სასაზღვრო პოლიციის დედოფლისწყაროს სამმართველოს თანამშრომელს ამირან გონაშვილს დედოფლისწყაროს რაიონულმა სასამართლომ, აღკვეთის ღონისძიების სახით, წინასწარი 2 თვიანი პატიმრობა შეუფარდა.
პოლიციამ მესაზღვრე მას შემდეგ დააკავა, რაც გურჯაანის რაიონის სოფელ კაჭრეთთან ცენტრალურ ავტომაგისტრალზე მომხდარი მასშტაბური ავტოავარიის შედეგად დედოფლისწყაროში მცხოვრები 67 წლის ნანა არაბული და მისი შვილიშვილი, 5 წლის ნათია ჩოფიკაშვილი დაიღუპნენ. 4 ავტომანქანის შეჯახების შედეგად კიდევ 9 მგზავრი დაშავდა.
დედოფლისწყაროს #4-ე სასაზღვრო სამმართველოს უფროსი პოლკოვნიკი დემურ კეკენაძე ადასტურებს, რომ მის თანამშრომელს წინასწარი პატიმრობა შეეფარდა. მისი თქმით, ამირან გონაშვილს სამსახურეობრივი უფლებამოსილება უკვე შეუჩერდა. კეკენაძე უარყოფს გავრცელებულ ინფორმაციას, თითქოს გონაშვილი რესტორანში დაწინაურებას აღნიშნავდა. მისი თქმით, ამირან გონაშვილს რიგითის წოდება ჰქონდა და სასაზღვრო პოლიციაში ახალი მისული იყო.
ავტოავარიიდან რამდენიმე დღის შემდეგ, თვითმხილველებისგან ცნობილი გახდა, რომ ავტოსაგზაო შემთხვევა ნასვამ მდგომარეობაში მყოფი სასაზღვრო პოლიციის თანამშრომლების მიზეზით მოხდა.
„კაჭრეთის რესტორანში 4-5 მესაზღვრე ქეიფობდა. როგორც მათი საუბრიდან ჩანდა, ისინი სასაზღვრო სამმართველოში დაწინაურებას აღნიშნავდნენ, სპეციალური ფორმა ეცვათ. როცა დათვრნენ, „პაგონებზე“ ვარსკვლავები მოიხსნეს და ჭიქაში ჩაყარეს, ღვინოს ასე სვამდნენ. ძალიან ბევრი დალიეს. მერე ერთმანეთს დაერივნენ. ერთ-ერთს ეუბნებობნენ, უნდა მოგკლათო!... როგორც ჩანს, ამ ბიჭს შეეშინდა, გამოიპარა, ტაქსებთან მოვიდა, სიტუაცია აგვიხსნა - მემუქრებიანო და ერთ-ერთი ტაქსით დედოფლისწყაროში წავიდა. იმ ბიჭს დანარჩენებიც გამოყვნენ და რომ გაიგეს, წასული იყო, თავისი მანქანით დიდი სისწრაფით გაეკიდნენ. ცოტა ხანში ეს ავარიაც მოხდა“, - ერთ-ერთი თვითმხილველის ნაამბობი ტაქსის მძღოლის ნაამბობი მედიასაშუალებებმა გაავრცელეს.
შეგახსენებთ, ამირან გონაშვილი და გარდაცვლილები მეზობლად, ერთიდაიგივე კორპუსში ცხოვრობდნენ. /ქიზიყი/
* * *
Комментариев нет:
Отправить комментарий