პეტრე ცისკარიშვილი და გიორგი ბოტკოველი დედოფლისწყაროელებთნ შეხვედრებს განაგრძობენ

საპარლამენტო უმრავლესობის ლიდერი პეტრე ცისკარიშვილი დედოფლისწყაროელებთან შეხვედრებს განაგრძობს. უკვე მერამდენე დღეა ცისკარიშვილი ადგილობრივებს ხვდება.

ლიდერთან ერთად დედოფლისწყაროს მაჟორიტარი დეპუტატი ავთანდილ ლეკაშვილი, სოფლის მეურნეობის მინისტრის მოადგილე კოტე კობახიძე, „ერთიანი ნაციონალური მოძრაობის“ კახეთის რეგიონალური ორგანიზაციის თავმჯდომარე გიორგი ბოტკოველი, დედოფლისწყაროს მუნიციპალიტეტის საკრებულოს თავმჯდომარე ლევან ბაღაშვილი, თავმჯდომრის მოადგილე ზაზა ფიროსმანაშვილი, გამგებელი ნიკოლოზ შანშიაშვილი, საკრებულოს და გამგეობის წარმომადგენლები სოფლების: გამარჯვების და მირზაანის მოსახლეობას შეხვდნენ.

პეტრე ცისკარიშვილმა ისაუბრა სახელმწიფოს პრიორიტეტებზე: ჯანდაცვის, სადაზღვევო პროგრამებზე, განათლების რეფორმის ძირითად მიმართულებებზე, ტურიზმის განვითარების, პროფესიული გადამზადების და დასაქმების სამომავლო ხედვებზე, საკანონმდებლო სიახლეებზე.

კოტე კობახიძემ სოფლის მეურნეობის სფეროში არსებულ სიახლეებზე ისაუბრა და პირადად მოისმინა მოსახლეობისგან ამ საკითხებთან დაკავშირებული პრობლემები. კერძო პრობლემებთან დაკავშირებით მოსახლეობას შესაბამისი განმარტებები მისცეს პარლამენტარებმა და ადგილობრივი ხელისუფლების წარმომადგენლებმა.

რამდენიმე დღით ადრე მსგავსი შეხვედრა ცისკარიშვილმა ქალაქ დედოფლისწყაროს მოსახლეობასთანაც გამართა. მასთან ერთად დედოფლისწყაროელების მოსაზრებები მოისმინეს პარლამენტის ჯანდაცვის და სოციალურ საკითხთა კომიტეტის წევრმა გიორგი გოდაბრელიძემ, ლაგოდეხის მაჟორიტარმა დეპუტატმა გურამ კაკალაშვილმა, დედოფლისწყაროს მაჟორიტარმა დეპუტატმა ავთანდილ ლეკაშვილმა, დედოფლისწყაროს მუნიციპალიტეტის საკრებულოს თავმჯდომარემ ლევან ბაღაშვილმა, მუნიციპალიტეტის გამგებელმა ნიკოლოზ შანშიაშვილმა და საკრებულოს და გამგეობის წარმომადგენლებმა. შეხვედრა დიალოგის ფორმატით წარიმართა. იმსჯელეს ისეთ საჭირო საკითხებზე, როგორიცაა ჯანდაცვის ხელმისაწვდომობა, დასაქმების პრობლემები და სოციალური თემები.

შეგახსენებთ, საპარლამენტო უმრავლესობის წევრები 30 აპრილს დედოფლისწყაროს მუნიციპალიტეტის სოფელ არბოშიკისა და ოზაანის მოსახლეობასაც შეხვდნენ. /ქიზიყი/

დედოფლისწყარომ დროს გაუსწრო - „კომპიუტერულმა ცენტრმა“ პირველი ნაკადი უკვე გამოუშვა (აუდიო)

იმ ფონზე, როდესაც საქართველოს სოფლებში კომპიუტერული ცოდნის გამავრცელებელი საზოგადოებები მხოლოდ ახლა იქმნება, დედოფლისწყაროს მუნიციპალიტეტში შექმნილმა „კომპიუტერულმა ცენტრმა“ პირველი ნაკადი გამოუშვა. ამჯერად კურსი 36-მა მოსწავლემ დაასრულა.

დედოფლისწყაროში უფასო კომპიუტერული კურსები მიმდინარე წლის თებერვლიდან ფუნქციონირებს, პროექტი სოციალურად დაუცველი მოქალაქეებისთვის არის განკუთვნილი და მას არასამთავრობო ორგანიზაცია „ახალი თაობა – ახალი იდეა“ ახორციელებს.

პროექტის ხელმძღვანელი თამარ ბაღაშვილი ამაყობს, რომ დედოფლისწყარომ ჩვენს ქვეყანაში მიმდინარე მოვლენებს ბევრად გაუსწრო და პირველი რაიონი იყო, სადაც მსგავსი განათლების უფასო კურსები ფუნქციონირებს. უფრო მეტიც, ბაღაშვილი აღნიშნავს, რომ მისი ძალისხმევით 120 მოსწავლე უფასო განათლებას დედოფლისწყაროში ჯერ კიდევ 10 წლის წინ ეუფლებოდა, ეს კი მაშინ დაიწყეს, როცა კომპიუტერი სოფლებში ჯერ კიდევ უცხო ხილი იყო.

14 მაისს, დედოფლისწყაროს მოსწავლე ახალგაზრდობის სახლში კომპიუტერის შემსწავლელი კურსების პირველი ნაკადის გამოსაშვები საღამო გაიმართა.

ღონისძიებაზე მოსწავლეთა სამი ჯგუფი იყო წარმოდგენილი, რომლებიც სასურველი დღეების მიხედვით იყვნენ გადანაწილებულნი. ისინი სხვადასხვა საკითხებში ეჯიბრებოდნენ ერთმანეთს, მათ შორის კომპიუტერულ პროგრამებთან დაკავშირებული ვიქტორინაც გაიმართა, რომელსაც პედაგოგი და საღამოს წამყვანი მაყვალა მაძღარაშვილი წარადგენდა. კურსდამთავრებულებმა სათანადო ცოდნა გამოამჟღავნეს, რის შემდეგაც მოსწავლეებს სამახსოვრო საჩუქრებიც გადაეცათ. აღინიშნა, რომ სულ მალე ისინი კურსების გავლის შესაბამის მოწმობას მიიღებენ.

ღონისძიებას ესწრებოდნენ დედოფლისწყაროს მუნიციპალიტეტის ხელმძღვანელი პირები და არასამთავრობო ორგანიზაცია „ახალი თაობა – ახალი იდეა“-ს ხელმძღვანელი გიორგი პოპიაშვილი. მოსწავლეებს კურსის წარმატებით დასრულება მიულოცეს სკოლამდელი და სკოლისგარეშე სააღმზრდელო ცენტრის დირექტორმა მურად ოზაშვილმა და დედოფლისწყაროს საკრებულოს თავმჯდომრის მოადგილე ზაზა ფიროსმანაშვილმა.

სოციალურად დაუცველი მოქალაქეები „ქიზიყთან“ საუბარში აცხადებენ, რომ მათთვის კომპიუტერულ კურსებზე სიარული ეკონომიური სიდუხჭირის გამო წარმოუდგენელი იყო. მათი მრავალწლიანი ოცნების ასრულება კი დედოფლისწყაროს მუნიციპალიტეტის ხელმძღვანელებისა და არასამთავრობო ორგანიზაციის ძალისხმებით მოხერხდა, რისთვისაც მათ მადლობას უხდიან.

როგორც იდეის ავტორები აცხადებენ, პროექტი მიმდინარე წლის ნოემბერში უნდა დასრულდეს. ის ათი თვის მანძილზე გაგრძელდება და სოციალურად დაუცველებით დაკომპლექტებული თითეული ჯგუფი სამთვიან კურსს გაივლის. ოფისი ახალი კომპიუტერული ტექნიკით და შესაბამისი კვალიფიკაციის პედაგოგებითაა აღჭურვილი. თამარ ბაღაშვილი კომპიუტერის შესწავლის მსურველ სოციალურად დაუცველი ოჯახების წევრებს კვლავაც ელის. /ქიზიყი/ მოისმინეთ აუდიო>>

სოფელ გამარჯვების გაზიფიცირება სრულდება

EXCLUSIVE - აზერბაიჯანული კომპანია „სოკარი“ დედოფლისწყაროს მუნიციპალიტეტის სოფელ გამარჯვებაში რამდენიმე დღეში გაზიფიცირების პროცესს დაასრულებს. ბუნებრივ აირს სოფლის მაცხოვრებლების უდიდესი ნაწილი მიიღებს.

როგორც სოფელ გამარჯვების ტერიტორიული ორგანოს რწმუნებული ელგუჯა წიკლაური "ქიზიყთან“ საუბრისას აცხადებს, სოფლის გაზიფიცირების სამუშაოების დიდი ნაწილი უკვე დასასრულს უახლოვდება და მაისის მეორე ნახევარში გამარჯვებელები ბუნებრივ აირს მიიღებენ. რწმუნებულის განმარტებით, ცისფერი ალის გარეშე მხოლოდ სოფლის ორი პატარა უბანი დარჩება, თუმცა ქსელში ჩართვა იქაც იგეგმება.

„ადგილობრივი მაცხოვრებლების ძირითადი მოთხოვნა გაზიფიცირების საკითხის მოგვარება იყო. საქმე იმაშია, რომ მაგისტრალის სამშენებლო სამუშაოები ჩვენს სოფელში წლების მანძილზე ჭიანურდებოდა და მოსახლეობის უკმაყოფილებისა და პროტესტის მიზეზი ხშირად ხდებოდა. ახლა კი, სამუშაოების დასრულება მოხერხდა და წლობით ნანატრ ბუნებრივი აირის სიკეთეს სოფელ გამარჯვების მაცხოვრებლებიც სულ მალე გამოცდიან,“ - აღნიშნავს სოფლის რწმუნებული.

როგორც „ქიზიყმა“ გაარკვია, ამ დრომდე ბუნებრივ აირს სოფელ გამარჯვების 20-მდე ოჯახი იღებდა. ადგილობრივების განმარტებით, ბუნებრივი აირი წელიწადნახევარია მხოლოდ სოფლის ცენტრალური უბნის მაცხოვრებლებს მიეწოდებათ. ამ ინფორმაციას ჩვენთან საუბარში სოფლის რწმუნებულ ელგუჯა წიკლაურიც ადასტურებს.

„მთელი სოფლის მასშტაბით მილების ჩაფენა უკვე დასრულებულია, „სოკარის“ სპეციალისტების მიერ შემოწმებაც ჩაუტარდა. ბოლო დროს მოსახლეობის თხოვნა მუდმივად ბუნებრივი აირით უზრუნველყოფას ეხებოდა. ეს პრობლემა ჩვენს სოფელში მწვავედ იდგა და მადლიანი საქმე გაკეთდა. ამჟამად მაგისტრალის გარეშე მხოლოდ ორი პატარა უბანი გვრჩება, სადაც სულ ათამდე ოჯახი ცხოვრობს. მათ საკითხზეც ვმსჯელობთ და ვფიქრობ, დარჩენილი ნაწილის დასრულებასაც მალე დაიწყებენ,“ - ამბობს რწმუნებული.

სოფლის მაცხოვრებლები განხორციელებულ სამუშაოებს დადებითად აფასებენ და ამბობენ, რომ მათთვის გაზიფიცირების საკითხი პრინციპულად მნიშვნელოვანია. სოფელში 1 700-მდე მოსახლე ცხოვრობს. /ქიზიყი/ ილია მარტყოფლიშვილი

დედოფლისწყაროს ამბები – საინფორმაციო გამოშვება “კვირის ბოლოს” #9 (აუდიო) 12 მაისი

12 მაისი – რადიო24-ისა და “ქიზიყის” ერთობლივი პროექტი – საინფორმაციო ანალიტიკური გამოშვება “კვირის ბოლოს”#9

მეუფე მელქისედეკს ჟურნალისტის კითხვები აღიზიანებს – რის გასაიდუმლოებას ცდილობს ეპისკოპოსი და რატომ გაურბის ღიად საუბარს... რატომ გაორმაგდა ეპარქიის ჩამოყალიბების შემდეგ დედოფლისწყაროში სანთლის ფასი და რაზე წუხს დედოფლისწყაროელი მრევლი. არის თუ არა ეპარქიის შიგნით განხეთქილება???

დედოფლისწყაროს სახანძრო სამაშველო სამსახური სკანდალში გაეხვა – წვრთნების დროს შენობიდან ჩამოვარდნილი მაშველი თბილისში გადაიყვანეს – ოპოზიცია ლევან გოზალიშვილის პასუხისმგებლობის საკითხის დასმას ითხოვს და ირწმუნება, რომ უსაფრთხოების ნორმები დაცული არ იყო.

მოისმინეთ აუდიო

„საერთაშორისო გამჭვირვალობა – საქართველო“ კედელაშვილის დარიგებულ საჩუქრებზე შეფასებას აკეთებს

EXCLUSIVE – მსოფლიო თასის მფლობელი და ევროპის სამგზის ჩემპიონის ზაზა კედელაშვილის მიერ, დედოფლისწყაროში გამართულ, ბიძინა მაზიაშვილის ხსოვნის მეორე რესპუბლიკურ ტურნირზე საჩუქრების დარიგებასთან დაკავშირებით, არასამთავრობო ორგანიზაცია შეფასებას აკეთებს. დაირღვა თუ არა მოქმედი კანონი, ამ ფაქტზე კომენტარი გავლენიანი ორგანიზაცია „საერთაშორისო გამჭვირვალობა – საქართველო“-ს ხელმძღვანელმა ეკა გიგაურმა „ქიზიყის“ ჟურნალისტთან საუბრისას ექსკლუზიურად გააკეთა.

