაუცნობიერებლად დეიდაშვილთან
დაწყებული სექსი და დანგრეული მომავალი...

ჩვენი სტატიის გმირი დედოფლისწყაროში დაიბადა და გაიზარდა, თუმცა ბოლო წლებია თბილისში უწევს ცხოვრება. მშობლიური რაიონი ძალიან ენატრება, თუმცა აქ ჩამოსვლა მისთვის ბევრ ცუდთან ასოცირდება და მისთვის სევდის მომტანი ხდება. ამიტომაც ცდილობს, დედოფლისწყაროში ჩამოსვლას უკიდურესი აუცილებლობის გარდა თავი აარიდოს. ამბობს, რომ მის ცხოვრებაში იმდენი პარადოქსული ფაქტი მოხდა, რაიონში სტუმრობა განწყობას მუდმივად უფუჭებს...
ამბობს, რომ სექსი იმდენად პატარა ასაკში ჰქონდა, მომხდარი ვერცერთმა ვერ გააცნობიერა. ყველაზე მეტად იმისი სცხვენია, რომ სექსუალური ცხოვრება თანატოლ დეიდაშვილ ბიჭთან დაიწყო... ზუსტად ვერ იხსენებს, მაგრამ ამბობს, რომ 10 – 11 წლის ასაკშიც აკრძალულ თამაშს თამაშობდა. მშობლებსა და ახლობლებს ეჭვები არ გამოუთქვამთ, არც უცნაური ქმედება შეუნიშნავთ.
ყველაფერი კი ბავშვური თამაშით დაიწყო. ნათესავი ბავშვები ჯერ უბრალო თამაშებით ერთობოდნენ, შემდეგ ტელევიზორში ნანახი რამდენიმე სცენის გათამაშება გადაწყვიტეს. მალევე ოჯახური თამაშები ჩაენაცვლა. ასაკთან ერთად მათი გართობის მეთოდებიც დაიხვეწა. მშობლები მუშაობდნენ და ამბობს, რომ სკოლიდან დაბრუნებულს, რამდენიმე საათი თავისუფლება კიდევ ჰქონდა ხოლმე. გულწრფელად ყვება, რომ არცერთმა იცოდა, რას აკეთებდა და ყველაფერს თამაშის სახე ჰქონდა... იცოდნენ, რომ ტელევიზორში ნანახისთვის უნდა მიებაძათ, თუმცა არ ეგონათ, თუ რამე საშინელებას აკეთებდნენ. როცა ყველაფერში გაერკვნენ და მიხვდნენ მათი გართობა რასაც ნიშნავდა, უკვე ყველაფერი გვიან იყო. ამბობს, რომ ამ პერიოდს მალე გარდატეხის ასაკიც დაერთო და გრძნობებისა და ვნებების მოთოკვა ვერცერთმა ვეღარ შეძლო და ბიძაშვილების ვნებას ისევ თავაშვებულ თავისუფლება მიეცა... იმ წუთას მოწონდათ და რაკი ვითარების გამოსწორება შეუძლებელი იყო, აღარც შედეგებზე უფიქრიათ... სიამოვნებდათ და მორჩა!!!
ყველაფრისთვის წერტილის დასმა მას შემდეგ შეძლეს, როცა უკვე ერთმანეთისთვის თვალებში შეხედვისაც სცხვენოდათ, როცა გაუცნობიერებელ საქციელში გამოერკვნენ და მწარე რეალობის მოწმე გახდნენ. ძალიან დაიბნნენ, დეპრესია დაეწყოთ...
,,მოძველებული აზროვნება არ მაქვს, არც ნაადრევი სექსუალური ცხოვრება მიკვირს და დეპრესია ამას არ გამოუწვევია. ყველაზე დიდი შოკი ის იყო, რომ მართლა გაუცნობიერებლად ვაკეთებდით, თამაში გვეგონა და, ძალიან იმოქმედა იმ ფაქტორმა, რომ ეს ყველაფერი დეიდაშვილთან მოხდა... – სევდით ცრემლმორეული იხსენებს.
დეპრესია დიდხანს გაგრძელდა, სკოლის დამთავრებისთანავე თბილისს მიაშურა. ახლა წლინახევრის შვილს მარტო ზრდის. ამბობს, რომ ოჯახი არ შეუქმნია, შვილი ზუგდიდელი მამაკაცისგან ჰყავს, რომელიც წარსულის მიუხედავად ყველაფრის დავიწყებას დაპირდა და ცოლობა შესთავაზა. მალე ეს ყველაფერი ფარსი აღმოჩნდა... ის ბიჭიც დაიკარგა, ბავშვის დაბადების შემდეგ აღარც უნახავს. დეიდაშვილ ბიჭს კი თავისი ოჯახი აქვს და მათი წარსულის შესახებ არავინ იცის... მასთან მას შემდეგ აღარ უსაუბრია. საიდუმლო შინაგანად ღრღნის, ამბობს მთლიანად მანადგურებსო და რაკი ინკოგნიტოდ მაგრამ ყველაფერს გულწრფელად ყვება, მიაჩნია, რომ ამით შვებას იგრძნობს...
ფინანსური პრობლემები არ აქვს, თორემ ალბათ ვერც ბავშვის გაზრდას მოვახერხებდი და გავგიჟდებოდიო... თბილისში, ბანკის ერთ-ერთ ფილიალში მუშაობს, მაღალი ანაზღაურება აქვს. ჰყავს მეგობარი მამაკაცი, რომელიც ცოლ-შვილიანია, მაგრამ ტკივილს უმსუბუქებს. იძულებულია, ასეთი ცხოვრების სტილს შეეგუოს. სხვებისგან განსხვავებით ბავშვობის გახსენება არ უნდა, რადგან მისთვის წარსული ტკბილ ბავშვობასთან არ ასოცირდება. ქიზიყის კითხვაზე, ხომ არ იყო თავდაპირველად დეიდაშვილის მხრიდან დაშინების ან იძულების მომენტები - ხაზგასმით ამბობს, რომ ისინი და-ძმებივით იზრდებოდნენ, მშობლები ერთად ხშირად ტოვებდნენ. სხვაგვარად არავის უფიქრია, მაგრამ თამაშები აკრძალულ მეთოდებში ისე გადაიზარდა, ვერაფერს მიხვდნენ... როცა მიხვდნენ მაშინ კი აღარაფრის შეცვლა შეეძლოთ.
ამიტომაც გაურბის წარსულს... ცდილობს, დედოფლისწყაროსგან თავი შორს დაიჭიროს. ძნელია საკუთარი ფესვები დაივიწყო, მაგრამ როცა ეს ყველაფერი საშინელ ფაქტებთან ასოცირდება, მაშინ ყველაფერი შესაძლებელი ხდება... /ქიზიყი/ შორენა ბერიძე

