დედოფლისწყაროში რაგბის ტრადიციული ტურნირი დაფუძნდა

30 ოქტომბერს, დედოფლისწყაროში საქართველოს რაგბის კავშირისა და დედოფლისწყაროს მუნიციპალიტეტის საკრებულოსა და გამგეობის ინიციატივით რაგბის ტრადიციული ტურნირი დაფუძნდა. ამიერიდან ტურნირი ყოველწლიურად გაიმართება. „ქიზიყის“ ინფორმაციით, შვიდკაცა რაგბში და სპორტის ამ სახეობაში დედოფლისწყაროს ჩემპიონის წოდებისთვის გარდამავალი თასი გათამაშდება.

წვიმის მიუხედავად 30 ოქტომბერს გამართულ ტურნირში მონაწილეობა მიიღეს: დედოფლისწყაროს მორაგბეთა გუნდმა „მიმინომ“, თბილისის „ტორნადომ“ და „წიქარამ“, გურჯაანისა და თელავის მორაგბეთა გუნდებმა.

ნახევარფინალში ერთმანეთს შეხვდნენ თბილისის „ტორნადო“, გურჯაანის „კახები“ და და თბილისის „წიქარა“, ხოლო გამარჯვებული გუნდი დედოფლისწყაროს „მიმინოს“ შეერკინა და მასთან დამარცხდა კიდეც.

საბოლოო ჯამში გარდამავალი თასის მფლობელი დედოფლისწყაროს „მიმინო“ გახდა. მეორე ადგილზე თბილისის „წიქარა“ გავიდა, ხოლო მესამე ადგილს დასჯერდა თბილისის მორაგბეთა გუნდი“ტორნადო“.

გამარჯვებულ გუნდს გარდამავალი თასი, ასევე საპატიო ადგილებზე გასულ გუნდებს სამახსოვრო სიგელები გადასცა დედოფლისწყაროს მუნიციპალიტეტის გამგებელმა ნიკოლოზ შანშიაშვილმა. ტურნირს ესწრებოდნენ დედოფლისწყაროს მუნიციპალიტეტის გამგებლის მოადგილე ალექსანდრე ალუღიშვილი და მუნიციპალიტეტის კულტურისა და სპორტის ცენტრის დირექტორი ივანე შანშიაშვილი. /ქიზიყი/