„კედელაშვილის ეს ქმედება, შესაძლოა, განხილული იყოს როგორც საარჩევნო კამპანია. თუმცა, სანამ ამ კანდიდატის საჯაროდ დასახელება, ან წარდგენა არ მოხდება, მედიის საშუალებით მაინც, მანამდე ვერ მოვედავებით. ამ შემთხვევაში საჩუქრების გადაცემა შეიძლება ითქვას მისი სახელის წინ წამოწევისთვის იყო გაკეთებული, თუმცა თუ ჯერ ოფიციალურად არ დასახელებულა და არც კანდიდატთა სია არსებობს, ჯერ სამართლებრივად ვერ მოვედავებით. რადგან პრიზები მისი სახელობის იყო და მათზე გვარი-სახელიც დატანილი, შესაძლებელია პიარკამპანიად შევაფასოთ. ამ კანდიდატის საჯარო წარდგენა ღიად უკვე რომ მომხდარიყო, ასეთ შემთხვევაში კანდიდატიც ისჯება და საჩუქრის მიმღებიც. დეკემბერში და ახლახან განხორციელებული მორიგი ცვლილებების შეტანის შემდეგ ორივე მხარე ისჯება. საკითხავია ისიც, ეს საჩუქრები კონკრეტულად „ნაციონალურმა მოძრაობამ“ შეიძინა, თუ სპორტსმენმა საკუთარი სახსრებით იყიდა. პარტიას ეს ცალსახად ეკრძალება. ამ შემთხვევაში, შესაძლოა, მომხდარის უკან სულ სხვა მიზნები იკვეთებოდეს, თუმცა კონკრეტული სამართლებრივი რეაგირება ნაადრევია. თუ კანდიდატად წარდგენის შემდეგაც იგივე ქმედებას განახორციელებს, თუნდაც უმნიშვნელო საჩუქრის გადაცემის შემთხვევაშიც, მოქმედი კანონით, ორივე მხარე დაისჯება,“ – განუცხადა „ქიზიყს“ „საერთაშორისო გამჭვირვალობა – საქართველო“-ს აღმასრულებელმა დირექტორმა ეკა გიგაურმა.

კედელაშვილმა ტურნირზე საკუთარი სახელობის სამი თასი და ასევე, საჭიდაო კიმანოები დააწესა, რომლებზეც მისი გვარი სახელია ამოტვიფრული. დედოფლისწყაროს კულტურისა და სპორტის ცენტრის ოფიციალური ინფორმაციით, ტურნირზე ზაზა კედელაშვილის თასი გადაეცათ 60 კილოგრამ წონით კატეგორიაში გიგა იმერლიშვილს, 50 კილოგრამ კატეგორიაში გიორგი წიკლაურს, ხოლო 35 კილოგრამ წონაში გიორგი თინაშვილს. კედელაშვილმა საჭიდაო კიმანოები გადასცა 45 კილოგრამ წონით კატეგორიაში ნიკა ზვიადაურს, 40 კილოგრამ წონაში ლაშა ბექაურს და სოფელ არხილოსკალოს გუნდს. /ქიზიყი/ ილია მარტყოფლიშვილი

ზაზა კედელაშვილმა საარჩევნო კამპანია დაიწყო?! – საჩუქრები სპორტსმენისგან!

EXCLUSIVE – ოლიმპიური თამაშების მონაწილე, მსოფლიო თასის მფლობელი და ევროპის სამგზის ჩემპიონი ზაზა კედელაშვილი დედოფლისწყაროში გამართულ ძიუდოს ერთ-ერთი ფუძემდებლის, წარმოშობით დედოფლისწყაროელი დამსახურებული მწვრთნელის ბიძინა მაზიაშვილის ხსოვნის მეორე რესპუბლიკურ ტურნირს დაესწრო. კედელაშვილმა ტურნირზე საკუთარი სახელობის სამი თასი და ასევე, საჭიდაო კიმანოები დააწესა, რომლებზეც მისი გვარი სახელია ამოტვიფრული.

ტურნირის მთავარი მსაჯი, ძიუდოს ფედერაციის აღმასრულებელი მდივანი ანზორ მარტყოფლიშვილი „ქიზიყთან“ საუბარში ადასტურებს, რომ კედელაშვილმა საკუთარი სახელობის პრიზები დაარიგა. მარტყოფლიშვილი ინფორმაციას იმის თაობაზეც ფლობს, რომ სპორტსმენმა, შესაძლოა, საპარლამენტო არჩევნებში მიიღოს მონაწილეობა.

„თავისი რაიონია, ჩამოვიდა და პრიზები დააწესა. ამაში პოლიტიკური არაფერია. თავისი სოფლის გუნდს თავისივე პირადი კიმანო აჩუქა, რომელსაც მისი გვარი სახელი აწერია. ჯერ არჩევნები ხომ არ არის. სპორტსმენია და საჩუქრები დაარიგა, ეგ იყო და ეგ… მე არც ვიცოდი, მაგრამ დედოფლისწყაროში მითხრეს, რომ არჩევნებში კენჭისყრას გეგმავს,“ – აცხადებს ანზორ მარტყოფლიშვილი.

„ქიზიყი“ ზაზა კედელაშვილთან დაკავშირებას შეეცადა, თუმცა ვერ მოხერხდა. მისი ნათესავი, სპორტსმენი სოსო ყველაიძე, რომელიც კედელაშვილის თანასოფლელია, ჩვენთან საუბრისას აცხადებს, რომ გადაამოწმა და აღმოჩნდა, რომ კედელაშვილი ამჟამად საქართველოში არ იმყოფება. კედელაშვილის ნათლია ამბობს, რომ კონკრეტულად არ იცის, გადაწყვეტილი აქვს თუ არა ზაზას საპარლამენტო არჩევნებში მონაწილეობის მიღება, თუმცა იცის, რომ ეს საკითხი ნამდვილად განიხილება.

დედოფლისწყაროს კულტურისა და სპორტის ცენტრის ოფიციალური ინფორმაციით, ტურნირზე ზაზა კედელაშვილის თასი გადაეცათ: 60 კილოგრამ წონით კატეგორიაში გიგა იმერლიშვილს, 50 კილოგრამ კატეგორიაში გიორგი წიკლაურს, ხოლო 35 კილოგრამ წონაში გიორგი თინაშვილს. კედელაშვილმა საჭიდაო კიმანოები გადასცა 45 კილოგრამ წონით კატეგორიაში ნიკა ზვიადაურს, 40 კილოგრამ წონაში ლაშა ბექაურს და სოფელ არხილოსკალოს გუნდს.

პრესაში აქტიურად ვრცელდება ინფორმაცია და დედოფლისწყაროშიც ბევრს საუბრობენ იმის თაობაზე, რომ ევროპის სამგზის ჩემპიონი ძიუდოში ზაზა კედელაშვილი ოქტომბერში დაგეგმილ საპარლამენტო არჩევნებში „ნაციონალური მოძრაობიდან“ კენჭისყრას გეგმავს. 19 აპრილს მმართველი გუნდის მიერ დედოფლისწყაროში გამართული შეხვედრის დროს რამდენიმეწლიანი პაუზის შემდეგ კედელაშვილი საჯაროდ პირველად გამოჩნდა. მოგვიანებით შეხვედრა მისივე მშობლიურ სოფელშიც გაიმართა, რომელიც კედელაშვილის კანდიდატად წარდგენად შეფასდა.

თუმცა, მმართველი გუნდი ამ დრომდე უარყოფს, რომ ამ შეხვედრაზე კანდიდატის წარდგენა მოხდა და აღნიშნავენ, რომ დედოფლისწყაროში „ნაციონალური მოძრაობის“ შესაძლო კანდიდატის ვინაობა ამ ეტაპზე გადაწყვეტილი არ არის. ზაზა კედელაშვილი 2006 წელს ნაციონალური მოძრაობის დედოფლისწყაროს ორგანიზაციის ხელმძღვანელად მუშაობდა, რის შემდეგაც პოლიტიკურ ასპარეზზე აღარ გამოჩენილა.

დაირღვა თუ არა ტურნირზე საჩუქრების დარიგებით მოქმედი კანონი და შესაძლებელია თუ არა კედელაშვილის ეს ქმედება საარჩევნო კამპანიის დაწყებად შეფასდეს, ამის თაობაზე „ქიზიყი“ დეტალების დაზუსტებას გავლენიან არასამთავრობო ორგანიზაცია „საერთაშორისო გამჭვირვალობა – საქართველო“-ში ცდილობს. /ქიზიყი/ ილია მარტყოფლიშვილი

ერთი წლის წინ დასუფთავების სამსახურის უფროსი დოკუმენტების გაყალბებისთვის დააკავეს

დედოფლისწყაროს დასუფთავების სამსახურის, შპს "სერვისი 2007"-ის უფროსი ზურაბ ყოჩიაშვილი ფინანსურმა პოლიციამ ზუსტად ერთი წლის წინ, 2011 წლის 10 მაისს დააკავა. ნეტგაზეთ "ქიზიყის" ინფორმაციით, ყოჩიაშვილს აღმკვეთი ღონისძიება, გირაოს სანაცვლოდ, პირობითი პატიმრობით შეეცვალა. სარწმუნო წყაროს ცნობით, ზურაბ ყოჩიაშვილი სახელმწიფოს სასარგებლოდ 10 000 ლარის გირაოს გადახდის შემდეგ გათავისუფლდა. აქტიურად საუბრობენ იმაზე, რომ მას ცალკეულ თანამდებობებზე მოხვედრის სურვილი კვლავაც აქვს.

ამ საკითხის ირგვლივ, სასამართლო უწყებაში კონკრეტულ განაჩენზე ჟურნალისტებთან საუბარი არ ისურვეს. მოსამართლის თანაშემწეებმა და კანცელარიის უფროსმა "ქიზიყს" განუცხადეს, რომ სასამართლო გადაწყვეტილების შესახებ პასუხს წერილობითი ფორმით გაგვცემდნენ და მათ პოზიციას მხოლოდ წერილის ჩაბარებიდან 10 დღის შემდეგ მივიღებდით.

ამგვარი პასუხების მიღების შემდეგ "ქიზიყმა" დეტალების დაზუსტება სხვადასხვა წყაროებთან სცადა. როგორც "ქიზიყს" საფინანსო პოლიციის პრეს-სპიკერმა ნინო ჩუტკერაშვილმა განუცხადა, ყოჩიაშვილს სისხლის სამართლის 182-ე და 341-ე მუხლები წაუყენეს, რაც სამსახურეობრივი უფლებამოსილების გადამეტებას, თანამდებობის ბოროტად გამოყენებას და დოკუმენტების გაყალბებას გულისხმობს. ჩუტკერაშვილი სასამართლო გადაწყვეტილების შესახებ ინფორმაციას არ ფლობს და აცხადებს, რომ ეს უკვე მათ კომპეტენციაში აღარ შედის და ამიტომაც შედეგით აღარ დაინტერესებულან.

დედოფლისწყაროს დასუფთავების სამსახური ადგილობრივი ბიუჯეტიდან ფინანსდება. შპს "სერვისი 2007"-ის თანამშრომლები "ქიზიყთან" საუბარში არ მალავენ, რომ კორუფციულ გარიგებებს ადგილი ინტენსიურად ჰქონდა:

,,ჩვენ უფროსს ვაფრთხილებდით, რომ ეს კანონდარღვევა იყო, მაგრამ ყურს არ გვიგდებდა. ვხვდებოდით, რომ ხელს ისეთ რაღაცეებზე ვაწერდით, რაც დაუშვებელი იყო. მეორე მხრივ, ზურას ვერ გავამტყუვნებთ. რასაც ზემოდან ავალებდნენ იმას აკეთებდა. ჩვენ ფინანსურ პოლიციასთან ვითანამშრომლეთ, რადგან იძულებით გვაწერინებდნენ ხელს საბუთებზე. ბუღალტერმაც გამოძიებასთან ყველა დარღვევაზე ღიად ისაუბრა და ისიც ჩივილს გეგმავს. ჩვენმა ბუღალტერმა ბევრი სკანდალური რამ იცის და არაფერი დაუმალავს, ყველაფერი გაამხილა," - აცხადებენ დასუფთავების სამსახურის თანამშრომლები.

საფინანსო პოლიცია დედოფლისწყაროს დასუფთავების სამსახურში არსებული დარღვევების შესწავლას ყოჩიაშვილის დაკავებამდე 3 თვით ადრე აწარმოებდა.

„ქიზიყის“ ინფორმაციით, საფინანსო პოლიცია აღნიშნული სამსახურში ჯერ კიდევ სამი თვის წინ შევიდა. შპს „სერვისი 2007“–ის თანამშრომლები იმხაქნად, პირად საუბრებშიც ადასტურებენ, რომ შტატები მნიშვნელოვნად იყო გაბერილია. ,,რეალურად 20 კაცი ვმუშაობთ, არადა 70 ადამიანი იღებს ხელფასს. უმრავლესობა სამსახურში მხოლოდ ხელფასის ასაღებად ჩნდება,“ – აცხადებდნენ დასუფთავების სამსახურის თანამშრომლები.