საგამომცემლო სახლ "ღია ბოქლომის" დამფუძნებელი ჟურნალისტი ილია ჩაჩიბაია დააკავეს

რუსთაველის გამზირზე პოლიციელებმა საპროტესტო აქციის რამდენიმე მონაწილე დააკავეს. სამართალდამცველებმა აქციის მონაწილეები მას შემდეგ დააკავეს, რაც რუსთაველის გამზირის სავალ ნაწილზე გადასვლა მეორედ სცადეს.

დაკავებულები არიან ჯაბა ჯიშკარიანი, მიხეილ მუმლაძე და ილია ჩაჩიბაია. მანამდე კი, ზაზა სვანაძე დააკავეს. რუსთაველის გამზირზე და მიმდებარე ტერიტორიაზე, ქაშუეთის ეკლესიასთან მობილიზებული იყვნენ პოლიციის თანამშრომლები.

გოგა ხაინდრავამ აქციის მონაწილეთა დაკავებას უკანონო უწოდა და აღნიშნა, რომ ”აქციის მონაწილეები საკუთარ აზრს და პროტესტს გამოხატავდნენ ქვეყანაში არსებულ უკანონობასთან და სანდრო გირგვლიანის მკვლელობასთან დაკავშირებით”.
რუსთაველის გამზირზე საპროტესტო აქციას, როგორც თავად აქციის ორგანიზატორები ამბობენ, სანდრო გირგვლიანის მკვლელობიდან 6 წლისთავთან დაკავშირებით მართავენ. აქციაში რამდენიმე ახალგაზრდული ორგანიზაციისა და ზოგიერთი ოპოზიციური პარტიის წარმომადგენლები მონაწილეობენ.

მიუხედავად იმისა, რომ ჟურნალისტმა ილია ჩაჩიბაიამ პოლიციელებს რამდენჯერმე განუმარტა, რომ პროფესიულ მოვალეობას ასრულებდა და ჟურნალისტი იყო, შსს–ს თანამშრომლებს ეს არ გაუთვალისწინებიათ. ჟურნალისტის გათავისუფლებისკენ პოლიციას სხვა მედიასაშუალებების წარმომადგენლებიც მიუთითებდნენ, თუმცა ამაოდ.

ჩაჩიბაიას განცხადებით, ის ტროტუარიდან იღებდა კადრებს, თუ როგორ აკავებდნენ აქციის მონაწილე ჯაბა ჯიშკარიანს და კიდევ რამდენიმე აქტივისტს.

„კადრების გადაღების დროს, პოლიციელების მხრიდან აქციის მონაწილეთა წინააღმდეგ, ძალის გადამეტება გავაპროტესტე. სწორედ მაშინ მომცვივდნენ პოლიციელები და დამაკავეს. დაკავების მომენტში ჩემმა ნაცნობმა ჟურნალისტებმა დამინახეს და პოლიციელებს უთხრეს რომ ჟურნალისტი ვიყავი. სამართალდამცავებმა მათი თანდასწრებით გამათავისუფლეს, მაგრამ როგორც კი ისევ განვაგრძე დაკავების ფაქტების გადაღება, ისევ დამიჭირეს და მობილური ტელეფონი წამართვეს. პრესბარათი ვაჩვენე, ვუთხარი, რომ ჩემი დაკავების უფლება არ ჰქონდათ, რაც არ გაითვალისწინეს და მანქანაში ჩამტენეს. მათ ჩემი მისამართით ცინიკური და შეურაცმყოფელი საუბარი დაიწყეს. მეუბნებოდნენ: „ ახლა შენმა რადიო „ობიექტივმა“, ოპოზიციამ და ივანიშვილმა გიშველოსო“. უკვე აეროპორტის გზაზე ვიყავით, შინაგან საქმეთა სამინისტროსთან, როცა პოლიციელებს ტელეფონზე უცნობი პიროვნება დაუკავშირდა და სავარაუდოდ ჩემი გაშვება უბრძანა. სწორედ მაშინ ჩამომსვეს მანქანიდან“, – აცხადებს ჩაჩიბაია.

მისივე თქმით, ის როგორც ჟურნალისტი, მოქალაქე და უფლებადამცველი მოითხოვს დაუყოვნებლივ გაათავისუფლონ აქციაზე დაკავებული ახალგაზრდები. /ქიზიყი/

დედოფლისწყაროს გამგებელი თაფლობის თვის გასატარებლად დუბაიში იმყოფება

EXCLUSIVE - დედოფლისწყაროს მუნიციპალიტეტის ახლადდაქორწინებული გამგებელი ნიკოლოზ შანშიაშვილი მეუღლესთან ერთად საქორწინო მოგზაურობაში იმყოფება. როგორც „ქიზიყმა“ გაარკვია, წყვილი 10 დღით არაბეთის გაერთიანებული საამიროების ქალაქ დუბაიში იმყოფება.

ნიკოლოზ შანშიაშვილისა და თეა ლეკაშვილის ქორწილი თბილისის ერთ–ერთ რესტორანში მიმდინარე წლის 22 იანვარს გაიმართა. შეგახსენებთ, 22 იანვარს დედოფლისწყაროს გამგებლის დაბადების დღეც გახლავთ, ამდენად, სავარაუდოდ, ქორწინების დღის ამ თარიღისთვის დამთხვევა სიმბოლურ დატვირთვასაც ატარებდა.

„ქიზიყის“ ექსკლუზიური ინფორმაციით, ჯვრისწერა თბილისში, სიონის საკათედრო ტაძარში გაიმართა. ცნობისთვის, პატარძლის მეჯვარე კახეთის გუბერნიის ადმინისტრაციის უფროსი ნათია კაციაშვილი გახლდათ. ცერემონიას ოფიციალური პირებიც ესწრებოდნენ.

