პოლიტიკური მოძრაობა "თავისუფალი საქართველო" დედოფლისწყაროში გამართულ საპარლამენტო კომიტეტის გასვლით სხდომას ეხმაურება და განცხადებას ავრცელებს. მათი შეფასებით, სხდომა არაფრისმომცემი იყო და მხოლოდ ხელისუფლების პიარკამპანიის ნაწილს შეადგენდა. მოძრაობა ხელისუფლებას დედოფლისწყაროში, სამთაწყაროს ჩაკეტილი ხიდის გახსნისკენ მოუწოდებს.
"თავისუფალი საქართველო"-ს დედოფლისწყაროს ორგანიზაციაში აცხადებენ, რომ თუ პარლამენტარებს ინგილოების ბედი რეალურად ადარდებდათ, სოფელ სამთაწყაროში უნდა ჩასულიყვნენ და მათი აზრი პირადად მოესმინათ:
,,იმის ნაცვლად, რომ საკუთარი მოსაზრებები დაეფიქსირებინათ, უმჯობესი იქნებოდა, კომიტეტის წევრები დედოფლისწყაროს საზღვრისპირა სოფელ სამთაწყაროს სტუმრობდნენ და იქ მცხოვრები ინგილოების შენიშვნები ადგილზე პირადად მოესმინათ. მათ საკუთარ მაგალითზე ყველაზე უკეთ იციან, რა ხარვეზებია ქართულ-აზერბაიჯანულ ურთიერთობებში და რა აფერხებთ მათ საკუთარ ნათესავებთან კონტაქტში. უკვე მერამდენეჯერ ჩაიკეტა სამთაწყარო-საინგილოს დამაკავშირებელი ხიდი და დღემდე ვერავინ დაადგინა, კონკრეტულად ვისი ბრძანებითა და გადაწყვეტილებით აუკრძალეს ინგილოებს მიმოსვლა. რეალურად კი გარკვეულ ბიზნეს-ინტერესებსაც ჰქონდა ადგილი. ხელისუფლების ზოგიერთ მაღალჩინოსანთა პირად ინტერესებს კი ინგილოების ბედი ეწირება და ამ ფონზე ხიდის ჩაკეტვით ყველაზე მეტად სწორედ ადგილობრივმა ინგილოებმა იზარალეს," - აცხადებს დედოფლისწყაროს ორგანიზაციის ხელმძღვანელის მოვალეობის შემსრულებელი თამილა გურაშვილი.
მოძრაობა "თავისუფალი საქართველო" გავრცელებულ განცხადებაში ხელისუფლებას მოუწოდებს, დაუყოვნებლივ გაიხსნას სამთაწყაროს ხიდი, რათა მრავალსაუკუნოვან ტრადიციებს საფრთხე არ დაემუქროს. /ქიზიყი/
* * *
Комментариев нет:
Отправить комментарий