შეგახსენებთ, ხელმძღვანელის დაკავებამდე ორი თვით ადრე პროტესტის ნიშნად მეეზოვეებმა დედოფლისწყაროში ცოცხები დაყარეს და ქალაქის დასუფთავებაზე დროებით უარი თქვეს.

ზურაბ ყოჩიაშვილი მანამდე ლეიბორისტული პარტიის დედოფლისწყაროს ორგანიზაციის წევრი გახლდათ, მისი მეუღლე ამჟამად დედოფლისწყაროს გამგეობის ადმინისტრაციის უფროსია. /ქიზიყი/

მოქალაქეთა მომსახურების ბიუროს უფროსად საოლქო-საარჩევნო კომისიის თავმჯდომრის მეუღლე დაინიშნა

დედოფლისწყაროს მუნიციპალიტეტის გამგეობის მოქალაქეთა მომსახურების ბიუროს (მმბ) უფროსად სოფელ ზემო მაჩხაანში მცხოვრები ეკატერინე ციმაკურიძე დაინიშნა. ის იმავდროულად გამგეობის ადმინისტრაციული სამსახურის და საერთაშორისო ფონდებთან და არასამთავრობო ორგანიზაციებთან ურთიერთობის განყოფილების უფროსია. მუნიციპალიტეტის ხელმძღვანელობამ ციმაკურიძე ვაკანტურ ადგილზე დასამტკიცებლად, თვითმმართველობის ორგანოში გამოცხადებული კონკურსის გავლის შემდეგ წარადგინა.

როგორც „ქიზიყმა“ გაარკვია, ის დედოფლისწყაროს საოლქო-საარჩევნო კომისიის თავმჯდომრის დავით ბუჩუკურის მეუღლეა. ციმაკურიძე მანამდე ერთი წლის განმავლობაში დედოფლისწყაროს საგანმანათლებლო რესურსცენტრში უფროს სპეციალისტად მუშაობდა, ხოლო 1996-2007 წლებში საქართველოს კონტროლის პალატაში მოღვაწეობდა.

ეკატერინე ციმაკურიძე 1974 წლის 19 დეკემბერს დაიბადა ქ. თბილისში, დაამთავრა თბილისის 126-ე საშუალო სკოლა, 1996 წელს – თსუ ფილოლოგიის ფაკულტეტი, ქართული ენისა და ლიტერატურის სპეციალობით.

ახალი ხელმძღვანელი თვლის, რომ მმბ საკმაოდ სრულყოფილი სტრუქტურული ერთეულია. უახლოეს მომავალში იგეგმება ინფორმაციის გაცვლის სისტემის დახვეწა, რაც ინტერნეტ-მომსახურების გაუმჯობესებას ითვალისწინებს.

ეს თანამდებობა ვაკანტური მას შემდეგ იყო, რაც მისმა წინამორბედმა თეა ლეკაშვილმა დედოფლისწყაროს მუნიციპალიტეტის გამგებელ ნიკოლოზ შანშიაშვილზე მიმდინარე წლის 27 იანვარს იქორწინა. ამჯერად, ლეკაშვილმა და ციმაკურიძემ თანამდებობები გაცვალეს. გამგებლის მეუღლე მუშაობას საგანმანათლებლო რესურსცენტრში აგრძელებს. ამას გარდა, "ქიზიყის“ ინფორმაციით, თეა ლეკაშვილი მუშაობას არასამთავრობო სექტორშიც განაგრძობს. ის კავშირ „ახალ სიტყვა – ახალი ინიციატივა“–ს ხელმძღვანელია. ორგანიზაცია დონორების ფინანსური დახმარებით საგანმანათლებლო სფეროში მუშაობს. ლეკაშვილი მანამდე გამგებლის თანაშემწედ და გამგეობის აპარატის არასამთავრობო ორგანიზაციებთან ურთიერთობის კოორდინატორად მუშაობდა.

საჯარო სამსახურის შესახებ საქართველოს კანონის 62–ე მუხლის მიხედვით, არ შეიძლება საჯარო მოხელეს დაეკისროს სამსახურებრივი ზედამხედველობა იმ ორგანიზაციებისადმი, რომელთა ხელმძღვანელ ორგანოებში საქმიანობენ მისი ოჯახის წევრები. ასევე, სახელმწიფო მოსამსახურე არ უნდა იღებდეს შემოსავალს იმ ორგანიზაციებიდან, რომლებსაც სამსახურებრივ მოვალეობათა შესრულების წესით უწევს ზედამხედველობას.

ცნობისათვის, ერთი ფანჯრის პრინციპით შექმნილი მოქალაქეთა მომსახურების ბიურო დედოფლისწყაროში 2011 წლის 27 იანვარს გაიხსნა და გერმანიის საერთაშორისო თანამშრომლობის საზოგადოების (GIZ) დაფინანსებით თანამედროვე სტანდარტებით აღიჭურვა. პროექტი „ადგილობრივი თვითმმართველობის ხელშეწყობა სამხრეთ კავკასიაში“ ფარგლებში განხორციელდა. /ქიზიყი/ ილია მარტყოფლიშვილი

მეუფე მელქისედეკს ჟურნალისტების კითხვები აღიზიანებს (ვიდეო)

ხორნაბუჯისა და ჰერეთის ეპისკოპოსმა მელქისედეკმა კახეთის საინფორმაციო ცენტრის ჟურნალისტს პროვოკატორი უწოდა, ალიბეგლოს ეკლესიაში მოძღვარის დანიშვნასთან დაკავშირებით შეკითხვის დასმის გამო.

„გიორგობისთვის, ჰერეთში ვიყავი. მეუფემ ქადაგება რომ დაამთავრა და კახის წმინდა გიორგის ეკლესიის ეზოში გამოვიდა, მივესალმე, გიორგობა მივულოცე, ვუთხარი, რომ ვიყავი კახეთის საინფორმაციო ცენტრის ჟურნალისტი და მისგან კომენტარი მინდოდა. გისმენო, მითხრა მეუფემ. მეც ვკითხე, ალიბეგლოს ეკლესიაში მოძღვარი როდის დაინიშნება მეთქი. ამ კითხვას მოჰყვა მისი გაღიზიანება“, - აღნიშნავს ჟურნალისტი გელა მთივლიშვილი.

- თქვენთან საუბარი აღარ მსურს. დავამთავრე თქვენთან საუბარი.
-რატომ?
- არ გადაიღო! ...რა და პროვოკატორია ვიღაცა (უთხრა მეუფემ მის გვერდზე მყოფ მამაკაცს)
- რა ვარ?
- პროვოკატორი.
- რატომ ვარ პროვოკატორი?
- აბა რა გინდათ, როდის იქნება, როდის ეყოლება, არ არის თქვენი გადასაწყვეტი ეგ, და ალიბეგლოს მოძღვარი, ეს არ არის თქვენი გადასაწყვეტი, გასაგებია? ვეძებთ კანდიდატს და დაინიშნება მალე. ....იწერს ახლა ეს. ხო იწერ, ხო იწერ? ...
- ...რას ვავრცელებთ?
- ქოთოქლოში აშენებთო და არ ვაშენებეთ იქ ჩვენ არაფერს, ტაძარი არის.
- ქოთოქლოში ეკლესიის მშენებლობასთან დაკავშირებით ჩვენ არაფერი გაგვირცელებია.
- გავრცელებულია ინფორმაცია თქვენგან, კახეთიდან.
- არასწორი ინფორმაცია ჩვენ არ გაგვივრცელებია.
- თქვენი გავრცელებულია.
- არ გამივრცელებია და რანაირად აბა?
- ეს ეხლა ნორმალურია? სიფრთხილეა აქ საჭირო, გესმით თქვენ? თქვენთვის არ ნიშნავს ესე იგი ეს არაფერს, ჰერეთი, ჩვენთვის ძალიან ბევრს ნიშნავს და სიფრთხილეა საჭირო აქ. გასაგებია? წავედით, წავედით. ასე არ შეიძლება. რომ შეპირდით ალიბეგლოს მოსახლეობას, რატო არ არის მოძღვარი, რა თქვენი გადასაწყვეტია?“...

სინამდვილეში, კახეთის საინფორმაციო ცენტრს, ჰერეთში, სოფელ ქოთოქლოში, ეკლესიის მშენებლობასთან დაკავშირებით არანაირი ინფორმაცია არ გაუვრცელებია. ეპარქიის წარმომადგენლებს შეუძლიათ დარწმუნდნენ ამაში - ძებნის სისტემაში ჩაწერონ სიტყვა ქოთოქლო და შედეგი აჩვენებს, რომ არაფერი არ იძებნება.

კახის რაიონის სოფელ ალიბეგლოში წმინდა ნინოს სახელობის ეკლესია 2011 წლის 1-ელ ივნისს გაიხსნა. მაშინ ეპისკოპოსი ალიბეგლოს მოსახლეობას დაპირდა, რომ ეს იქნებოდა მეორე მოქმედი ეკლესია საინგილოში. „აქამდე მხოლოდ ერთი, კახინგილოს წმინდა გიორგის სახელობის ეკლესია იყო მოქმედი, ახლა კი უკვე მეორეც იქნება. ალიბეგლოს მოსახლეობა ძალიან გახარებულია. ისტორიულ ჰერეთში არის პრობლემები, მრევლი შემცირებულია და ჩვენ ყველაფერი უნდა გავაკეთოთ, რომ ქართველებს მხარში დავუდგეთ“, - განაცხადა მეუფე მელქისედეკმა. ალობეგლოში მცხოვრები ჰერების თხოვნის მიუხედავად, ეკლესიაში მოძღვარის დანიშვნა ამ დრომდე ვერ მოხერხდა.

2011 წლის აგვისტოში, საინგილოდან მამა ბასილიც გამოაძევეს. მამა ბასილი კახის წმინდა გიორგის ეკლესიაში მსახურობდა. გამოძევებამდე კახის რაიონის უშიშროების სამსახურის თანამშრომლებმა მოძღვარს ეკლესიის ეზოს კეთილმოწყობა და ტაძრის ფასადის შეთეთრებაც აუკრძალეს, სამუშაოების წარმოების დროს კი მორჩილები ხარაჩოებიდან ჩამოყარეს. მამა ბასილზე ზეწოლის შესახებ კახეთის საინფორმაციო ცენტრმა ინფორმაცია, ვიდეომასალასთან ერთად, მანამდეც არაერთხელ გაავრცელა. კახეთის საინფორმაციო ცენტრთან საუბარში ხორნაბუჯისა და ჰერეთის ეპისკოპოსი მელქისედეკი აზერბაიჯანის მხრიდან მოძღვარის შევიწროვების ფაქტს უარყოფდა. მოგვიანებით, პატრიარქის კურთხევით მამა ბასილი გადაყვანილ იქნა თბილისში, კახში კი მამა დემეტრე გაგზავნეს.

მელქისედეკი (ერისკაცობაში – არკადი ხაჩიძე) ხორნაბუჯისა და ჰერეთის ეპარქიის მმართველად 2009 წლის 3 მაისს დაინიშნა. დამთავრებული აქვს თბილისის სასულიერო სემინარია. 1998-2003 წლებში სწავლობდა ათენის უნივერსიტეტის საღვთისმეტყველო ფაკულტეტზე; 2004 წლის 3 აპრილს მოხდა მისი დიაკვნად ხელდასმა; 2006 წლის 31 აგვისტოს ბერად აღიკვეცა; 2008 წლის 21 დეკემბერს არქიმანდრიტის წოდება მიიღო. ექვემდებარება დედოფლისწყაროს მუნიციპალიტეტი და ისტორიული ჰერეთი (საინგილო).

ნინო კორაშვილი | კახეთის საინფორმაციო ცენტრი

ვიდეოჩანაწერი

დედოფლისწყაროსა და კიდევ 11 რაიონში ფერმერთა მომსახურების ცენტრი გაიხსნება

უახლოეს დღეებში ქვეყნის მასშტაბით ფერმერთა მომსახურების 12 ახალი ცენტრი ამოქმედდება. ცენტრის მშენებლობა დასასრულს უახლოვდება დედოფლისწყაროშიც. „ქიზიყის“ ინფორმაციით, მისი გახსნის ცერემონია თვის ბოლომდე იგეგმება. როგორც ადგილზე დასაქმებული პერსონალი აცხადებს, სარეაბილიტაციო სამუშაოები დაჩქარებული ტემპით, 24 საათიან რეჟიმში მიმდინარეობს.

ამ ცენტრების შესახებ 8 მაისს გამართულ ტრადიციულ ბრიფინგზე პრეზიდენტის პრესსპიკერმა მანანა მანჯგალაძემაც ვრცლად ისაუბრა.

მისი თქმით, აღნიშნულ ცენტრებში ფერმერებს და გლეხებს შემდეგი სერვისით სარგებობის შესაძლებლობა ექნებათ: 42 სახეობის აგრარული ოპერაცია, რაშიც ნიადაგის მოხვნა, მოსავლის აღება, კულტივაცია, ბოსტნეულის თესვა, შეღავათიან ფასებში შხამქიმიკატებისა და მექანიზაციის მარაგნაწილების რეალიზაცია, საერთაშორისო და თანამედროვე ტექნოლოგიების ათვისება, სასოფლო მეურნეობის ტექნიკის მომსახურეობა და სხვა მომსახურებები იგულისხმება.

მანჯგალაძისივე განმარტებით, ფერმერები ასევე მიიღებენ 5 სახის ლაბორატორიულ მომსახურეობას.