დედოფლისწყაროს გამგებელი ნიკოლოზ შანშიაშვილი და გამგეობის მოქალაქეთა მომსახურების ბიუროს ხელმძღვანელი თეა ლეკაშვილი ახლახან დაქორწინდნენ. ამჟამად გამგებლის მოვალეობას შანშიაშვილის პირველი მოადგილე ალექსანდრე ალუღიშვილი ასრულებს.

ნიკოლოზ შანშიაშვილი 36 წლის ასაკში დაქორწინდა. ცნობისთვის დასაოჯახებელი გახლავთ დედოფლისწყაროს მუნიციპალიტეტის საკრებულოს თავმჯდომარე ლევან ბაღაშვილიც.

ნეტგაზეთ „ქიზიყის“ ადმინისტრაცია ახლადშეუღლებულ წყვილს ულოცავს ქორწინებას, ღვთის მფარველობას და ცხოვრების ლამაზად გატარებას უსურვებს. /ქიზიყი/ ილია მარტყოფლიშვილი – აუდიო>>

გამოხმაურება: რადიო ჰერეთი ;

ოპოზიციის შეფასებით, „სათნოების სახლში“ განუკითხაობაა

„თავისუფალი საქართველოს“ დედოფლისწყაროს ორგანიზაცია „სათნოების სახლში“ არსებულ ვითარებას განუკითხაობას უწოდებს.

მოძრაობა „თავისუფალი საქართველოს“ დედოფლისწყაროს ორგანიზაციის თავმჯდომარე თამილა გურაშვილის თქმით, დედოფლისწყაროში არსებულ არასამეწარმეო, არაკომერციულ იურიდიული პირი “სათნოების სახლი“ 2012 წელს ადგილობრივი ბიუჯეტიდან 170 000 ლარით დაფინანსდა. გასულ წელს სათნოების სახლის დაფინანსება 145 000 ლარი იყო. სოციალურად დაუცველი ხალხი, რომელთა რაოდენობა 180-ს შეადგენს, ხშირად გამოთქვამს უკმაყოფილებას უხარისხო საკვებზე, პურის წონის სიმცირეზე, სათნოების სახლის დირექტორის ნუგზარ მახარაშვილის არაადეკვატურ და უხეშ დამოკიდებულებაზე მათ მიმართ, სათნოების სახლში ხშირია კონფლიქტები, ჩხუბი, აყალ-მაყალი, გაწევ-გამოწევა, რაც ხშირად შუქდება ადგილობრივ და კახეთის მედიის მიერ.

,,უნდა აღინიშნოს ის ფაქტი, რომ სათნოების სახლის ბენეფიციარების კატეგორია არის მრავალფეროვანი. ნაციონალური მთავრობის ანტიხალხურმა პოლიტიკამ ბევრი ყოფილი ინტელიგენციის წარმომადგენელი მიიყვანა უკიდურეს გაჭირვებამდე და ისინი იძულებულნი არიან იკვებონ სათნოების სახლში. აქ მრავლად არიან ფსიქიურად დაავადებული და ასევე ფსიქიურად არამდგრადი და გაუწონასწორებელი ხალხი, რომელთა იქ კვება საფრთხეს უქმნის სხვა უმწეო მოხუცებს. ინტერნეტ გაზეთი „ქიზიყი“ ხშირად წერს იქ გამეფებულ განუკითხაობებზე. აღსანიშნავია ის ფაქტიც, რომ სათნოების სახლის დირექტორი, ნუგზარ მახარაშვილი არის გამგებლის მოადგილის, ალექსანდრე ალუღიშვილის მეზობელი და მეგობარი. მისი მოადგილე ანუ საქმის მწარმოებელი გახლავთ ნუგზარ მახარაშვილის დედა ციცინო დარჩიაშვილი, შიდა კულუარულად დედა-შვილის პარპაშს საზღვარი აღარ აქვს. პირადად მოგვისმენია ნუგზარ მახარაშვილის სათნოების სახლის მობინადრეებს როგორ დაღრიალებს თავზე - ვისაც არ მოგწონთ, მიბრძანდით აქედან, ჩვენ მაინც ვერაფერს დაგვაკლებთო. ასევე პირადად მოგვისმენია თუ როგორ მიმართავდა სათნოების სახლის ერთ-ერთ ბენეფიციარს: - შენ ხომ უვიცი ხარ, რა უნდა გაგაგებინო?-თუ პურის ხარისხი არ მოგწონთ, საერთოდ დავკეტავთო სათნოების სახლს - ასე ემუქრებიან უმწეობებს. ისინიც შეშინებულები, იმით რომ მშივრები არ დარჩნენ, ჩუმდებიან. იყო შემთხვევა, როდესაც ერთერთმა ბენეფიციარმა გამოთქვა უკმაყოფილება პურის ხარისხზე, ადმინისტრაციამ კი პოლიცია გამოიძახა და მას დააწერინეს ხელწერილი, რომ ამას აღარ გაიმეორებდა", _ აცხადებს გურაშვილი..

“თავისუფალი საქართველოს" დედოფლისწყაროს ორგანიზაცია აპროტესტებს სათნოების სახლის დირექტორის ,,ამ დამამცირებელ დამოკიდებულებას ბენეფიციარებისადმი".

გურაშვილის თქმით, 170 000 ლარიდან 50 400 ლარი სათნოების სახლის 11 მომსახურე პერსონალზე უნდა გაიხარჯოს. ბენეფიციარებისთვის რჩება 119 600 ლარი. მარტო სათნოების სახლის დირექტორზე ერთ წელში უნდა გაიხარჯოს 8 400 ლარი. ბენეფიციარები აღნიშნავენ,რომ გაზრდილი დაფინანსება არა მათი კვების გაუმჯობესებაზე, არამედ მომსახურე პერსონალის ხელფასების გაზრდაზე იხარჯება. არადა მომსახურე პერსონალიდან სულ 6-ამდე ადამიანი მუშაობს სრული დატვირთვით.

