სიღნაღის პროკურატურის პროკურორმა დავით დუღაშვილმა პოლიციის მიერ სოფელ წითელწყაროში მცხოვრები 9 წლის ბავშვის ქურდობაში დადანაშაულების ფაქტზე კომენტარი გააკეთა. დუღაშვილის განცხადებით, პოლიციამ არასრულწლოვანის მამა დააკავა და ბავშვი მხოლოდ მოწმის სახით დაიკითხა, ამდენად, არასრულწლოვანის დაკავება არ მომხდარა:
,,კანონები ნამდვილად არ გვეშლება. კახეთის საინფორმაციო ცენტრმა რაც უნდა ის გაავრცელოს, ჩვენ ბავშვის მამა დავაკავეთ, ხოლო ბავშვი დაკითხვაზე დავიბარეთ. როგორც იცით, ბავშვს, რომელსაც საუბარი შეუძლია უკვე მოწმედ ითვლება და ამიტომაც დავკითხეთ, მისი დადანაშაულება არ მომხდარა. უბრალოდ, სოფელ მაზოვკაში მცხოვრები ეს ოჯახი კახეთის საინფორმაციო ცენტრის რედაქტორის გელა მთივლიშვილის ნათესავია და სწორედ ამიტომ ამ მედიასაშუალებამ საკითხს თავისებური ინტერპრეტაცია მისცა. ჩვენ კანონი ნამდვილად არ დაგვირღვევია," - განმარტა პროკურორმა.
კახეთის საინფორმაციო ცენტრის ინფორმაციით, სამართალდამცავებს მოზარდი რამდენიმე საათის განმავლობაში ჰყავდათ დაკავებული და ნებართვის გარეშე გადაადგილების უფლებას არ აძლევდნენ.
ამასთან, პოლიციის თანამშრომლებმა მოზარდი მშობლების გარეშე დაკითხეს, თუმცა პოლიციის სამმართველოში ბავშვის დაკითხვისა და დაკავების ოფიციალური ოქმი არ აქვთ. სისხლის სამართლის მოქმედი კოდექსით დანაშაულზე პასუხისმგებლობა 14 წლის ასაკიდან დგება. /ქიზიყი/
* * *
Комментариев нет:
Отправить комментарий