„ეს არის ნიადაგის ანალიზი, ცხოველთა მოვლის კვებისა და დაავადებების გამოკვლევა, შხამქიმიკატების ანალიზის ლაბორატორია, კლიმატური პირობები და პროგნოზირებების ლაბორატორია“,– განმარტა მანჯგალაძემ.

პრესსპიკერის თქმითვე, სერვისების მშენებლობა უკვე სრულდება დედოფლისწყაროში, აბაშაში, ზესტაფონში, ოზურგეთში და სამტრედიაში. „ასევე ამ ჩამონათვალშია გურჯაანი, ამბროლაური, ახალციხე, ბოლნისი და მარნეული“,– დასძინა მანჯგალაძემ. /ქიზიყი/ ილია მარტყოფლიშვილი

დავით დუღაშვილი: „თოკი გაწყდა და რას ვუშველიდით, თოკში ხომ არ ვზივართ“?

დედოფლისწყაროს სახანძრო-სამაშველო სამსახურში მომხდარ ინციდენტთან დაკავშირებით ხელმძღვანელობამ პირველი კომენტარი გააკეთა. ცნობილია, რომ სამსახურის ახლადდანიშნული ხელმძღვანელი ლევან გოზალიშვილი არც „ქიზიყის“, არც ცენტრალური ტელეკომპანიებისა და არც რეგიონში მოქმედი სხვა მედიასაშუალებების ჟურნალისტების ზარებს არ პასუხობს. უკვე მერამდენე დღეა გოზალიშვილი ზურნალისტებთან საუბარს თავს არიდებს.

პირველი, ვინც მომხდარის ირგვლივ ჟურნალისტებთან კომენტარი გააკეთა, საავარიო-სამაშველო განყოფილების უფროსი დავით დუღაშვილი იყო. სამაშველო სამსახურში დასაქმებული ყოფილი პროკურორი ირონიული კომენტარით შემოიფარგლა.

„უსაფრთხოების ყველანაირი ზომა მიღებული იყო, მაგრამ თოკი გაწყდა და იმ თოკს რას ვუშველიდით? თოკში ხომ არ ვზივართ? კედელზე ასვლაში ვარჯიშობდნენ და შემთხვევა ამ დროს მოხდა. გიგა დაახლოებით 4 მეტრის სიმაღლიდან ჩამოვარდა. გამოძიება დაწყებულია და პოლიცია ყველაფერს გაარკვევს,“ – განაცხადა დავით დუღაშვილმა.

პარტია „თავისუფალი საქართველოს“ დედოფლისწყაროს ორგანიზაციის განცხადებით, წვრთნების დროს უსაფრთხოების ზომები დაცული არ იყო, რამაც უბედური შემთხვევა გამოიწვია.

„რამდენიმე თვეა სახანძრო-სამაშველო სამსახურს 3 უფროსი ჰყავს, მაგრამ უპასუხისმგებლო და არაკომპეტენტური ხელმძღვანელები არიან. ასწავლიან, მაგრამ უსაფრთხოების ზომები დაცული არ აქვთ,“ – განაცხადა თამილა გურაშვილმა.

დედოფლისწყაროს სახანძრო-სამაშველო სამსახურში მიმდინარე წვრთნების დროს მომხდარი ინციდენტის შესახებ ინფორმაცია „ქიზიყმა“ ექსკლუზიურად გაავრცელა. ადგილობრივმა ოპოზიციამ კი გულგრილი დამოკიდებულების გამო სამსახურის ხელმძღვანელის ლევან გოზალიშვილის პასუხისმგებლობის საკითხის დასმა მოითხოვა. /ქიზიყი/

წვრთნების დროს შენობიდან ჩამოვარდნილი მაშველი კატასტროფის ბრიგადამ დედოფლისწყაროდან თბილისში გადაიყვანა

EXCLUSIVE – ინციდენტი მოხდა დედოფლისწყაროს სახანძრო-სამაშველო სამსახურში, წვრთნების მიმდინარეობის დროს. მაშინ, როდესაც მაშველები კედელზე ცოცვაში ვარჯიშობდნენ, ერთ-ერთი მათგანი შენობიდან ჩამოვარდა და მძიმედ დაშავდა.

როგორც „ქიზიყმა“ გაარკვია, უბედური შემთხვევის შედეგად, სამსახურის თანამშრომელი 35 წლის გიგა გონაშვილი დაშავდა. სავარაუდოდ, მას დამცავი თოკი გაუწყდა და თავი ქვას დაარტყა.

შემთხვევის ადგილზე გადაუდებელი სამედიცინო დახმარების ბრიგადა მივიდა, თუმცა ვითარების სირთულის გამო დაშავებული მამაკაცი კატასტროფის მედიცინის ცენტრის ბრიგადამ თბილისის I კლინიკურ საავადმყოფოში გადაიყვანა. პაციენტი მკურნალობას ამ დრომდე განაგრძობს.

„სასწრაფო დახმარების ბრიგადამ დაშავებული თავდაპირველად დედოფლისწყაროს სტაციონარში გადმოიყვანა, პირველადი დახმარება მას ადგილზე გაეწია. ტრავმა იყო, თუმცა არც ისე მძიმე. მამაკაცი წელის არეში ტკივილს უჩიოდა. პაციენტს გონება არ დაუკარგავს, კონტაქტური იყო. თუმცა, საჭიროდ ჩავთვალეთ, მკურნალობა თბილისში გაეგრძელებინა, კატასტროფის ბრიგადა გამოვიძახეთ და გადაიყვანეს,“ – განუცხადა „ქიზიყს“ დედოფლისწყაროს საავადმყოფოს უფროსმა ხათუნა ზურიკაშვილმა.

დაშავებულის ახლობლების განმარტებით, მამაკაცს ხერხემლის მალები აქვს დაზიანებული, თუმცა როგორც დედოფლისწყაროს მთავარი ექიმი ხათუნა ზურიკაშვილი აცხადებს, ამჟამად ვითარება საგანგაშო არ არის და მას, სამომავლოდ, გადაადგილების პრობლემა არ შეექმნება. მისი თქმით, გავრცელებული ხმები, თითქოს მის სიცოცხლეს საფრთხე ემუქრება, სიმართლეს არ შეესაბამება.

თუ რატომ არ იყო წვრთნების დროს უსაფრთხოების ნორმები სათანადოდ დაცული, ამ კითხვებზე პასუხის მიღებას „ქიზიყი“ სამსახურის ხელმძღვანელისგან ცდილობდა, თუმცა დედოფლისწყაროს სახანძრო-სამაშველო სამსახურის უფროსი ლევან გოზალიშვილი სატელეფონო ზარებს არ პასუხობს.

დედოფლისწყაროში მოქმედი ოპოზიცია მომხდარს სახანძრო-სამაშველო სამსახურის ხელმძღვანელების არაკომპეტენტურობის შედეგად აფასებს და მიიჩნევს, რომ ამ ფაქტით დედოფლისწყაროს სახანძრო-სამაშველო სამსახურ სკანდალში გაეხვა. პარტია „თავისუფალი საქართველოს“ მტკიცებით, მიუხედავად იმისა, რომ ამ სამსახურში, მერამდენე თვეა, ერთის ნაცვლად სამი ხელმძღვანელი პირი დაინიშნა, მათი არაკომპეტენტურობის გამო უსაფრთხოების ნორმების სათანადოდ დაცვის უზრუნველყოფა ვერ მოხერხდა. /ქიზიყი/ ილია მარტყოფლიშვილი

ლევან ბაღაშვილი: „დედოფლისწყაროში მიწისძვრას ნგრევა და მსხვერპლი არ მოჰყოლია“

დედოფლისწყაროს მუნიციპალიტეტში იქ სადაც 7 მაისს, დილით 5,7 მაგნიტუდის სიმძლავრის მიწისძვრა მოხდა, ამ დროისთვის არსებული ინფორმაციით, ნგრევა და მსხვერპლი არ დაფიქსირებულა.
ამის შესახებ კომენტარს დედოფლისწყაროს მუნიციპალიტეტის საკრებულოს თავმჯდომარე ლევან ბაღაშვილი აკეთებს.
მისი თქმით, სოფლის რწმუნებულები მოსახლეობასთან შეხვედრებს მართავენ და ინფორმაციას იღებენ, არის თუ არა ზარალი. თუმცა, თვითმმართველობის ორგანოში ზარალის შესახებ ინფორმაცია არ შესულა.
„საკმაოდ ძლიერი ბიძგები იყო, მაგრამ ზარალის შესახებ ინფორმაციას არ ვფლობთ. ავარიული სახლების დაზიანება თუ მოხდა მომავალში გვეცოდინება. სატელეფონო ხაზები გადატვირთულია, თუმცა სოფლებთან დაკავშირება მოვახერხე. ჩვენ მაქსიმალურად ვცდილობთ ინფორმაცია გადავამოწმოთ,“ – აღნიშნავს ლევან ბაღაშვილი.
საკრებულოს თავმჯდომარის განმარტებით, რაიონს შეუფერხებლად მიეწოდება ელექტროენერგია და მოსახლეობაში პანიკა არ არის. მუნიციპალიტეტის ტერიტორიაზე რაიმე სახის შეზღუდვები არ არის. /ქიზიყი/

ქვეყნის მასშტაბით, ყველაზე ძლიერი მიწისქვეშა ბიძგები დედოფლისწყაროში დაფიქსირდა

7 მაისს გამთენიისას ძლიერი მიწისძვრის შემდეგ პანიკა შეინიშნებოდა დედოფლისწყაროში. მოსახლეობა მიწის ძლიერმა რყევამ შეაშფოთა.

სეისმოლოგიური სამსახურის განახლებული ინფორმაციით, 7 მაისის მიწისძვრის ეპიცენტრი აზერბაიჯანი-საქართველოს საზღვრიდან 25 კმ-ში დილის 8:40 საათზე დაფიქსირდა. რყევები ეპიცენტრში 7 ბალს აღწევდა. საქართველოში, მიწისქვეშა ბიძგების სიმძლავრემ 5.7 მაგნიტუდა შეადგინა. რყევები თბილისშიც შეინიშნებოდა.

ილიას სახელმწიფო უნივერსიტეტის სეისმოლოგიური მონიტორინგის ცენტრმა მანამდე გაავრცელა ინფორმაცია, რომ მიწისძვრის ეპიცენტრი დედოფლისწყაროს რაიონთან, სოფელ ყარაღაჯთან დაფიქსირდა.

ამასთან, სეისმოლოგების ცნობით, ასეთი სიმძლავრის მიწისძვრას შეუძლია, ძველი და ამორტიზებული შენობების ნგრევა გამოიწვიოს, თუმცა ამ დრომდე საქართველოში ნგრევის ან სხვა რაიმე ზარალის შესახებ ინფორმაცია არ გავრცელებულა.

საქართველო-აზერბაიჯანის საზღვართან მომხდარი მიწისვძვრის შედეგად, სიღნაღის რაიონის სოფელ ყარაღაჯში საცხოვრებელი კორპუსი დაზიანდა.

როგორც “ინტერპრესნიუსის” კორესპონდენტი შემთხვევის ადგილიდან იუწყება, ყარაღაჯში საერთო საცხოვრებელი კორუსის კედლები გაიბზარა. კორპუსში 12 ოჯახი ცხოვრობს.
ადგილობრივების თქმით, საცხოვრებელი სახლი ავარიული იყო, თუმცა დღეს მომხდარი მიწისძვრის შედეგად ბზარები გაიზარდა. ისინი ამ დრომდე საცხოვრებელი კორპუსის ეზოში არიან შეკრებილი და განმეორებითი ბიძგების შიშით სახლებში ვერ შედიან.

მიწისძვრას კახეთის რეგონში სერიოზული ნგრევა არ მოჰყოლია. მიწისძვრა აზერბაიჯანი-საქართველოს საზღვარზე მოხდა. ამასთან, აზერბაიჯანის ზაქათალასა და ალიაბადის რაიონებში, სადაც ქართველები კომპაქტურად ცხოვრობენ, მიწისძვრამ შენობების ნგრევა გამოიწვია, თუმცა მსხვერპლი არ არის. რაც შეეხება კახის რაიონს, სადაც ასევე ქართველები კომპაქტურად ცხოვრობენ, როგორც საელჩოში აცხადებენ, ამ რაიონში მიწისქვეშა ბიძგები შედარებით სუსტი იყო.

ბოლო რამდენიმე წლის განმავლობაში ეს დედოფლისწყაროში შედარებით ძლიერი მიწისძვრა იყო. /ქიზიყი/

ზემო ქედში 31 წლის მამაკაცი ჩამომხრჩვალი ნახეს

სუიციდის მორიგი შემთხვევა დაფიქსირდა დედოფლისწყაროში. სოფელ ზემო ქედში მცხოვრები 31 წლის თემურ ყველაიძე, 6 მაისს საღამოს, საკუთარი საცხოვრებელი ბინის სარდაფში თოკზე ჩამომხრჩვალი ნახეს.

როგორც „ქიზიყს“ ყველაიძეების მეზობლებმა განუცხადეს, მამაკაცმა თვითმკვლელობა ადრეც სცადა. წინა შემთხვევის დროს მან საწამლავი დალია, თუმცა მაშინ მისი გადარჩენა მოხერხდა.

ზემო ქედის მაცხოვრებლები აცხადებენ, რომ უკანასკნელად მამაკაცი ალკოჰოლური ზემოქმედების ქვეშ მყოფი შენიშნეს. მათი მტკიცებით, ყველაიძე ალკოჰოლური თრობის შემთხვევაში მუდმივად თვითმკვლელობაზე საუბრობდა.