“თავისუფალი საქართველო“ მიმართავს ადგილობრივ საკრებულოს, შეამცირონ ის კადრები, რომლებიც არანაირ ფუნქციას არ ასრულებენ დაწესებულებაში და მხოლოდ ხელფასს იღებენ თვის ბოლოს. ,,ნუგზარ მახარაშვილი, რომელიც გახლავთ დირექტორი საერთოდ იშვიათად ცხადდება სამსახურში და პირადად ასეთი პასუხი გამცა- „დირექტორი იმიტომ ვარ, მინდა მოვალ და მინდა არაო!“. მისი და ე.წ მთავარი სპეციალისტის (რომელიც ფუნქციურად არანაირ მოვალეობას არ ასრულებს) განთავისუფლებით წელიწადში დაიზოგება 11 400 ლარი და შესაბამისად გაუმჯობესდებოდა ბენეფიციარების კვება.

“თავისუფალი საქართველო“ გმობს საკრებულოს გადაწყვეტილებას, მხოლოდ მომსახურე პერსონალის, მათთვის დაახლოებულ პირებზე ხელფასის გაზრდის შესახებ და მოითხოვს სათნოების სახლის დირექტორ-მოადგილე, დედაშვილიდან დატოვოს მხოლოდ ერთი, რადგან მეორე შტატი სრულიად უსარგებლოა და ყველაზე მთავარი, რამდენად მიზანშეწონილია დედა-შვილი განკარგავდნენ ბიუჯეტიდან ჩარიცხულ 170 000 ლარს~, _ აცხადებს თამილა გურაშვილი. /ქიზიყი/ მედიანიუსი ; პირველი ;

საინგილოში, 8 წლის ნათიას ქართული სახელით დარეგისტრირების უფლება მისცეს

EXCLUSIVE - საინგილოში, ზაქათალას რაიონში მცხოვრებ 8 წლის ნათიას, რომელიც დოკუმენტების არარსებობის გამო სკოლაში სიარულს ამ დრომდე ვერ ახერხებდა, აზერბაიჯანულმა მხარემ ქართული სახელით დარეგისტრირების უფლება რამდენიმე წლიანი მოთხოვნის შემდეგ მისცა.

როგორც "ქიზიყს" საინგილოში მოქმედ ინტერნეტ-გაზეთ "ჰერეთის" რედაქტორმა ზაურ რამაზანოვმა ექსკლუზიურად განუცხადა, ოჯახმა ყველა საჭირო დოკუმენტის მოგროვება მოახერხა, რაც პატარა გოგონას შესაძლებლობას მისცემს სკოლაში იაროს და განათლება მიიღოს.

საინგილოში მცხოვრები ქართველების პრობლემებზე ისაუბრეს გასული წლის ივნისში დედოფლისწყაროში გამართულ პარლამენტის დიასპორისა და კავკასიის საკითხთა კომიტეტის გასვლით სხდომაზე. აღნიშნა, რომ ადგილობრივი ხელისუფლება ქართველ ოჯახებს ბავშვებისთვის ქართული სახელების დარქმევას უკრძალავს. განხილვის მთავარი თემა ქართულ-აზერბაიჯანული ურთიერთობები და აზერბაიჯანის ქართული დიასპორა იყო. მოხსენებით კომიტეტის თავმჯდომარე ნუგზარ წიკლაური გამოვიდა.

წიკლაურის განმარტებით, ქართული სახელების მქონე მოზარდებს აზერბაიჯანის ხელისუფლება პირადობის მოწმობებს არ აძლევს და სახელის გადაკეთებას აიძულებს. დოკუმენტების არარსებობის გამო კი ქართველი ოჯახები ბავშვებს ვერც სკოლაში ატარებენ და განათლების მიღების საშუალებაც წართმეული აქვთ.

,,სამაგალითოა ზაქათალაში მცხოვრები ოჯახი, რომელსაც 3 შვილი ჰყავს. უფროსი შვილი ნათია 8 წლისაა, მაგრამ განათლების მიღებას ვერ ახერხებს, რადგან ქართული სახელის გამო მას არც პირადობის მოწმობა მისცეს. ამ ოჯახმა საქართველოს პარლამენტს დახმარების თხოვნით წერილი გამოუგზავნა. ნათიას მშობლები არ მალავენ, რომ ადგილობრივი ხელისუფლება სახელის გადაკეთებას აიძულებს, ამას ისინი არ თანხმდებიან, დოკუმენტების გარეშე კი გოგონა ვერც საბავშვო ბაღში შეიყვანეს და ვერც სკოლაში.

ზოგადად, ქართულ-აზერბაიჯანულ ურთიერთობებში მნიშვნელოვანია ადგილობრივი მუნიციპალიტეტების ხელმძღვანელობა უფრო აქტიურად თანამშრომლობდეს მოსაზღვრე აზერბაიჯანის ცალკეულ რაიონებთან. ასეთი მუნიციპალიტეტები ჩვენთან ლაგოდეხი და დედოფლისწყაროა, სწორედ ამიტომაც გადავწყვიტეთ, გასვლითი სხდომა დედოფლისწყაროში გამართულიყო. სერიოზულად განსახილველი საკითხია საინგილოში ქართული სკოლებისა და საბავშვო ბაღების გახსნის საკითხი. ამჟამად საინგილოში ქართული სკოლა არ არსებობს. მართალია არის ქართული სექტორები, მაგრამ რადგან საბავშვო ბაღი არ არის, საწყის ეტაპზე პატარები აზერბაიჯანელ მოზარდებთან ურთიერთობენ და თავიდანვე მათ ენაზე ეჩვევიან.

რაც დრო გადის, მით ნაკლები ქართული სექტორი რჩება. ზაქათალაში ამჯერად 2 ქართული სექტორია და აქედან 1 გაუქმების პირასაა. როცა ადგილობრივ ხელისუფლებას მიზეზებზე ვეკითხებით, ამბობენ, რომ კონტინგენტი არ არსებობს, ცოტა ბავშვი დადის და იძულებული არიან დახურონ. არ არსებობს ქართული ტოპონიმი. მხოლოდ 1 იყო - ვერხვიანი და ისიც შეცვალეს. ყოველი წელი იქ მცხოვრებ ადამიანებს ქართულ ენასთან სულ უფრო აშორებს. ელჩთანაც გვქონდა შეხვედრები, მათ კულტურის სამინისტროსთანაც, მაგრამ რეალურად არაფერი იცვლება, ვითარება უარესდება. სოფელ ალიაბადში დაიხურა ქართული სკოლა და საბავშვო ბაღი.

