სოფლის რწმუნებულებს ხელფასები გაუორმაგდათ

მიმდინარე წლიდან სოფლის ტერიტორიული ორგანოს რწმუნებულებს ხელფასი 300 ლარით გაეზრდებათ და მათთვის განკუთვნილი თანამდებობრივი სარგო ყოველთვიურად 700 ლარით განისაზღვრება.
როგორც მუნიციპალიტეტების საკრებულოებში აცხადებენ, სოფლის რწმუნებულთათვის ხელფასების გაზრდის შესახებ ბრძანებულებას პრეზიდენტი გამოსცემს. 2012 წლის იანვრის ჩათვლით ტერიტორიული ორგანოს რწმუნებულის ყოველთვიური სახელფასო ანაზღაურება 400 ლარს შეადგენდა.
სოფელ სამთაწყაროს ტერიტორიული ორგანოს რწმუნებული პაატა ნადირაშვილი „ქიზიყთან“ საუბარში ამბობს, რომ ამჯამად შვებულებაშია და ხელფასის ზრდასთან დაკავშირებით დეტალები მისთვის უცნობია.
სოფელ სამრეკლოს ტერიტორიული ორგანოს სპეციალისტი ზურაბ ლეკაშვილი „ქიზიყთან“ საუბრისას ადასტურებს, რომ ხელფასი მათაც ეზრდებათ, თუმცა რამდენით, მისთვის უცნობია. სამრეკლოს რწმუნებული ვლადიმერ ჭუჭულაშვილი კი ამბობს, რომ არც საკუთარი ხელფასის ზრდისა და ოდენობის შესახებ ფლობს ინფორმაციას. მისთვის ასევე უცნობია, ეზრდებათ თუ არა შრომითი ანაზღაურება სპეციალისტებსაც.
არადა, „ქიზიყის“ ინფორმაციით, დედოფლისწყაროს საკრებულომ ამ საკითხს კენჭი უკვე უყარა.
გარდა ამისა, საკრებულოს დეპუტატები, რომლებსაც საწვავისა და კომუნიკაციისთვის სპეციალურ ტალონებს აძლევდნენ, ამიერიდან ისინი მსგავსი სახის ხარჯებისთვის არ ტალონებს, არამედ, შესაბამისი ოდენობის თანხას მიიღებენ. დეპუტატები ანაზღაურებას მიიღებენ საკრებულოს სხდომებში მონაწილეობისთვისაც. /ქიზიყი/ ილია მარტყოფლიშვილი