„ქიზიყის“ ინფორმაციით, გარდაცვლილის ოჯახი უკიდურეს სიდუხჭირეში ცხოვრობს. მამაკაცი დაქორწინებული არ გახლდათ. ერთ-ერთი ვერსიით, შესაძლოა თვითმკვლელობის მიზეზი სწორედ ეკონომიური პრობლემები, ან სიყვარული გამხდარიყო. სოფელში მომხდარზე საუბარი უჭირთ.

ბოლო რამდენიმე კვირის მანძილზე დედოფლისწყაროში ეს თვითმკვლელობის უკვე მეოთხე შემთხვევაა. მომხდართან დაკავშირებით შს დედოფლისწყაროს პოლიციის რაიონულ სამმართველოში აღძრულია სისხლის სამართლის საქმე, მიმდინარეობს წინასწარი გამოძიება. /ქიზიყი/

“სასწრაფო დახმარების ბრიგადამ ცოფიანი ტურის მიერ დაკბენილ ქალს ტრანსპორტირებაზე უარი უთხრა”

პოლიტიკური პარტია “თავისუფალი საქართველო” დედოფლისწყაროს ორგანიზაციის თავმჯდომარის თამილა გურაშვილის ინფორმაციით, “სასწრაფო დახმარების ბრიგადამ მგლის მიერ დაკბენილ ქალს ტრანსპორტირებაზე უარი უთხრა”.

როგორც “ქიზიყს” გურაშვილმა განუცხადა, დედოფლისწყაროს მუნიციპალიტეტის სოფელ არბოშიკში მცხოვრები 54 წლის ანა ჯანაშვილი ტურამ ფეხის და სახის არეში 2 მაისს ღამით საკუთარ ეზოში დაკბინა.

“დედოფლისწყაროს რაიონში გარეული ცხოველები, მგელი, ტურა მრავლად არის და ხშირად მოსახლეობასა და შინაურ ცხოველებზე თავდასხმის ფაქტებს აქვს ადგილი. დღეს დილით მან გამოიძახა სასწრაფო დახმარების ბრიგადა, რადგან სოფლიდან ტრანსპორტირებას ვერ ახერხებდა, რაზეც სასწრაფო დახმარებში უარი განუცხადეს, უფლება არ გვაქვსო”, – განაცხადა გურაშვილმა.

მისივე თქმით, პაციენტის რაიონულ საავადმყოფოში ტრანსპორტირება მხოლოდ მას შემდეგ მოხდა, რაც სასწრაფო დახმარებაში ამ ფაქტის მედიაში გაშუქების შესახებ შეიტყვეს და მომხდარში ადგილობრივი ჟურნალისტები ჩაერთვნენ.

“თავისუფალი საქართველოს” დედოფლისწყაროს ორგანიზაცია ამ ფაქტის გამო აღშფოთებულია. დღე არ გავა, რომ ნაციონალურმა ხელისუფლებამ ახალი კლინიკა ან საავადმყოფო არ გახსნას. დიდი პიარ-კამპანიაა ჯანდაცვის რეფორმირებასა და ხელმისაწვდომობაზე, რაც სიცრუეა. ადამიანი უფულობის გამო სასწრაფო ბრიგადის გამოძახებას ვეღარ მოახერხებს, მკურნალობის ფასები კი ისეთი მაღალია, რომ მოსახლეობის 80%-თვის ხელმისაწვდომი არ არის. არსებული სადაზღვევო პოლისები ავადმყოფობის უმეტეს კატეგორიას არ აფინანსებს”, – განაცხადა გურაშვილმა და დასძინა, რომ “თავისუფალი საქართველოს” საარჩევნო პროგრამის ერთ-ერთ პრიორიტეტს სწორედ ჯანმრთელობის 100%-იანი დაზღვევა წარმოადგენს.

“რისთვის ვხსნით ამდენ კლინიკებს და რად გვინდა ასეთი რეფორმირებული ჯანდაცვის სისტემა, თუ მოქალაქეებს გადაუდებელ სამედიცინო დახმარებაზე უარს ეტყვიან და სასწრაფო დახმარების ბრიგადა სტაციონარში გადაყვანაზე უარს განუცხადებს. ტურას იმავე დღეს ცოფი დაუდასტურდა. გამოდის, რომ მომხდარში ჟურნალისტები რომ არ ჩარეულიყვნენ, სასწრაფო დახმარების ადგილობრივი სამსახური ქალს რაიონულ სტაციონარში არ გადაიყვანდა და ის დაიღუპებოდა. აი, ეს გახლავთ, ჩვენი ხელისუფლების აყვავებული ქვეყანა,” – აღნიშნავს გურაშვილი. /ქიზიყი/

ტურას, რომელმაც ქალი დაკბინა, ცოფი დაუდასტურდა – სოფელ არბოშიკში კარანტინია

EXCLUSIVE – მტაცებელს, რომელმაც 2 მაისს, გვიან ღამით, დედოფლისწყაროს მუნიციპალიტეტის სოფელ არბოშიკში 54 წლის ანა ჯინაშვილი დაკბინა, ლაბორატორიული კვლევის შედეგად ცოფი დაუდგინდა. ინფორმაცია „ქიზიყს“ დედოფლისწყაროს მთავარმა ვეტერინარმა მიხეილ ქევხიშვილმაც დაუდასტურა. მისი თქმით, 4 მაისიდან სოფელ არბოშიკში კარანტინი გამოცხადდა.

„თბილისიდან მიღებული პასუხის თანახმად დადასტურდა, რომ მტაცებელი ცოფის მატარებელი იყო, დედაქალაქიდან უკვე მივიღეთ ვაქცინა და სოფელ არბოშიკში კარანტინი ცხადდება… 4 მაისიდან ამ კერაში იძულებითი ვაქცინაცია განხორციელდება, 2 კილომეტრის რადიუსში სპეციალურ აცრებს ჩავატარებთ,“ – აღნიშნავს ვეტერინარიისა და მცენარეთა დაცვის ადგილობრივი სამსახურის ხელმძღვანელი მიხეილ ქევხიშვილი.

მტაცებლის ლეში გამოსაკვლევად სურსათის უვნებლობის ვეტერინარიისა და მცენარეთა დაცვის სამსახურმა თბილისში მას შემდეგ გადაიტანა, რაც ქალბატონმა ის თავდასხმის დროს ხელით მოგუდა.

როგორც დაზარალებულმა განაცხადა, მას ნაკბენი აქვს ფეხზე, ასევე დაკაწრულია სახის არეშიც. ქალს პირველადი დახმარება სოფლის ექთანმა აღმოუჩინა, შემდეგ კი სასწრაფო დახმარების სამსახურის ავტომანქანით დედოფლისწყაროს რაიონულ საავადმყოფოში გადაიყვანეს.

როგორც დედოფლისწყაროს საავადმყოფოს ქირურგი გია ბოსტოღანაშვილი აცხადებს, იმის გამო, რომ ნაკაწრები ქალბატონს სახის არეშიც აღენიშნებოდა, მას იმუნოგლობულინის ვაქცინაც გაუკეთდა. პაციენტი ბინაზე უკვე გაეწერა, თუმცა მკურნალობის კურსს განაგრძობს.

სასწრაფო დახმარებამ ქალბატონის საავადმყოფომდე გადაყვანაზე თავდაპირველად უარი უთხრა, თუმცა მედიკოსთა ბრიგადა სოფელში მას შემდეგ გაემგზავრა, როცა მომხდარით ჟურნალისტები დაინტერესდნენ.

შეგახსენებთ, გასულ კვირას კარანტინი გამოცხადდა დედოფლისწყაროს მუნიციპალიტეტის კიდევ ერთ სოფელში. სოფელ ზემო ქედის ტერიტორიაზე ინფექციური დაავადების – ცოფის გამოვლენის გამო ორთვიანი კარანტინი დაწესდა და სოფელი არაკეთილსაიმედო ზონად გამოცხადდა.

საშიშ ინფექციურ დაავადებასთან საბრძოლველად დედოფლისწყაროში 7 კაციანი კომისია შეიქმნა. /ქიზიყი/ ილია მარტყოფლიშვილი

ლეიბორისტები ცისკარაულს “ვერცხლმოყვარეს” უწოდებენ და ივანიშვილს მისი გაშიფვრისთვის მადლობას უხდიან

ლეიბორისტული პარტია “ქიზიყის” მიერ პარტიის დედოფლისწყაროს ორგანიზაციიდან კოორდინატორის “ქართულ ოცნებაში” გადასვლის თაობაზე ექსკლუზიურად გავრცელებულ ინფორმაციას გამოეხმაურა. კომენტარი 2 მაისს გამართულ პრესკონფერენციაზე გაკეთდა. ლეიბორისტული პარტია ივანიშვილს მადლობას უხდის თანაპარტიელის გაშიფვრისთვის. თუმცა, ცისკარაული რატომღაც პარტიის წევრად მოიხსენიეს, მიუხედავად იმისა, რომ ეს უკანასკნელი განცხადებებს ქალაქ დედოფლისწყაროს კოორდინატორის სტატუსით აკეთებდა.

ნათელაშვილის თანაგუნდელები შეეცადნენ ის უმნიშვნელო, რიგით წევრად წარმოეჩინათ, მაშინ, როცა დედოფლისწყაროს ორგანიზაციაში ის საკმაო აქტიურობით გამოირჩეოდა და კოორდინატორად იწოდებოდა.

“ლეიბორისტი” გიორგი გუგავა ადასტურებს იმ ფაქტს, რომ პარტიის დედოფლისყაროს ორგანიზაციის წევრი ბესიკ ცისკარაული “ქართული ოცნების” რიგებში გადავიდა, თუმცა უარყოფს გავრცელებულ ინფორმაციას, რომლის თანახმად, ცისკარაული ზემოაღნიშნული ორგანიზაციის კოორდინატორი იყო.

“ცისკარაული დედოფლისწყაროს ოფისის კოორდინატორი არ ყოფილა. კოორდინატორი კოჩაშვილია და ის ახლაც ადგილზეა. ცისკარაულს ფული უნდოდა და “ქართულ “ოცნებაში” გადავიდა” – განაცხადა გამართულ ბრიფინგზე გიორგი გუგავამ.

ამასთან, ბრიფინგის დასასრულს, მან “ქართული ოცნების” ლიდერს, ოპოზიციონერ ბიზნესმენ ბიძინა ივანიშვილს “ვერცხლმოყვარე თანაპარტიელის “გაშიფვრისთვის” მადლობა გადაუხადა.

“ქიზიყის” მიერ დაზუსტებული ინფორმაციის თანახმად, გუგავა ცრუობს, ბესიკ ცისკარაული რაიონული ორგანიზაციის კოორდინატორი არ ყოფილა, თუმცა ქალაქ დედოფლისწყაროს კოორდინატორი ნამდვილად გახლდათ. ის ბოლო წლების განმავლობაში განცხადებებსა და პრესასთან კომენტარებს სწორედ ამ სტატუსით აკეთებდა. ის ოცნების დედოფლისწყაროს ორგანიზაციაში რამდენიმე დღის წინ გადავიდა. /ქიზიყი/

გერმანული მხარე დედოფლისწყაროში მათივე დაფინანსებული პროექტების მიმდინარეობით დაინტერესდა

გერმანიის საერთაშორისო თანამშრომლობის საზოგადოება GIZ-ის წარმომადგენლები დედოფლისწყაროს მუნიციპალიტეტს ეწვივნენ. გერმანული მხარე დედოფლისწყაროში მათივე დაფინანსებული პროექტების მიმდინარეობით დაინტერესდა.

დედოფლისწყაროში იმყოფებოდნენ პროექტის „ადგილობრივი თვითმმართველობის განვითარება სამხრეთ კავკასიაში“ ხელმძღვანელი დოქტორი პეტრა შტრემპლატი, GIZ-ის დირექტორი მენეჯმენტის საკითხებში ადოლფ კლკე ლეში და მისი მოადგილე მარია ჟოზე პოდი. GIZ-ის ახალი წარმომადგენლობა დედოფლისწყაროს პირველად სტუმრობდა. შეხვედრას ესწრებოდნენ ასევე დედოფლისწყაროში მიმდინარე ქარულ-გერმანული პროექტების ხელმძღვანელები დიტერ მიულერი და გიორგი კოლბინი. ასევე, მუნიციპალიტეტის გამგებლისა და საკრებულოს თავმჯდომრის მოადგილეები.

სტუმრები თავდაპირველად დედოფლისწყაროს თვითმმართველობის ორგანოს პირველ სართულზე, ერთი ფანჯრის პრინციპით გახსნილ მოქალაქეთა მომსახურების ბიუროს თანამედროვე სტანდარტებით აღჭურვილ ოფისს ეწვივნენ და მათი მუშაობის სპეციფიკითა და სტატისტიკური მონაცემებით დაინტერესდნენ.

როგორც მმბ-ს თანამშრომლებმა სტუმრებს განუმარტეს, მათი მომსახურებით დღეში 20-ზე მეტი ადამიანი სარგებლობს. შემოსულ მოქალაქეთ განცხადებებზე უმრავლესობა დადებითი პასუხით ბრუნდება, დანარჩენს კი დასაბუთებული უარი აქვს. ბიუროს ძირითადად სოციალურ თემაზე და ჯანმრთელობის პრობლემების დროს აკითხავენ.