სერიოზულად დასაფიქრებელი ვითარებაა. არ უნდა გვქონდეს უკან სვლა. უნდა შევჯერდეთ, რომ მთელი სახელმწიფო ჩავერთოთ პროცესში. სერიოზული კომიტეტის სხდომა უნდა ჩავატაროთ. აუცილებელია მეტი ჩართულობა, სხვაგვარად არაფერი გამოვა. წელიწადში ერთხელ ჩასვლა და 10 ბურთის ჩატანა არაფერს შეცვლის. მომავალ ჩასვლაზე ისევ იგივე პრობლემები დაგვხვდება," - აცხადებდა საპარლამენტო კომიტეტის თავმჯდომარე ნუგზარ წიკლაური დედოფლისწყაროში გამართულ გასვლით სხდომაზე. /ქიზიყი/ ილია მარტყოფლიშვილი

კახეთს ახალი ლოგო და სლოგანი აქვს

კახეთის რეგიონს ამიერიდან ახალი ლოგო და სლოგანი აქვს. როგორც თელავის ტურიზმის სამსახურში განაცხადეს, ლოგო იმ სამ ძირითად მიმართულებას მოიცავს, რითაც კახეთია გამორჩეული.

პირველი სუბლოგო ისტორიულ-კულტურულ მემკვიდრეობას აღნიშნავს, მეორე სუბლოგო კახეთში არსებულ სათავგადასავლო ტურიზმის პოტენციალზე მიანიშნებს, მესამე კი ღვინის დაყენების კულტურაზე მეტყველებს.

„აღმოაჩინე შენი კახეთი“ - ეს კახეთის სლოგანია. ტურიზმის სამსახურის ცნობით, აქაც აქცენტი სამ მიმართულებაზე კეთდება. ლოგო და სლოგანი ორგანიზაცია „Co. Strategy & Design“-ის მიერ არის შემუშავებული.

შეგახსენებთ, 2012 წელი კახეთის ტურისტულ წლად გამოცხადდა. 24 იანვარს კახეთის ტურისტული განვითარების პროექტის პრეზენტაცია, თბილისში სასტუმრო „Holiday inn“-ში კახეთის გუბერნატორმა გიორგი ღვინიაშვილმა, ტურიზმის ეროვნული ადმინისტრაციის ხელმძღვანელმა მაია სიდამონიძემ და ეკონომიკის და მდგრადი განვითარების მინისტრმა ვერა ქობალიამ გამართეს.

რეგიონის ტურისტული განვითარებისთვის 2012 წელს ინფრასტრუქტურულ სამუშაოებზე ცენტრალური და ადგილობრივი ბიუჯეტიდან 100 მილიონი აშშ დოლარი დაიხარჯება. თელავის, ყვარლის და დართლოს რეაბილიტაციას კი მსოფლიო ბანკი 50 მილიონი აშშ დოლარით დააფინანსებს.

კახეთის გუბერნატორის გიორგი ღვინიაშვილის განცხადებით, კახეთის ტურისტული განვითარების პროექტის ფარგლებში ასევე იგეგმება თუშეთთან მისასვლელი გზის რეაბილიტაცია. მსოფლიო ბანკთან კი გურჯაანში მდებარე კურორტ ახტალის აღდგენა-განვითარებასთან დაკავშირებით მიმდინარეობს მოლაპარაკებები.
„გურჯაანში არის უნიკალური სამკურნალო ტალახით ცნობილი კურორტი ახტალა. მსოფლიო ბანკთან მიმდინარეობს აქტიური მუშაობა და იმედი გვაქვს, რომ ამ კურორტის აღდგენა - განვითარება მოხდება. თუშეთის მიმართულებით გზის რეაბილიტაცია მიბმული იქნება კახეთის ტურისტული განვითარების პროექტთან. გვინდა, რომ მაქსიმალურად უსაფრთხო იყოს ეს გზა და მგზავრობის დროც შემცირდეს. ამიტომ, პარალელურად დაიწყება გზის სამუშაოებიც. გზაზე არის ერთი მონაკვეთი, სადაც დიდხანს დევს ხოლმე თოვლი და გვინდა ამ გზის შემოვლა შესაძლებელი იყოს. კახეთში ასევე არის ძალიან ლამაზი ადგილი, ბარჯისხევი, იგივე ყურყურა, ძალიან ლამაზი წყაროა და გეგმაში გვაქვს რომ ეს ადგილიც განვითარდეს, რადგან დღეს არ აქვს ისეთი სახე, როგორიც უნდა ჰქონდეს,“ - აღნიშნა გიორგი ღვინიაშვილმა.
კახეთის ტურისტული განვითარების პროექტის პირველი ეტაპი ზაფხულისთვის დასრულდება. /ქიზიყი/

საკრებულოს 26 იანვრის სხდომაზე დეპუტატები გამგეობის წლიურ ანგარიშს მოისმენენ

დედოფლისწყაროს მუნიციპალიტეტის საკრებულოს 2012 წლის რიგით მეორე სხდომა 26 იანვარს 13:00 საათზე გაიმართება. დეპუტატები გამგეობის წლიურ ანგარიშს მოისმენენ. ამის შესახებ ინფორმაციას საკრებულოს აპარატი ავრცელებს.

ლევან ბაღაშვილის შვებულების გამო სხდომას საკრებულოს თავმჯდომარის მოადგილე, საკრებულოს თავმჯდომარის მოვალეობის შემსრულებელი ზაზა ფიროსმანაშვილი გაუძღვება.
სხდომა განიხილავს ცვლილებებს ბიუჯეტში, შესყიდვებში და თანამდებობრივ სარგოებში. ასევე, იმსჯელებს საკითხზე ქონების გადასახადის შესახებ.

საკრებულოს პრესასთნ ურთიერთობის სპეციალისტის შეცვლის შემდეგ ოფიციალურ ვებგვერდზე საკრებულოს სხდომების ჩატარების თარიღების წინასწარ ანონსირების ტრადიცია დარღვეული იყო.

პირველი ანონსი თვითმმართველობის საიტზე 24 იანვარს მას შემდეგ გამოჩნდა, რაც მედიასაშუალებებში ამ უარყოფით ტენდენციაზე გამახვილდა ყურადღება. სხდომების დაანონსების გარეშე ჩატარება ოპოზიციურმა პარტიებმაც გააპროტესტეს და ამ საკითხზე სპეციალური განცხადებაც გაავრცელეს. როგორც ჩანს პრესასთან ურთიერთობის სპეციალისტმა ამჯერად კიდევ ერთი მკაფიო მითითება მიიღო.

ცნობისთვის, უკვე მერამდენე თვეა დედოფლისწყაროს მუნიციპალიტეტის საკრებულოს მიერ საკუთარ ვებ–გვერდზე სხდომების საკრებულოს პრესასთან ურთიერთობის სპეციალისტი ნინო მეხრიშვილი მუნიციპალიტეტის ოფიციალურ ვებ–გვერდზე საზოგადოებისთვის და ადგილობრივი მედიასაშუალებების წარმომადგენლებთან სხდომების დაგეგმვის თაობაზე ინფორმაციის მიწვდას არ ახდენდა. პრობლემას აღიარებდა საკრებულოს აპარატის უფროსი ხათუნა გონაშვილიც, რომელმაც საკითხის დარეგულირების პირობა ჯერ კიდევ სამი თვის წინ დადო. /ქიზიყი/ ილია მარტყოფლიშვილი

გაურკვეველ ვითარებაში გარდაცვლილი ვახტანგ პოპიაშვილის ოჯახი მკვლელობაზე საუბრობს და ხელახალ გამოძიებას ითხოვს

თურქეთში ერთი წლის წინ გაურკვეველ ვითარებაში გარდაცვლილი 27 წლის ვახტანგ პოპიაშვილის ოჯახის წევრები საქმის ხელახალ გამოძიებას ითხოვენ. ისინი ეჭქვეშ აყენებენ თურქული პოლიციის დასკვნას, რომლის მიხედვითაც ახალგაზრდამ სიცოცხლე თვითმკვლელობით დაასრულა. მათი განცხადებით, ახალგაზრდა სასტიკი წამებით მოკლეს.

ახალგაზრდის მკვლელობის შესახებ ინფორმაცია იმხანად „ქიზიყმა“ ექსკლუზიურად გაავრცელა, ოჯახი გვამის სამშობლოში დამოუკიდებლად გადმოსვენებას ვერ ახერხებდა და დახმარებას ითხოვდა.
ვახტანგ პოპიაშვილი დედოფლისწყაროში, ჰერეთის ქუჩაზე ცხოვრობდა და დასაქმების მიზნით დროებით თურქეთში იმყოფებოდა. როგორც გარდაცვლილის და მანონი პოპიაშვილმა „ქიზიყს“ განუცხადა, ახალგაზრდა ქორწილისთვის ფულს აგროვებდა.
გარდაცვლილის დედა აცხადებს, რომ ახლახან მას თურქეთიდან უცხო პირი დაუკავშირდა, რომელმაც შვილის სიკვდილის შესახებ ინფორმაცია და ახალი დეტალები მიაწოდა.
უცნობი პირის ნაამბობის მიხედვით, ქარხანაში რომელშიც პოპიაშვილი გარდაცვალებამდე მუშაობდა, ქურდობა მოხდა. პოპიაშვილი კი ამის თვითმხილველი გახდა. სწორედ ამ ფაქტს განიხილავენ დაღუპულის ახლობლები წამებისა და მკვლელობის მთავარ მოტივად.
"ჩემი შვილი ამ ქურდობის შემთხვევითი მოწმე გახდა. ჩვენი აზრით, სავარაუდოდ, ამიტომ მოიშორეს თავიდან. თურქეთის პოლიციამ დადო განცხადება, სადაც წერია, რომ თავი მოიკლა, მაგრამ ამ ვერსიის არ გვჯერა. სხეულზე არანაირი კვალი არ ჰქონდა, ნაცემი კი იყო", - განაცხადა გარდაცვლილის დედამ, ლალი პოპიაშვილმა.

პოპიაშვილის ცხედარი 2010 წლის აგვისტოში, თურქმა სამართალდამცავებმა ერთდღიანი ძებნის შემდეგ იპოვეს. პოლიციამ საქართველოს მოქალაქე თოკზე ჩამოკიდებული სტამბულში იმ ჯინსის ქარხნის ტერიტორიაზე აღმოაჩინა, სადაც თავად მუშაობდა. ოჯახის წევრებმა 18 აგვისტოს მომხდარის შესახებ 12 დღის დაგვაინებით შეიტყვეს. თურქეთში ვახტანგ პოპიაშვილი მკვლელობამდე ერთი თვით ადრე სამუშაოდ წავიდა.

ოჯახის ეჭვებს ის ფაქტიც ამყარებს, რომ პოპიაშვილთან ერთად თურქეთში მყოფი კიდევ ორი ქართველი რამდენიმე დღე მიმალვაში იყვნენ და ისინი ოჯახს მომხდარის შემდეგ აღარ გამოხმაურებიან. პოპიაშვილები აცხადებენ, რომ მათ გარდაცვლილის დანაზოგის შესახებ იცოდნენ. ჭირისუფლები აცხადებდნენ, რომ საქართველოს საელჩო ხელოვნურ დაბრკოლებებს ქმნიდა და გადმოსვენებაში დიდ ფულს ითხოვდა, ხელმოკლე ოჯახი კი ფინანსების მოძიებას ვერ ახერხებდა.

ვახტანგ პოპიაშვილის დედა, ლალი პოპიაშვილი ხელისუფლებას და დედოფლისწყაროს გამგეობას უყურადღებობაში ადანაშაულებდა. შვილმკვდარი დედა აცხადებს, რომ ხელისუფლებისგან თანადგომა ასეთ რთულ დღეებშიც ვერ იგრძნო.