გერმანული მხარე დაინტერესდა, შესაძლებლობის შემთხვევაში კიდევ რა სფეროში ისურვებს დედოფლისწყაროს მუნიციპალიტეტი ინვესტიციების ჩადებას. კითხვის პასუხად დედოფლისწყაროს ხელმძღვანელობამ პრიორიტეტად სოფლის მეურნეობის განვითარება და ტექნიკის შემოტანა დაასახელა. მათი თქმით, მნიშვნელოვანია ადგილობრივი სათესლე მეურნეობის შექმნაც.„ახალგაზრდა ქვეყნის დემოკრატიულობის განვითარებისთვის ადმინისტრაციის მოქალაქეებთან დამოკიდებულებას პრინციპული მნიშვნელობა აქვს. როგორც დავინახეთ დედოფლისწყაროში მმბ ამ მისიას წარმატებით ასრულებს,“ – აღნიშნეს სტუმრებმა.

მმბ-ს მონახულების შემდეგ სტუმრებმა მუნიციპალიტეტის გამგებლის კაბინეტში სამუშაო სხდომა გამართეს და ინფორმაცია გაცვალეს.

შეხვედრის დასასრულს გერმანელი სტუმრები შირაქის ველებზე გაემგზავრნენ და მათივე მხარის მიერ დაფინანსებული გაუდაბნოებასთან ბრძოლის პროექტის ფარგლებში დედოფლისწყაროში გაშენებული ქარსაფარი ზოლები და ტყის კორომები ადგილზე მოინახულეს.

შეგახსენებთ, გერმანიის საერთაშორისო თანამშრომლობის საზოგადოება GIZ-ი დედოფლისწყაროში გაუდაბნოების პროცესების შესაჩერებლად მასშტაბურ პროექტებს ახორციელებს, რაშიც სოლიდურ თანხებს ხარჯავს. /ქიზიყი/ ილია მარტყოფლიშვილი

ეთიკის ქარტიის საბჭომ დედოფლისწყაროს გამგებლის ქორწინებასთან დაკავშირებულ სტატიაზე ჟურნალისტი გაამართლა

ჟურნალისტური ეთიკის ქარტიის საბჭომ ჟურნალისტ რომან ქევხიშვილის განცხადება არ დააკმაყოფილა და გადაწყვიტა, რომ „კახეთის საინფორმაციო ცენტრის“ (Ick.ge) ხელმძღვანელმა გელა მთივლიშვილმა ქარტიის მეათე პრინციპი არ დაარღვია. საქმე ეხება 28 იანვარს Ick.ge-ზე გამოქვეყნებულ მასალას „დედოფლისწყაროს გამგებელი თაფლობის თვის გასატარებლად დუბაიში იმყოფება“.

რომან ქევხიშვილის მოსაზრებით, ამ სტატიაში დარღვეული იყო ეთიკის ქარტიის მე-10 პრინციპი, სადაც ნათქვამია „ჟურნალისტმა პატივი უნდა სცეს ადამიანის პირად ცხოვრებას და არ შეიჭრას პირად ცხოვრებაში, თუ არ არსებობს განსაკუთრებული საზოგადოებრივი ინტერესი“.

რომან ქევხიშვილი მიიჩნევდა, რომ გამგებლის საქორწინო მოგზაურობა მაშინ იქნებოდა განსაკუთრებული ინტერესის საგანი, თუ სახელმწიფო ბიუჯეტიდან დაფინანსდებოდა.
ქარტიის საბჭოს სხდომას არ დასწრებია არც განცხადების ავტორი და არც მოპასუხე მხარე. გელა მთივლიშვილმა საბჭოს წევრებს გამოუგზავნა შეპასუხების წერილი, სადაც ნათქვამია, რომ მასალის გამოქვეყნების მომენტში, 28 იანვარს, მას აღარ ეკავა რედაქტორის პოსტი „კახეთის საინფორმაციო ცენტრში“. მთივლიშვილის თქმით, ის რჩება მხოლოდ შპს „ცენტრი – იმედის“ დირექტორად, რომლის პროექტიცაა Ick.ge. მისივე განმარტებით, ის აღარ ერევა საინფორმაციო სამსახურის მუშაობაში. წერილს თან ახლავს გელა მთივლიშვილის მიერ 9 იანვარს გაცემული ბრძანება, Ick.ge-ს რედაქტორის თანამდებობაზე მანანა აშკარელიშვილის დანიშვნის შესახებ.

ამ ცვლილების შესახებ გელა მთივლიშვილს ქარტიის საბჭოსთვის არ უცნობებია იმ დროს, როდესაც რომან ქევხიშვილის განცხადება დასაშვებობის ეტაპს გადიოდა. რადგან ქარტიის სამი წევრის მიერ აღნიშნული განცხადება განსახილველად უკვე დაშვებული იყო, მსჯელობა გააგრძელეს და გადაწყვეტილებაც გამოიტანეს.

საბჭოს წევრებმა მიიჩნიეს, რომ გამგებლის საქორწინო მოგზაურობის მიმართ საზოგადოებრივ ინტერესი არსებობს, ვინაიდან ის განკარგავს საჯარო ფინანსებს და მისი მეუღლეც ამავე გამგეობაში მოქალაქეთა მომსახურების ბიუროს ხელმძღვანელია.

შეგახსენებთ, გამგებლის ქორწინებასთნ დაკავშირებით ინფორმაცია თავდაპირველად “ქიზიყმა” ექსკლუზიურად, ფოტოების თანხლებით გაავრცელა. /ქიზიყი/

ზემო ქედში ზაირა ყველაშვილის ძვირადღირებულ ოპერაციას გუბერნატორი და გამგეობა დააფინანსებს

დედოფლისწყაროში ახლახან ჩამოსულ პრეზიდენტის რწმუნებულს გიორგი ღვინიაშვილს, რომელიც მოსახლეობასთან შეხვედრას მართავდა, ადგილობრივმა მოქალაქეებმა სოფელ ზემო ქედში მცხოვრები ავადმყოფი მოქალაქის ზაირა ყველაშვილისთვის გულის ოპერაციის დასაფინანსებლად დახმარება სთხოვეს. როგორც შეხვედრისას გაირკვა, ქალბატონს ოპერაციისთვის დაუყოვნებლივ ესჭიროება 4 000 ლარი, თუმცა ოჯახს ამის ფინანსური შესაძლებლობა არ აქვს, რის გამოც მკურნალობას ვერ ახერხებს.

რაც შეეხება ზაირა ყველაშვილისთვის გულის ოპერაციის დაფინანსებას, გუბერნატორთან გამართულ შეხვედრაზევე გადაწყდა, რომ გამგეობაში საჭირო დოკუმენტაციის წარდგენის შემდეგ, ზაირა ყველაშვილის გულის ოპერაციას 2000 ლარით დააფინანსებს დედოფლისწყაროს მუნიციპალიტეტის გამგეობა, ხოლო 2000 ლარით – თავად გუბერნატორი.

შეგახსენებთ, კახეთის გუბერნატორმა დედოფლისწყაროს მუნიციპალიტეტის სოფლებში მასშტაბური შეხვედრების სერია 23 აპრილიდან გამართა და ადგილობრივების პრობლემები დეტალურად მოისმინა. /ქიზიყი/

სასამართლომ თამაზაშვილის ბინიდან ამოღებულ იარაღის ჩამონათვალზე სპეციალური განცხადება გაავრცელა

თბილისის საქალაქო სასამართლოში თამაზ თამაზაშვილის საქმის განხილვა დასრულდა. მოსამართლის გადაწყვეტილებით, პოლიციის ყოფილ მაღალჩინოსანს თავისუფლების აღკვეთა სამწლინახევრით განესაზღვრა. სასამართლოს პრესსამსახურმა ამასთან დაკავშირებით ინფორმაცია გაავრცელა. "ქიზიყი" საქალაქო სასამართლოს სპეციალურ განცხადებას უცვლელად გთავაზობთ.

„2012 წლის 30 აპრილს, თბილისის საქალაქო სასამართლომ დაასრულა სისხლის სამართლის საქმის განხილვა თამაზ თამაზაშვილის მიმართ. მას ბრალად ედებოდა ცეცხლსასროლი იარაღისა და საბრძოლო მასალის, ასევე ასაფეთქებელ მოწყობილობათა მართლსაწინააღმდეგო შეძენა და შენახვა. მასვე ბრალად ედებოდა ცეცხლსასროლი იარაღის მართლსაწინააღმდეგო ტარება.

საქმის მასალების მიხედვით: 2011 წლის 11 ოქტომბერს, ოპერატიული ინფორმაციის საფუძველზე, თბილისში - კოსტავას გამზირზე სამართალდამცავების მიერ გაჩერებულ იქნა „ნისანის“ მარკის ავტომანქანა, რომელსაც თამაზ თამაზაშვილი მართავდა. ვინაიდან არსებობდა დასაბუთებული ვარაუდი იმისა, რომ იგი ინახავდა კანონსაწინააღმდეგო ნივთს და შესაძლო იყო მტკიცებულება მოეშორებინა, მას ადგილზევე ჩაუტარდა ავტომობილის ჩხრეკა. ჩხრეკისას ავტომანქანის საბარგულიდან სხვა ნივთებთან ერთად ამოღებული იქნა AK-74 მოდელის, 5,45 კალიბრის „კალაშნიკოვის“ კონსტრუქციის N 797207 ავტომატური ცეცხლსასროლი იარაღი, მჭიდითა და 26 საბრძოლო ვაზნით.

ამასთან, იმავე დღეს დედოფლისწყაროში, პუშკინის ქუჩა #45 ჩატარებულ იქნა მისივე საცხოვრებელი სახლის ჩხრეკა. ჩხრეკისას სამართალდამცავების მიერ ამოღებულ იქნა სხვადასხვა სისტემის ცეცხლსასროლი იარაღი, საბრძოლო მასალა და ასაფეთქებელი მოწყობილობა, რომელიც თ. თამაზაშვილმა მართლსაწინააღმდეგოდ შეიძინა და ინახავდა, კერძოდ:

1) 80 ც ვაზნა 5,45 მმ კალიბრის, განკუთვნილი „კალაშნიკოვის“ კონსტრუქციის ავტომატებისა და ტყვიამფრქვევებისათვის, აქედან 53 ცალი ვაზნა მიეკუთვნებოდა საბრძოლო მასალათა კატეგორიას და ვარგისი იყო გამოსაყენებლად.

2) ქარხნული წესით დამზადებული 9 მმ-იანი კალიბრის „მაკაროვის“ კონსტრუქციის პისტოლეტი.

3) ქარხნული წესით დამზადებული 8 ცალი ვაზნა 9 მმ-იანი კალიბრის, განკუთვნილი „მაკაროვისა და სტეჩკინის“ კონსტრუქციის პისტოლეტისა და ავტომატური პისტოლეტისათვის.

4) 7, 62 მმ კალიბრის "ნაგანი"-ს სისტემის რევოლვერი.

5) 10, 67მმ კალიბრის „SMITH&WESSON“ სისტემის რევოლვერი.

6) 59 ცალი 5,45მმ კალიბრის ვაზნა, განკუთვნილი „კალაშნიკოვის“ კონსტრუქციის ავტომატებისა და ტყვიამფრქვევებისათვის

7) 4 ცალი 9 მმ კალიბრის ქარხნული წესით დამზადებული ვაზნა

8) ქარხნული წესით დამზადებული „კალაშნიკოვი“- ს კონსტრუქციის „AKCY“ მოდელის 5, 45მმ კალიბრის ავტომატური ცეცხლსასროლი იარაღი.

9) 42 ცალი 5,45 მმ კალიბრის სამხედრო ვაზნა, განკუთვნილი „კალაშნიკოვის“ კონსტრუქციის ავტომატებისა და ტყვიამფრქვევებისათვის

10) 5,6 მმ კალიბრის „TO3-17“ კარაბინი 4 ცალი ვაზნით.

11) 5,6 მმ კალიბრის 46 ცალი ვაზნა.

12) Ф-1 ტიპის ხელყუმბარა.

ასევე ამოღებული იქნა 5,6 მმ კალიბრის „ARMINIUS“ სისტემის გერმანული წარმოების რევოლვერი, რომელიც, როგორც გამოძიებისთვის მოგვიანებით გახდა ცნობილი გაფორმებული იყო თ. თამაზაშვილზე, რის გამოც იგი ამოერიცხა ბრალიდან.

სასამართლო განხილვისას თამაზ თამაზაშვილმა თავი არ ცნო დამნაშავედ წარდგენილ ბრალდებაში. საქმის არსებითი განხილვისას გამოკვლეული მტკიცებულებებით, კერძოდ: სამი მოწმის ჩვენებით, ავტომანქანის ჩხრეკის ოქმით, ამოღებული ნივთიერი მტკიცებულებებით, დადგინდა რომ თ. თამაზაშვილი ინახავდა და ატარებდა ავტომატურ ცეცხლსასროლ იარაღს, ხოლო ექვსმა მოწმემ დაადასტურა, რომ თ. თამაზაშვილი დედოფლისწყაროს რაიონში მდებარე მის კუთვნილ სახლში ინახავდა სხვადასხვა დასახელების ცეცხლსასროლ იარაღს, საბრძოლო მასალას და ასაფეთქებელ მოწყობილობას. ბალისტიკური და პიროტექნიკური ექსპერტიზების დასკვნებითა და ღია სასამართლო სხდომაზე დაკითხული ექსპერტების ჩვენებებით დადგინდა, რომ თ. თამაზაშვილის ავტომანქანის და ბინის ჩხრეკისას ამოღებული ნივთები მიეკუთვნება ცეცხლსასროლ იარაღთა კატეგორიას და ვარგისია სროლისათვის, ასევე საბრძოლო მასალა და ასაფეთქებელი მოწყობილობა ვარგისია დანიშნულებით გამოყენებისათვის.