„თურქეთში 6 ქართველთან ერთად იყო. მათი გვარები არ ვიცით, მხოლოდ მათი ტელეფონები ვიცი, მაგრამ ვრეკავთ და იმალებიან, ვეღარ ვუკავშირდებით... ეს ეჭვებს უფრო ამძაფრებს, რომ მკვლელობა ფულის გამო მოხდა. სულ ვედავებოდი, აღარ წახვიდე მეთქი, მაგრამ ბოლოს თქვა, ერთხელაც წავალ და მორჩაო... საკონსულოში მივედით და არაფერი დახმარება არ გაუწევიათ. ნაცნობ მეგობრებში მოვაგროვეთ 1 000 დოლარი და დამოუკიდებლად, ჩვენი სახსრებით ჩამოვასვენეთ... დედოფლისწყაროს გამგებელთან მივედით დახმარებაზე, ვიფიქრეთ, იქნებ გვერდში ამოგვიდგნენო, მაგრამ არ შეგვიძლიაო, ასეთ რთულ მომენტშიც უარით გამომისტუმრა... გაოგნებული დავრჩით,“ - განუცხადა „ქიზიყს“ გარდაცვლილის დედამ. /ქიზიყი/ ვიდეო>>

„რომ წაგიგდია მეტრიანი ენა, მალე ვნახავთ შენს სურათს ძებნილების სიაში დაფაზე გამოკრულს“

მოძრაობა "თავისუფალი საქართველოს" დედოფლისწყაროს ორგანიზაცია კუდ-ის თანამშრომლების მუქარას აპროტესტებს და ყველა უფლებადამცველ ორგანიზაციას პრევენციის მიზნით საქმის კურსში აყენებს.
"თავისუფალი საქართველოს" დედოფლისწყაროს ორგანიზაციამ ბოლო დროს მედიით კუდ-ის თანამშრომლებზე და მაფიოზურ-კლანური მმართველობის შესახებ ინფორმაცია გაახმაურა. აღნიშნულმა ფაქტმა, როგორც ჩანს, კუდ-ის ადგილობრივი თანამშრომლები გააღიზიანა და ისინი ფარული ზეწოლიდან ღია მუქარაზე გადავიდნენ. კუდ–ის თანამშრომელი ილია ნატროშვილი, რომლის არცერთი ნათესავი დაუსაქმებელი არ დარჩა, რაიონში ხელშეუხებელი პიროვნებაა.

"რომ წაგიგდია მეტრიანი ენა და რასაც გინდა, ლაპარაკობ, მალე ვნახავთ შენს სურათს ძებნილების სიაში დაფაზე გამოკრულს" - ასეთი მუქარის სიტყვებით მომმართა მან. ასეთი მუქარები ჯერ კიდევ ჩემი ინტრნეტ-გაზეთ "ქიზიყში" მუშაობის დროს ხშირი იყო როგორც მათგან, ასევე უშიშროების თანამშრომლებისგან.

"შენ და ჟურნალისტ ილია მარტყოფლიშვილს მდინარე ალაზანს გაგატანთ, მანქანაში ჩაგტენით, სამსახური სულ არ მადარდებს, ერთი მაგრად გცემთ" – და ასე შემდეგ, - მსგავსი მუქარები ადრე და ახლაც ჩვენს მიერ გახმიანებული კრიტიკული განცხადებებითაა გამოწვეული.

"დედოფლისწყაროდან არცერთი ინფორმაცია არ უნდა გავიდეს!" - ამ დევიზით მოქმედებენ თვითმმართველობის ჩინოვნიკები. მათ შესახებ კრიტიკა არასოდეს გასულა რაიონის ფარგლებს გარეთ, ახლა სხვაგვარადაა, რაც მათ ძალიან აღიზიანებთ.
"თავისუფალი საქართველოს" დედოფლისწყაროს ორგანიზაცია“ საქმის კურსში აყენებს ყველა არასამთავრობო და უფლებადამცველ ორგანიზაციას, რომ არც გვეშინოდა, არც გვეშინია და არც შეგვეშინდება სიმართლის გახმოვანების.

კუდ-ის თანამშრომლებს კი მოვუწოდებთ, თავი შეიკავონ ასეთი მუქარებისგან, რადგან ამ ადამიანებს გააჩნიათ სრული ძალაუფლება იმისათვის, რომ საკუთარი მუქარა სისრულეში მოიყვანონ. ხვალ ან ზეგ ხელისუფლების შეცვლის შემდეგ შეიძლება, ანალოგიურ მდგომარეობაში თვითონ აღმოჩნდნენ", - აცხადებს "თავისუფალი საქართველოს" დედოფლისწყაროს ორგანიზაციის თავმჯდომარე თამილა გურაშვილი. /ქიზიყი/

გამოხმაურება: რადიო ჰერეთი ; პირველი ; განცხადება ;

კლიმატის ცვლილების პროექტის კოორდინატორებმა დედოფლისწყაროში შეხვედრა გამართეს

21 იანვარს პროექტის ,,კლიმატის ცვლილებისადმი საადაპტაციო ღონისძიებების განსაზღვრა და მათი განხორციელება“ რეგიონული კოორდინატორი ანა რუხაძე და GIZ-ის ექსპერტი გია სოფაძე დედოფლისწყაროს ეწვივნენ და მუნიციპალიტეტის ხელმძღვანელ პირებს და ფერმერებს შეხვდნენ.

შეხვედრაში მონაწილეობდნენ მუნიციპალიტეტის საკრებულოს თავმჯდომრის მოადგილე ზაზა ფიროსმანაშვილი, გამგებლის მოადგილე, ადგილობრივი თვითმმართველობის ორგანოს სხვა თანამშრომლები და ფერმერები ელიზბარ იმერლიშვილი და ჯემალ კვანჭილაშვილი.

როგორც შეხვედრაზე აღინიშნა, 2011-2014 წლებში,სამხრეთ კავკასიის სამივე ქვეყანაში (საქართველო, სომხეთი და აზერბაიჯანი), განხორციელდება კიდევ ერთი გარემოსდაცვითი პროფილის პროექტი: ,,კლიმატის ცვლილებისადმი საადაპტაციო ღონისძიებების განსაზღვრა და მათი განხორციელება სამხრეთ კავკასიის არიდულ და სემი–არიდულ ეკოსისტემებში, აგრობიომრავალფეროვნების კონსერვაციისა და მდგრადი გამოყენების უზრუნველყოფის მიზნით.“

როგორც ზაზა ფიროსმანაშვილმა აღნიშნა, პროექტი კავკასიის რეგიონული გარემოსდაცვითი ცენტრის მიერ, ევროკომისიის ფინანსური მხარდაჭერით ხორციელდება. პროექტის თანადამფინანსებელია გერმანიის საერთაშორისო თანამშრომლობის საზოგადოება (GIZ).