ამდენად, დასახელებულ მტკიცებულებათა ერთობლიობით უტყუარად დადასტურდა მის მიმართ წარდგენილი ბრალდება.

თბილისის საქალაქო საასმართლომ თამაზ თამაზაშვილი დამნაშავედ ცნო წარდგენილ ბრალდებაში და დანაშაულთა ერთობლიობით, საბოლოოდ სასჯელის სახედ და ზომად 3 წლისა და 6 თვის ვადით თავისუფლების აღკვეთა განუსაზღვრა“, –აღნიშნულია სასამართლოს ინფორმაციაში. /ქიზიყი/

სოფელ ჭოეთში მცხოვრები ბოშები ეროვნულ ბიბლიოთეკაში სპექტაკლს გამართავენ

EXCLUSIVE – „ტოლერანტობა საქართველოში“ – ასე ჰქვია ეროვნული ბიბლიოთეკის დარბაზში კუთხეს, სადაც ეროვნული უმცირესობების შესახებ წიგნები გამოიფინა.

ეროვნული უმცირესობების შესახებ სახალხო დამცველის ოფისთან არსებული ტოლერანტობისა და ეროვნული ბიბლიოთეკის ფონდებში დაცული ლიტერატურა, ღონისძიების – „ბოშები საქართველოში“ ფარგლებში გამოფინეს. დამთვალიერებელს 1 მაისიდან ბოშების პორტრეტების ნახვაც შეუძლია.

ქალაქ დედოფლისწყაროს მეორე საჯარო სკოლის ეთნიკური უმცირესობის წარმომადგენელი მოსწავლეები და დედოფლისწყაროს მუნიციპალიტეტის სოფელ ჭოეთში ჩასახლებული ბოშები ღონისძიების ფარგლებში სპეციალურად მომზადებულ სპექტაკლს, სახელწოდებით „ვარსკვლავბიჭუნა“ წარადგენენ.

„ბოშები საქართველოში“ – ამ სახელწოდების ღონისძიების ფარგლებში 1 მაისს ეროვნული უმცირესობათა საბჭოს მიერ საქართველოში ბოშების უფლებრივი-სტრუქტურული მდგომარეობის შესახებ ჩატარებული კვლევის პრეზენტაციასაც მართავს.

„ჩვენ ბიბლიოთეკაში ვხსნით ეთნიკური და რელიგიური უმცირესობებისთვის განკუთვნილ მუდმივმოქმედ კუთხეს, სადაც ერთის მხრივ წარმოდგენილი იქნება უმცირესობების სიმბოლიკები, მეორე მხრივ წიგნები და განახლებადი მასალა. ეს ყველაფერი ეროვნული ბიბლიოთეკისა და სახალხო დამცველის ფონდის მემორანდუმში იქნება მოქცეული, რომელიც ეროვნული უმცირესობების წარმომადგენელთა ხელშეწყობას ითვალისწინებს,“- განმარტავს ეროვნული ბიბლიოთეკის გენერალური დირექტორი გიორგი კეკელიძე.

„ეს სპექტაკლი მოვამზადეთ დედოფლისწყაროში, მეორე საჯარო სკოლის მოსწავლეებისა და სოფელ ლენინოვკის, დღევანდელი ჭოეთის მაცხოვრებელი ბოშების მონაწილეობით. ისინი წარმოადგენენ ოსკარ უაილდის სპექტაკლს „ვარსკვლავბიჭუნას“, რომელიც მოგვითხრობს სიკეთეზე. ამ წარმოდგენის მზადების დროს მთავარი იყო პროცესი და არა შედეგი. მათ ძალიან უხარიათ, რომ სპექტაკლს ერთობლივად აჩვენებენ მაყურებელს. მტავარი ისაა, რომ ისინი როლებს თავად ინაწილებენ და მუშაობის დროს მეგობრდებიან,“ – აცხადებს სპექტაკლის რეჟისორი ლელა ცქიტიშვილი. ის „სამოქალაქო აქტიურობის ხელშეწყობის პროგრამის“ კოორდინატორია.

როგორც „ქიზიყმა“ შენიშნა, მეორე საჯარო სკოლის მოსწავლეებმა სპექტაკლი „ვარსკვლავბიჭუნა“ ილიას სახელმწიფო უნივერსიტეტში გასული წლის 26 ნოემბერს „სამოქალაქო აქტიურობის ხელშეწყობის პროგრამის“ ფარგლებშიც გამართეს. დედოფლისწყაროს #2 საჯარო სკოლამ თეატრალურ ფესტივალში გამარჯვება მოიპოვა.

შეგახსენებთ, „სამოქალაქო აქტიურობის ხელშეწყობის პროგრამას“ საქართველოს განათლებისა და მეცნიერების სამინისტრო 2007 წლიდან წარმატებით ახორციელებს. პროგრამის მიზანი სხვადასხვა სოციალური ფენისა და წარმომავლობის მოზარდების დამეგობრება და მათი საზოგადოებრივ საქმიანობებში ჩართვაა.

ცნობისთვის: ქალაქ დედოფლისწყაროს მეორე საჯარო სკოლა ერთ–ერთი სკოლაა, სადაც ყველაზე მეტი ბოშა მოსწავლე ირიცხება. წერა–კითხვა არც მათმა მშობლებმა იციან, ამდენად, მათი სკოლაში შეყვანა განსაკუთრებით მნიშვნელოვანი იყო. იმის გამო, რომ ისინი რაიონული ცენტრისგან მკვეთრად მოწყვეტილები არიან და სხვა სოფელში ცხოვრობენ, სკოლაში სიარულს ვერ ახერხებდნენ, თუმცა ბოლო დროს მათ სპეციალური სასკოლო ავტობუსი ემსახურებათ, რომელიც ბოშა ბავშვების ტრანსპორტირებას ყოველდღიურად უზრუნველყოფს. /ქიზიყი/ ილია მარტყოფლიშვილი

თამაზ თამაზაშვილს 3,6 წლით პატიმრობა მიესაჯა, ადვოკატი გასაჩივრებას გეგმავს (ვიდეო)

თბილისის საქალაქო სასამართლოს მოსამართლე გიორგი არევაძეს გადაწყვეტილებით ბიძინა ივანიშვილის თანაპარტიელ ირაკლი ღარიბაშვილის სიმამრს, კახეთის პოლიციის ყოფილ უფროსს თამაზ თამაზაშვილს სასჯელის სახით 3,6 წლით თავისუფლების აღკვეთა მიესაჯა.

თამაზაშვილი სასამართლომ დამნაშავედ სისხლის სამართლის კოდექსის 236-ე მუხლის პირველი და მეორე ნაწილების საფუძველზე სცნო. აღნიშნული მუხლი ცეცხლსასროლი იარაღის უკანონოდ შეძენა-შენახვასა და ტარებას ითვალისწინებს.

როგორც თამაზაშვილის ადვოკატმა ლილი გელაშვილმა ჟურნალისტებთან საუბრისას განაცხადა, დაცვის მხარე ერთი თვის ვადაში ამ გადაწყვეტილებას სააპელაციო სასამართლოში აუცილებლად გაასაჩივრებს.

ირაკლი ღარიბაშვილი “ქიზიყთან” საუბრისას აცხადებს, რომ თამაზაშვილი პოლიტიკური პატიმარია და სასამართლო გადაწყვეტილებას უკანონოს უწოდებს:

“თამაზ თამაზაშვილი არის უკანონო პატიმარი, ამ გადაწყვეტილებას აუცილებლად გავასაჩივრებთ და სააპელაციო სასამართლოს მივმართავთ. ამის შემდეგ კი აუცილებლად მივმართავთ ევროსასამართლოს,” – აცხადებს ირაკლი ღარიბაშვილი.

მისივე თქმით, კახეთის პოლიციის ყოფილი უფროსი თამაზაშვილი ცოტა ხნის წინ საპატიმროში ნერვიულობის საფუძველზე შეუძლოდ გახდა, გულის შეტევის შედეგად იგი ციხის საავადმყოფოშიც გადაიყვანეს. ადვოკატის განმარტებით, ამ ეტაპზე თამაზაშვილი აცხადებს, რომ მის წინააღმდეგ ზეწოლა არ ხორციელდება.

კახეთის პოლიციის ყოფილი უფროსი თამაზ თამაზაშვილი სამართალდამცავებმა 2011 წლის 11 ოქტომრებს დააკავეს. იარაღი დედოფლისწყაროში მდებარე ბინიდან ამოიღეს.

თამაზ თამაზაშვილი დანაშაულს არ აღიარებს. 2011 წლის 11 ნოემბერს, დედოფლისწყაროს რაიონის სოფელ ლენინოვკაში თამაზ თამაზაშვილის სახლი დაიწვა. სახლს ხანძარი გაურკვეველ ვითარებაში გაუჩნდა, მეხანძრეები კი შემთხვევის ადგილზე 1 საათის დაგვიანებით მივიდნენ.

თამაზ თამაზაშვილი, 1997–2000 წლებში დედოფლისწყაროს პოლიციის სამმართველოს უფროსის თანამდებობაზე მუშაობდა, ხოლო შს კახეთის სამხარეო პოლიციას 2000-2002 წლებში ხელმძღვანელობდა. ის დედოფლისწყაროში ცხოვრობს. /ქიზიყი/

სახანძრო-სამაშველო სამსახურის უფროსს მედიასთან კონტაქტი აეკრძალა?!

დედოფლისწყაროში უკანასკნელი ხანძრის შემთხვევის დაფიქსირების დროს მუნიციპალიტეტის სახანძრო-სამაშველო სამსახურის ახლადდანიშნულმა უფროსმა ლევან გოზალიშვილმა ხანძრის შემთხვევის დეტალებზე „ქიზიყთან“ საუბარი არ ისურვა და მომხდარის ირგვლივ ინფორმაციის დამალვა სცადა.

„ადგილზე ვარ, ცეცხლი უკვე ჩავაქრეთ… მაგრამ, არ ვიცი… მოდი, გამგეობის პრესსამსახურს დაუკავშირდით ხვალ და ყველაფერს გეტყვიან,“ – განუცხადა „ქიზიყს“ გოზალიშვილმა და ტელეფონი გათიშა.

არადა, ჩვენს შეხმიანებამდე ორი წუთით ადრე გოზალიშვილი ტელეკომპანია „იმედის“ კახეთის ბიუროს ჟურნალისტსაც ტელეფონით ესაუბრა, თუმცა მასთან სამსახურის უფროსს ინფორმაციის დამალვის მცდელობა არ ჰქონია და კითხვებზე პასუხიც გასცა.

ტელეფონის გათიშვისთანავე „ქიზიყი“ გოზალიშვილს კიდევ ერთხელ შეეხმიანა და იმის გარკვევა სცადა, რატომ აღარ თანამშრომლობს ის ადგილობრივ ჟურნალისტებთან, ან რას უკავშირდება მისი მხრიდან დაინტერესებული ჟურნალისტის პრესსამსახურში გადამისამართება.

ამ კითხვებზე გოზალიშვილს დეტალები არ დაუკონკრეტებია, თუმცა ხაზგასმით იმეორებდა, რომ თუ რაიმე გვაინტერესებს, გამგეობის პრესსამსახურს უნდა დავუკავშირდეთ.

გოზალიშვილმა „ქიზიყს“ ცოცხალი თავით არ გაუმხილა, თუ ვისი ოჯახი დაზარალდა 26 აპრილს გაჩენილი ხანძრის შედეგად.

- ვერ გეტყვი, ხვალე პრესსამსახურს დაურეკე და…

- ვის პრესსამსახურს? ვინ არის პრესსამსახური?

- გამგეობის პრესსამსახურს დაუკავშირდით და რაც გაინტერესებთ, ყველაფერს გეტყვიან.

- უკაცრავად, ამ წუთას, ჩემამდე „იმედის“ ჟურნალისტს ესაუბრე და ნუთუ მათაც ასე უთხარი, რომ არაფერი იცი და პრესსამსახურთან დარეკეთო?

- მაგათაც ეგ უთხარი რო ცეცხლი უკვე ჩავაქრეთ მეთქი და თქვენც მაგას გეუბნებით. ის ქალი წაიყვანეს და სხვა არაფერი არ ვიცი…

- ქალზე არ გეკითხები, მხოლოდ ის მაინტერესებს, რა გვარია ეს ოჯახი, ანუ ვისი ბინა დაიწვა? მხოლოდ ვინაობა გვითხარი…

- არ ვიცი. ეხლა მაგათი გვარი ნამდვილად არ ვიცი… ხვალე პრესსამსახური გეტყვით.

- ინფორმაცია ახლა გვჭირდება. ანდა, სად გინახავს, ამგვარი სასწრაფო შემთხვევების დროს ჟურნალისტებს ასე პასუხობდნენ, ინფორმაციას უმალავდნენ და პრესსამსახურისკენ უთითებდნენ?

- ვერ გეტყვით რა…

- რანაირად არ იცი, გამოძახების შესახებ შეტყობინება ხომ შემოვიდა თქვენთან…

- გამოძახება შემოვიდა, მაგრამ პირდაპირ მოვედით და ეხლა მაგათი გვარი არ ვიცი…

- ანუ, ოფიციალურად არ აფიქსირებთ-ხოლმე, ვის ბინაზე მოხდა გამოძახება?