პროექტის მიზანია სამხრეთ კავკასიის ქვეყნებში, განსაკუთრებით მოწყვლად არიდულ და სემი-არიდულ ეკოსისტემებში, კლიმატის ცვლილების ზეგავლენისადმი საადაპტაციო შესაძლებლობების განვითარება აგრობიომრავალფეროვნებისა და ადგილობრივი მოსახლეობისადმი საარსებო წყაროს შენარჩუნების მიზნით.
შეხვედრაზე აქტიურად განიხილებოდა დედოფლისწყაროში არსებული მდგომარეობა , პრიორიტეტული პრობლემები და პრევენციული ღონისძიებების შესაძლო ვარიანტები. /ქიზიყი/

რამდენი ათასი უფეშქაშეს ნაცმოძრაობას ვანო ლოლაშვილის ორგანიზაციამ, „ბაკა+“მა და წითელწყაროში რეგისტრირებულმა შპს „ეტლი 2006“–მა

„ერთიანმა ნაციონალურმა მოძრაობამ“ პარტიის ოფიციალურ ვებგვერდზე იმ კომპანიების ნუსხა გამოაქვეყნა, რომლებმაც 2011 წელს პარტიას თანხები ჩაურიცხეს. გამოქვეყნებული ინფორმაციის თანახმად, „ნაციონალურმა მოძრაობამ“ 2011 წლის განმავლობაში 1 520 000 ლარის ოდენობის შემოწირულობა მიიღო.
ახალი მონცემების გარდა, ჟურნალისტებს ხელში ჩაუვარდათ მმართველი გუნდის შემომწირველთა საკმაოდ მოცულობითი სიაც, სადაც 434 დასახელების კომპანია ფიქსირდება, გადარიცხული თანხა კი 12 მლნ 667 ათას ლარს აღემატება...

„ქიზიყმა“ ვრცელ სიას თვალი ყურადღებით გადაავლო და აღმოაჩინა, რომ წინასაარჩევნო პერიოდში ნაციონალურ მოძრაობას ფული დედოფლისწყაროში მოქმედმა რამდენიმე ორგანიზაციამაც უფეშქაშა...

ოფიციალური მონაცემების მიხედვით, დედოფლისწყაროში მოქმედმა საგზაო სამმართველომ და მისმა ხელმძღვანელმა ვანო ლოლაშვილმა, რომელიც შპს „მექანიზატორი 2005“–ის სახელწოდებით ოპერირებს, „ნაციონალურ მოძრაობას“ 2 000 ლარი გადაურიცხა. ამას გარდა, დედოფლისწყაროს მუნიციპალიტეტის სოფელ წითელწყაროში დარეგისტრირებულმა შპს „ეტლი 2006“–მა მმართველ პარტიას 500 ლარი აჩუქა. წნორში რეგისტრირებულმა შპს „ბაკა+“მა კი, რომელმაც დედოფლისწყაროში რამდენიმე ინფრასტრუქტურული პროექტი განახორციელა და დაფინანსება დედოფლისწყაროს ადგილობრივი ბიუჯეტიდან მიიღო, „ნაციონალურ მოძრაობას“ 3 000 ლარი გადაურიცხა...

პარტიის ვებგვერდზე გამოქვეყნებულ განცხადებაში ნათქვამია, რომ „ერთიანი ნაციონალური მოძრაობის“ ინიციატივით, ევროპის საბჭოს ვენეციის კომისიის და GRECO-ს რეკომენდაციის გათვალისწინებით, საქართველოს პარლამენტი დამატებით მექანიზმებს ამტკიცებს პოლიტიკური პარტიების ფინანსების გამჭვირვალეობის უზრუნველსაყოფად.
„ერთიანი ნაციონალური მოძრაობის“ პოზიციაა, რომ ჩვენს საზოგადოებას სრული ინფორმაცია ჰქონდეს, ვინ და რა ოდენობით აფინანსებს პოლიტიკურ პარტიებს. ინფორმაცია საზოგადოებისათვის ხელმისაწვდომი უნდა იყოს, როგორც საარჩევნო, ასევე არასაარჩევნო პერიოდების დაფინანსების შესახებ. შესაბამისად, „ნაციონალური მოძრაობა“ აქვეყნებს იმ კომპანიების სრულ ნუსხას, რომელთაგანაც 2011 წელს „ნაციონალურმა მოძრაობამ“ შემოწირულობები მიიღო“, - აღნიშნულია განცხადებაში.

შემოწირულობების მიღების თარიღები და ოდენობა ასეთია: 26.09.2011 - შპს „ენკა მოლ“ - 100 000 ლარი; 26.09.2011 - შპს „ტერექს-XXI“ - 100 000 ლარი; 26.09.2011 - შპს „დ.თ.ჯ. ჯგუფი“ - 100 000 ლარი; 28.09.2011 - შპს „გზამშენი 5“ - 100 000 ლარი; 28.09.2011 შპს „გზამშენი 4“ - 100 000 ლარი; 29.09.2011 შპს „ტრანსპროექტი“ - 100 000 ლარი; 03.10.2011 შპს „სგრმზ დირექცია“ - 100 000; 03.10.2011 - სს „ხიდმშენი“ - 100 000 ლარი; 05.10.2011 - შპს „საქგზამეცნიერება“ - 100 000 ლარი; 05.10.2011 – „უნივერსალი93“ - 50 000ლარი; 05.10.2011 - შპს „იბოლია“ - 100 000 ლარი; 05.10.2011 - #1 სსს - 100 000 ლარი; 10.10.2011 - შპს „ჯი ჯგუფი“ - 50 000 ლარი; 28.10.2011 - შპს „ვანტი“ - 100 000 ლარი; 31.10.2011 - შპს „ჯეოკომფორტი“ - 50 000 ლარი; 14.12.2011 - შპს „ჯეოკომფორტი“ - 50 000 ლარი; 14.12.2011 - შპს „ჯეოთერმი“ - 100 000 ლარი; 14.12.2011 - შპს „ჩარკფი“ - 20 000 ლარი. /ქიზიყი/