- ვაფიქსირებთ, მაგრამ ეხლა არ ვიცი“

ხანძრის შემთხვევის შესახებ საკუთარი ძალებით მოპოვებული ინფორმაცია „ქიზიყმა“ იმავე ღამით გაავრცელა. გოზალიშვილის უცნაურ ქმედებას კი ახსნა მეორე დღეს მოეძებნა. ადგილობრივი თვითმმართველობის ოფიციალურ ვებ-გვერდზე შემთხვევიდან მეორე დღეს გავრცელდა ინფორმაცია ხანძრის თაობაზე, სადაც გვარი-სახელი და ზუსტი მისამართიც არის მითითებული.

ციტატა: – „სოფელ ხორნაბუჯში, მეგობრობის ქ. №23-ში, მოქალაქე ცისანა გელაშვილის საცხოვრებელ სახლში გაჩნდა ხანძარი. დედოფლისწყაროს მუნიციპალიტეტის სახანძრო დაცვისა და სამაშველო სამსახურში, ხანძრის თაობაზე შეტყობინება 22:55 შევიდა. 23:00 საათზე სახანძრო დაცვის ბრიგადა შემთხვევის ადგილზე გამოცხადდა და 5 წუთში მოახერხა ხანძრის ლოკალიზება. ხანძრის სრული ლიკვიდაცია 23:45 წუთზე მოხდა. ხანძრის შედეგად დაიწვა იმ ოთახის ნაწილი, სადაც ხანძრის კერა იყო.“

ერთის მხრივ, პრესსამსახურის მიერ გავრცელებული ამბავი გვამცნობს, რომ გოზალიშვილის ბრიგადამ ცეცხლის ლოკალიზება ფრიად ოპერატიულად, სულ რაღაც 5 წუთში მოახდინა. თუმცა, იქვე იუწყება, რომ შემთხვევის ადგილზე 23:00 საათზე მისულმა ბრიგადამ ხანძრის ლიკვიდაცია 23:45 წუთზე შეძლო.

როგორც ჩანს, სავარაუდოდ, გოზალიშვილმა ცალკეული საჯარო მოხელეების მხრიდან ბოლო დროს მითითება მიიღო, რომ მის ხელთ არსებული ინფორმაცია ჟურნალისტებს არ გაანდოს და გამგეობის პრესსამსახურს ექსკლუზიურ ლუკმად შემოუნახოს. მისი ქმედება ამ ვარაუდს საფუძვლიანს ხდის.

ისიც უნდა აღინიშნოს, რომ ამ დრომდე, გოზალიშვილი ხანძრის შემთხვევებთან დაკავშირებით „ქიზიყის“ ნებისმიერ კითხვას პასუხობდა და ინფორმაციასაც უპრობლემოდ გვაძლევდა. დამოუკიდებელ პრესასთნ თანამშრომლობის სურვილი მან მხოლოდ უკანასკნელ შემთხვევაში დაკავშირების დროს დაკარგა.

„ქიზიყის“ რედაქცია მომხდარს გმობს, ფაქტს ლევან გოზალიშვილის მხრიდან სიტყვის თავისუფლების შეზღუდვის მცდელობად, მის გამოუცდელობად აფასებს და სახანძრო-სამაშველო სამსახურის შეფს წინდახედულობისა და თანამშრომლობისაკენ მოუწოდებს. /ქიზიყი/

ილია მარტყოფლიშვილი ეჭვობს, რომ ნაცმოძრაობამ დეპუტატობის კანდიდატად კედელაშვილი დაასახელოს

წინა კვირაში ბიძინა ივანიშვილმა ბოდიში მოიხადა სააკაშვილის დაფინანსების გამო. მას არ დაუკონკრეტებია, მარტო სააკაშვილის დაფინანსების გამო იხდიდა ბოდიშს თუ მხედველობაში მთელი ნაცმოძი ჰყავდა. ბიზნესმენი ხომ მათაც გვარიანად აფინანსებდა. ახლა მისი ფულების რუსულ წარმომავლობაზე, რომ კივიან მაშინ კარგად იდებდნენ ჯიბეში. თქვე დალოცვილებო, თუ ეს ფული რუსული წარმოშობის იყო, ერთხელ მაინც რატომ არ დაგეწვათ ჯიბე. ან უკან რატომ არ დააბრუნა ვინმემ ეს ფული?

ამ დღეებში ერთი ძალიან საინტერესო ინფორმაცია გახდა ცნობილი. კვირის დასაწყისში გავიგეთ, რომ დედოფლისწყაროს მაჟორიტარად კენჭს ზაზა კედელაშვილი იყრიდა.

ეს ახალგაზრდა ადგილობრივი ნაციონალების ერთერთი ლიდერია. ამის გარდა, კედელაშვილი ძიუდოში სამგზის ევროპის ჩემპიონია. ადგილობრივ მოსახლეობას ის ძალიან უყვარს. ნაცმოძმა სწორედ ამიტომ გააკეთა მასზე არჩევანი.

ჰოდა, ნაციონალების რჩეულს, თურმე ნაციონალების მიერ ქვეყნის მთავარ მტრად შერაცხული ბიძინა ივანიშვილი აფინანასებს. თანაც საკმაოდ კარგად. „ქართული ოცენბის“ ლიდერი ზაზა კედელაშვილს თვეში 1 500 ლარს უხდის.

_ ბიძინა ივანიშვილის მრჩეველის, კოალიცია „ქართული ოცნების“ საინიციატივო ჯგუფის წევრის ირაკლი ღარიბაშვილის მტკიცებით, სპორტსმენი, ევროპის სამგზის ჩემპიონი ძიუდოში ზაზა კედელაშვილი, რომელსაც ნაციონალური მოძრაობა საპარლამენტო არჩევნებში მაჟორიტარ კანდიდატად განიხილავს, ფონდი „ქართუსგან“ ყოველთვიურ საქველმოქმედო დახმარებას ღებულობს _ თვეში 1 500 ლარის ოდენობით.

ირაკლი ღარიბაშვილის განმარტებით, დედოფლისწყაროელი სპორტსმენი პოლიტიკური ამბიციების პარალელურად ივანიშვილის დახმარებას ამ დრომდე იღებს. კედელაშვილი ოლიგარქის ქველმოქმედებით ბოლო 5 წელია სარგებლობს,“ _ იუწყება ინტერნეტგამოცემა „ქიზიყი“.

ბუნებრივია იბადება კითხვა, რატომ აფინანსებს ივანიშვილი ნაციონალების ერთ-ერთ ლიდერს. სხვა თუ არაფერი ის გვპირდება, რომ ერი ნაციონალებისგან უნდა გაათავისუფლოს.

_ ჩვენი ფონდი ადამიანებს პოლიტიკური ნიშნით არასოდეს არჩევდა, ჩვენ მხოლოდ მათი მიღწევებისა და დამსახურების მიხედვით ვუნიშნავდით ყოველთვიურ დახმარებას. ჩვენგან უხერხულია პოლიტიკური ნიშნით ადამინების გამორჩევა _ ჩვენ ასეთი მენტალიტეტის ვართ, ასეთი მრწამსი გვაქვს და ყველა ჩვენი დახმარება აბსოლუტურად უანგარო იყო, არის და იქნება,“ _ განუცხადა „ქიზიყს“ ღარიბაშვილმა.

ბიძინა ივანიშვილის პოლიტიკაში წასვლის შემდეგ, საზოგადოებისთვის ბევრი საინტერესო ინფორმაცია გახდა ცნობილი. დიდი რეზონანსი გამოიწვია იმ დახმარებებმა, რომელსაც ივანიშვილი საზოგადოებისთვის ცნობილ სახეებს უწევდა. სია საკმაოდ ვრცელი იყო. არც თანხები იყო მცირე.

გაირკვა, რომ ბიზნესმენი ეხმარებოდა სააკაშვილის მეუღლეს, გრიგოლ ვაშაძის მეუღლეს, გიგა ბოკერიას დედას, ნაციონალების თავგამოდებულ დამცველ გიორგი ასანიძეს და ა.შ. ამ სიაში ზაზა კედელაშვილი არ ფიგურირებდა.

ეს ახალგაზრდა კარგა ხანს გაუჩინარებული იყო. მისი გვარი ყურადღების ცენტრში 19 აპრილს მოექცა. როცა ნახმოძის ლიდერები დედოფლისწყაროში ჩავიდნენ. სადაც ადგილობრივ ლიდერებთან დახურულ კარს მიღმა გამართეს შეხვედრა. როგორც გაირკვა, ამ შეხვედრას ზაზა კედელაშვილიც ესწრებოდა.

ის დედოფლისწყაროელი ნაციონალების ლიდერად 2006 წელს აირჩიეს. გამოცემა „ქიზიყის“ რედაქტორის ილია მარტყოფლიშვილის ცნობით, კედელაშვილი დიდი პოლიტიკური აქტიურობით არასდროს გამოირჩეოდა.

მას თურმე არც ბოლო პერიოდში უაქტიურია. ამიტომაც ეპარება მარტყოფლიშვილს ეჭვი, რომ ნაცმოძი დეპუტატობის კანდიდატად მას დაასახელებს. „ქიზიყის“ რედაქტორი ამბობს, რომ ეს საკითხი ჯერ საბოლოოდ არ არის გადაწყვეტილი. თუმცა კედელაშვილის კანდიდატურა განიხილება.

იხილეთ ვრცლად>>

„დედოფლისწყაროს საოლქო-საარჩევნო კომისიაში ამომრჩეველთა სიებს აყალბებენ“

„თავისუფალი საქართველო“-ს დედოფლისწყაროს ორგანიზაციის თავმჯდომარე თამილა გურაშვილი N14 დედოფლისწყაროს საოლქო საარჩევნო კომისიის თავმჯდომარეს მიმართავს და მოუწოდებს არ დაუშვას ის გაყალბებები, რომელსაც 2008 წლის საპარლამენტო არჩევნებისას ჰქონდა ადგილი.

„დედოფლისწყაროში 2008 წლის საპარლამენტო და 2010 წლის თვითმმართველობის არჩევნების დროს სიებში მრავლად იყო „მკვდარი სულები“ და ასევე მოქალაქეები, რომლების წლების განმავლობაში იმყოფებიან საზღვარგარეთ. როგორც ჩვენთვის ცნობილია ნაციონალების კოორდინატორებს ჰქონდათ პირდაპირი მითითება ყველა უბანზე გაეკეთებინათ იმ ხალხის სია, რომლებიც ქვეყანაში არსებული გაჭირვების გამო იძულებულნი არიან წლობით გადაიხვეწონ უცხო ქვეყნებში ლუკმა-პურის საშოვნელად.

N14 დედოფლისწყაროს საოლქო საარჩევნო კომისიის თავმჯდომარესთან საარჩევნო უბნების სიაზე მისულმა „თავისუფალი საქართველო“-ს ადგილობრივი ორგანიზაციის ხელმძღვანელმა დააფიქსირა ფაქტი, თუ როგორ ახდენდნენ 2008 წლის საპარლამენტო არჩევნების დროინდელი სიების ამობეჭდვას საოლქო საარჩევნო კომისიის თავმჯდომარის მოადგილე რუსუდან ლათიბაშვილი და საოლქო საარჩევნო კომისიის მდივანი ნინო ბულაშვილი. შეკითხვაზე, თუ რაში ჭირდებოდათ მათ ძველი სიები, საოლქო საარჩევნო კომისიის წარმომადგენლებმა არ გვიპასუხეს.

„თავისუფალი საქართველო“-ს დედოფლისწყაროს ორგანიზაცია უნდობლობას უცხადებს N14 საოლქო საარჩევნო კომისიის მუშაობას. ჩვენ მომსწრენი ვართ, თუ როგორ ხდებოდა წინა არჩევნებზე „კარუსელის“ დატრიალება - ერთი სოფლის ხალხი ჩამოყავდათ მეორეში და ხელმეორედ ახდენდნენ ხმის მიცემას, ასევე ხდებოდა ბიულეტენების ჩაყრა აშკარად და ღიად, რაზეც რეაგირება არ ყოფილა. ხდებოდა მესაზღვრეების მხრიდან ხმის ორჯერ მიცემა და ასე შემდეგ. უნდა აღინიშნოს ის ფაქტიც, რომ საოლქო საარჩევნო კომისიის თავმჯდომარის მოადგილე არის კუდ-ის ადგილობრივი თანამშრომლის მეუღლე. ჩვენ დარწმუნებული ვართ, რომ როგორც ყოველთვის, ახლაც იქნება ამომრჩევლებზე ზეწოლა კუდ-ის მხრიდან.

„თავისუფალი საქართველო“-ს ადგილობრივი ორგანიზაცია მიმართავს N14 საოლქო საარჩევნო კომისიის თავმჯდომარეს დავით ბუჩუკურს, გამოიჩინოს კეთილგონიერება და არ დაუშვას საოლქო საარჩევნო კომისიის მუშაობაში მუნიციპალიტეტის ხელმძღვანელების და კუდ-ის თანამშრომლების ჩარევა ისე, როგორც ეს ხდებოდა ადრე. ვაფრთხილებთ N14 საოლქო საარჩევნო კომისიის თავმჯდომარეს არჩევნების გაყალბების ნებისმიერი მცდელობის შემთხვევაში, მოვაწყობთ საპროტესტო აქციას მისი სისხლის სამართლის პასუხისმგებლობის დაყენების მოთხოვნით!“, - აცხადებს გურაშვილი. /ქიზიყი/